​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមមន្ត្រី​បាន​និយាយថា កូរ៉េខាងត្បូង​បាន​ធ្វើ​ការបាញ់​បង្ហោះ​ផ្កាយរណប​ដោយ​ជោគជ័យ​ជា​លើកដំបូង​របស់​ខ្លួន​ដោយ​ប្រើ​រ៉ុក្កែត​ផលិត​ក្នុងស្រុក​កាលពី​ថ្ងៃ​អង្គារ​​ទី​២១​មិថុនា ដោយ​ជំរុញ​មហិច្ឆតា​ផ្នែក​អវកាស​ដែល​កំពុង​កើន​ឡើង​របស់​ខ្លួន​និង​បង្ហាញថា​ខ្លួន​មាន​បច្ចេកវិជ្ជា​សំខាន់ៗ​ដែល​ត្រូវការ​ចាំបាច់​ដើម្បី​បាញ់​បង្ហោះ​ផ្កាយរណប​ចារកម្ម​និង​បង្កើត​មី​ស៊ី​ល​ធំ​​ជាង​មុន ចំ​ពេល​មាន​ភាព​តានតឹង​ជាមួយ​គូប្រជែង​កូរ៉េខាងជើង​។​

​ក្រសួង​វិទ្យាសាស្ត្រ​បាន​និយាយថា រ៉ុក្កែត Nuri​ដែល​មាន​បី​ដំណាក់កាល​បានដាក់​ផ្កាយរណប “​ផ្ទៀងផ្ទាត់​ការអនុវត្ត​មុខងារ​” នៅ​កម្ពស់​គោលដៅ ៧០០ គីឡូម៉ែត្រ បន្ទាប់​ពី​ការបាញ់​បង្ហោះ​នៅ​ម៉ោង ៤ រសៀល​ចេញពី​មជ្ឈមណ្ឌល​បាញ់​បង្ហោះ​អវកាស​របស់​កូរ៉េខាងត្បូង​នៅលើ​កោះ​មួយ​នៅ​ភាគខាងត្បូង​។​

​ផ្កាយរណប​នេះ​បាន​បញ្ជូន​សញ្ញា​អំពី​ស្ថានភាព​របស់​វា​ទៅ​កាន់​ស្ថានីយ​កូរ៉េខាងត្បូង​ដែល​គ្មាន​មនុស្ស​បញ្ជា​នៅ​ទ្វីប​អង់តាក់ទិក​។​មន្ត្រី​ក្រសួង​បាន​និយាយថា​វា​កំពុង​ដឹក​ផ្កាយរណប​តូចៗ​ចំនួន​បួន​ដែល​នឹង​​បញ្ចេញ​នៅ​ប៉ុន្មាន​ថ្ងៃ​ខាងមុខ​នេះ​សម្រាប់​ការសង្កេត​ផែនដី​និង​បេសកកម្ម​ផ្សេងទៀត​។​

​រដ្ឋមន្ត្រី​ក្រសួង​វិទ្យាសាស្ត្រ​លោក លី ចុង​ហូ (Lee Jong-Ho) បាន​និយាយ​នៅក្នុង​សន្និសីទ​សារព័ត៌មាន​តាម​ទូរទស្សន៍​នៅ​ឯ​មជ្ឈមណ្ឌល​បាញ់​បង្ហោះ​ថា​”​វិទ្យាសាស្ត្រ​និង​បច្ចេកវិជ្ជា​របស់​សាធារណរដ្ឋ​កូរ៉េ​​បាន​រីកចម្រើន​យ៉ាងខ្លាំង​។ រដ្ឋាភិបាល​នឹង​បន្ត​ការដើរ​ទៅមុខ​ដ៏​ក្លាហាន​ឆ្ពោះទៅ​រក​ការ​ក្លាយ​ជា​មហាអំណាច​អវកាស​រួមគ្នា​ជាមួយ​ប្រជាជន​”​។​

​នៅក្នុង​សន្និសីទ​តាម​វីដេអូ​ជាមួយ​អ្នកវិទ្យាសាស្ត្រ​និង​អ្នក​ផ្សេង​ទៀត​ដែល​ពាក់ព័ន្ធ​នឹង​ការបាញ់​បង្ហោះ​នេះ ប្រធានាធិបតី យូ​ន ស៊ុក​យ៉ូល (Yoon Suk Yeol)​បាន​អបអរសាទរ​ពួកគេ​ចំពោះ​សមិទ្ធផល​​នេះ ហើយ​បាន​ប្តេជ្ញា​រក្សា​ការសន្យា​ក្នុង​យុទ្ធនាការ​បោះឆ្នោត​របស់​គាត់​ក្នុង​ការបង្កើត​ទីភ្នាក់ងា​រ​អវកាស​រដ្ឋ​៕

រ៉ុក្កែត Nuri​ដឹក​ផ្កាយរណប​ដំបូង​របស់​កូរ៉េ​ខាងត្បូង​ទៅ​ទី​អវកាស​កាលពី​ថ្ងៃ​អង្គារ

ប្រជាជនកូរ៉េខាងត្បូងមើលរ៉ុក្កែត Nuriចេញពី​មជ្ឈមណ្ឌល​បាញ់​បង្ហោះ​អវកាស​របស់​កូរ៉េខាងត្បូង​នៅលើ​កោះ​មួយ​