ដោយៈ បញ្ញា​សាស្ត្រ / ភ្នំពេញ​: គិត​ត្រឹម​ពេលនេះ មាន រយៈពេល​ជិត ១​ខែ​មកហើយ ដែល លោក យឹម តា​ស្រង់ បានប្រកាស​ចាកចេញ​ពី​ផលិតកម្ម​របស់​អ្នកឧកញ៉ា ឡេង ណា​វ៉ា​ត្រា ដែល​ការចាកចេញ​នោះ ក៏​ព្រោះតែ​លោក​មាន​បេសកកម្ម​ជីវិត​មួយ​ថ្មី ដោយ​លោក​ចង់​ក្លាយជា ពាណិជ្ជករ​មួយរូប​ផងដែរ​។ ដ្បិតថា មើលទៅ​មិនសូវមាន​សកម្មភាព​ខ្លាំង ដូច​កាល​នៅក្នុង សិល្បៈ ប៉ុន្តែ​បើតាម​តម្រុយ​ពី​ប្រភព​មួយ បាន​ឲ្យ​ដឹងថា ពេលនេះ អតីត​អ្នកគ្រប់គ្រង​ផលិតកម្ម Galaxy Navatra កំពុង​សម្ងំ​រៀបចំ​យុទ្ធសាស្ត្រ និង​កសាង​ផែនការ ជា​ជំហានៗ ។​

​យឹម តា​ស្រង់ បាន​ហក់​មក​ប្រឡូក ក្នុងការ​រកស៊ី​ក្នុង​ជំនួញ Cosmetic ដ៏​គួរ​ឲ្យ​ភ្ញាក់ផ្អើល ដោយ​ចាប់ដៃ​ម៉ាក់ អ៊ី​អ៊ី នាំយក​ផលិតផល​សម្ផស្ស និង​សុខភាព EEw9 មក​កម្ពុជា​។​

​ថ្លែង​ក្នុង​ថ្ងៃ​សន្និសីទ​សារព័ត៌មាន ប្រកាស​ពី​ជំនួញ​ថ្មី​របស់ខ្លួន យឹម តា​ស្រង់ ប្រាប់ថា សំអាង លើ​ការដាក់​ចិត្ត​ធ្វើ​ការងារ​សិល្បៈ រហូត​ជោគជ័យ មានការ​ទទួលស្គាល់ លោក នឹងធ្វើ​ឲ្យ ផលិតផល​មួយ​នេះ​ល្បី ក៏ដូចជា ការទទួលស្គាល់ ក្នុង​ទីផ្សារ​កម្ពុជា ដូចគ្នា ហើយ​នេះ ក៏​ជា មូលហេតុ​ដែល​លោក សុខចិត្ត​ងាក​ចេញ ពី​ការងារ​សិល្បៈ ដើម្បី​មាន​ពេល​គ្រប់គ្រាន់ គ្រប់ គ្រង និង​ដឹកនាំ​។​

​ចាប់ពី​តាំងពី​នោះ គេ​ឃើញ​លោក បាន​ចេញមក Live ក៏ដូចជា​បង្ហោះ ពី​សកម្មភាព​របស់ លោក​ខ្លះ ក្នុង​ផែនការ​លើកកម្ពស់​ទីផ្សារ​របស់ EEw9​។ ប៉ុន្តែ​តាម​ព័ត៌មាន​ពី​ប្រភព​មួយ ឲ្យ ដឹងថា លោក​កំពុងមាន​ផែនការ​ច្រើន​នេះ​ទៅទៀត​។​

​ប្រភព ដដែល បានឱ្យដឹង​ទៀតថា តា​ស្រង់ ពេលនេះ កំពុង​រៀបចំ​ហេដ្ឋារចនាសម្ព័ន្ធ ក្រុមហ៊ុន ក្នុង​អគារ​ផ្ទះ​វីឡា​មួយ នៅ​តំបន់​កប់​ស្រូវ និង​ក៏​កំពុង​កសាង​ក្រុម​ផលិត​វីដេអូ (Production Team) ធំ​មួយ​ផង​។​

​ប្រភព​ដដែល បាន​បន្ថែមថាៈ ក្រុម​នេះហើយ ជា​ក្រុម​ចម្បង​មួយ ដែលមាន​នាទី​ផលិតកម្ម វីដេអូ ពាណិជ្ជកម្ម​តូចធំ​ពី EEw9 ដោយ​ខ្លួនឯង ដោយ​មិន​ពឹង​លើ​ការជួល​ក្រុម ពី​ខាងក្រៅ នោះទេ​។ ជាមួយគ្នា សម្ភារៈ​ចាំបាច់ ម៉ូតូ ឡាន សម្រាប់​ក្រុម​លក់ ក៏បាន​មាន​សព្វគ្រប់​អស់ ហើយ​ដែរ ដែល​គេ​ជឿថា ក្រុម​នេះ នឹង​ចូលលុកលុយ​ទីផ្សារ ឆាប់ៗ​នេះ​។​

​ចំពោះ​បញ្ហា​នេះ លោក យឹម តា​ស្រង់ ក្នុង​បទសម្ភាសន៍ តាម​សារ​អេឡិចត្រូនិក សុំ​មិន និយាយ​លម្អិត​។ យ៉ាងណា លោក​ក៏​មិនបាន​ទាត់ចោល ទាំងស្រុង​ដែរ​។​

​លោក​បាន​ថ្លែងថាៈ ” អឹម​…​វា​ធម្មតា​ទេ ចាប់ផ្ដើម​ដំណើរការ​អាជីវកម្ម ដំបូងៗ អីចឹង គឺមាន រឿង​ច្រើន​ត្រូវធ្វើ​ហើយ តែបើ​ឲ្យ​ខ្ញុំ​និយាយថា ធ្វើ​អីៗ​ខ្លះ ខ្ញុំ​សុំ​មិន​និយាយ ព្រោះ​រឿង​ខ្លះ វា​អត់ គួរ​និយាយ​…!” ៕/V​