​ដោយៈ ប​.​ខុន / ភ្នំពេញៈ អាង​ត្រពាំងថ្ម ដែល​នឹងត្រូវ​ប្រារព្វ​ទិវា​មច្ឆា​ជាតិ ថ្ងៃទី​១ ខែកក្កដា ឆ្នាំ​២០២២ ពេលនេះ មានទឹក​នៅសល់​ប្រមាណ​ជា ៨០ ភាគរយ នៃ​បរិមាណ​ដែល​អាច ស្តុក​បាន ១៨០ លាន​ម៉ែត្រគូប ជា​អាងទឹក​មិន​ធ្លាប់​រីង និង​មាន​ជម្រៅ​ពី ២ ទៅ ៣ ម៉ែត្រ សម្បូរ​ទៅដោយ​ត្រី​ចម្រុះ និង​សត្វ​ស្លាប​។​

​លោក យឹម ប៊ុន​រ៉ុ​ម ប្រធាន​មន្ទីរ​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​២២ ខែមិថុនា ឆ្នាំ​២០២២​ថាៈ អាង​ត្រពាំងថ្ម នៅពេលនេះ មានទឹក​ប្រមាណ​ជា ៨០ ភាគរយ នៃ​បរិមាណ​ដែល​អាង​ស្តុក​បាន ១៨០ លាន​ម៉ែត្រគូប ដោយមាន​បើក​បញ្ចេញ​ទៅ ស្រោចស្រព​ដំណាំ​ស្រូវ នៅ​ផ្នែក​ខាងក្រោម​អាង រាល់ថ្ងៃ​។ អាង​ត្រពាំងថ្ម នៅ​ដើមរដូវ វស្សា​នេះ មាន​សល់​ទឹក​ច្រើន ដោយសារ​កាលពី​ចុងរដូវ​វស្សា ឆ្នាំ​២០២១ តម្កល់​ទឹក​ទុក​បាន ពេញ និង​មាន​ភ្លៀង​ធ្លាក់​មកជា​បន្តបន្ទាប់ កាលពី​ក្នុង​រដូវប្រាំង​ផង​។​

​ប្រធាន​មន្ទីរ​ខាងលើ បាន​និយាយ​ឱ្យដឹងទៀតថាៈ ទឹក​នៅក្នុង​អាង​ត្រពាំងថ្ម ពេលនេះ មាន​ជម្រៅ​ពី ២ ទៅ​ជាង ៣ ម៉ែត្រ មិន​ធ្លាប់​រីង​ទេ នៅ​រដូវប្រាំង និង​នៅពេល​ពីរ បី​ឆ្នាំ ចុងក្រោយ​នេះ ត្រូវបាន​កំណត់​ទឹក ទុកឱ្យ​នៅសល់​តិច​បំផុត​ពី ៣០ ទៅ ៤០ លាន​ម៉ែត្រគូប សម្រាប់​ការពារ​ត្រី និង​សត្វ​ស្លាប​ដ៏​ច្រើន រស់នៅក្នុង​បឹង ដែល​ការពារ​ដោយ​សហគមន៍​នានា​។​

​លោក យឹម ប៊ុន​រ៉ុ​ម បាន​និយាយ​ឱ្យដឹង​ផងដែរ​ថាៈ អាង​ត្រពាំងថ្ម ដែល​នឹងត្រូវ​ប្រារព្វ​ទិវា មច្ឆា​ជាតិ នៅ​ថ្ងៃទី​១ ខែកក្កដា ឆ្នាំ​២០២២ ធ្លាប់​បានធ្វើ​ពិធី​លែង​ត្រី ចំនួន​២​លើក រួចមកហើយ​។ នៅក្នុង​អាង​នេះ សព្វថ្ងៃ សម្បូរ​ដោយ​ត្រី​ចម្រុះ និង​សត្វ​ស្លាប​៕/V​