​ដោយៈ អង្គា​រ៍​ហេង / ភ្នំពេញៈ ជនសង្ស័យ​ម្នាក់ ត្រូវបាន​កម្លាំង​សមត្ថកិច្ច នៃ​អធិការដ្ឋាន នគរបាល ខណ្ឌ​ច្បារអំពៅ ស្រាវជ្រាវ​ឃាត់ខ្លួន និង​បញ្ជូន​ទៅកាន់​សាលាដំបូង រាជធានី​ភ្នំពេញ ពាក់ព័ន្ធ​ករណី​រំលោភ​លើ​ទំនុកចិត្ត និង​ប្រើប្រាស​អាវុធ​កែច្នៃ នៅ​ព្រឹក​ថ្ងៃទី​២៣ ខែមិថុនា ឆ្នាំ​២០២២​។​

​សមត្ថកិច្ច បានបញ្ជាក់​ថាៈ នៅ​ថ្ងៃទី​២១ ខែមិថុនា ឆ្នាំ​២០២២ កម្លាំង​សមត្ថកិច្ច នៃ​អធិការដ្ឋាន នគរបាល​ខណ្ឌ​ច្បារអំពៅ បាន​ឃាត់ខ្លួន​ជនសង្ស័យ​ម្នាក់ នៅមុខ​ផ្ទះ​គ្មាន​លេខ ក្នុងភូមិ​ជ្រោយ អំពិល​១ សង្កាត់​ក្បាលកោះ ខណ្ឌ​ច្បារអំពៅ តាម​ដីកា​បង្គាប់​ឱ្យ​ចាប់ខ្លួន ដោយ​លោក អ៊ុក សុវណ្ណារិទ្ធ ចៅក្រម​ស៊ើបសួរ សាលាដំបូង​រាជធានី​ភ្នំពេញ ពាក់ព័ន្ធ​ករណី​រំលោភ​លើ​ទំនុកចិត្ត ប្រព្រឹត្ត​នៅ​រាជធានី​ភ្នំពេញ កាលពី​អំឡុង​ខែមិថុនា ឆ្នាំ​២០១៨​។​

​ជនសង្ស័យ​ឈ្មោះ វិញ ស៊ុន​ហួរ ភេទ ប្រុស អាយុ​៣២​ឆ្នាំ ជនជាតិខ្មែរ មុខរបរ មិន​ពិតប្រាកដ ស្នាក់​នៅផ្ទះ​គ្មាន​លេខ ភូមិ​ជ្រោយ​អំពិល​១ សង្កាត់​ក្បាលកោះ ខណ្ឌ​ច្បារអំពៅ​។ នៅពេល ឃាត់ខ្លួន​ជន​ជាប់​ម្នាក់នេះ សមត្ថកិច្ច ដកហូត​បាន​វត្ថុតាង អាវុធ​កែច្នៃ ១​ដើម បាញ់​គ្រាប់កង់​។​

​បច្ចុប្បន្ន ជនសង្ស័យ ត្រូវបាន​សមត្ថកិច្ច​ជំនាញ បញ្ជូន​ទៅកាន់​សាលាដំបូង រាជធានី​ភ្នំពេញ ហើយ​កំពុងស្ថិត​ក្នុងដំណាក់កាល តំណាង​អយ្យការ បើក​ការ​ស៊ើបសួរ​៕/V​