​ប្រែ​សម្រួល : កញ្ញា​ដា​លី​ស (VNExpress) ៖ ទឹកជំនន់​បំបែក​កំណត់ត្រា​ត្រូវគេ​រំពឹងថា​នឹង​កើតមាន​នៅ​តំបន់​ភាគ​ខាងត្បូង​ប្រទេស​ចិន​នៅ​ថ្ងៃ​ព្រហស្បតិ៍​ទី​២៣​មិថុនា​នេះ​ខណៈ​ភ្លៀង​ធ្លាក់​ខ្លាំង​​បាន​រុញច្រាន​កម្រិត​ទឹក​នៅក្នុង​តំបន់​ដីសណ្ត​ទន្លេ​គុជ (Pearl River) ឡើង​ដល់​កម្រិត​ខ្ពស់​បំផុត​ធៀប​នឹង​ការ​ធ្លាក់ភ្លៀង​ក្នុង​រយៈពេល​ជិត​មួយ​សតវត្សរ៍​។​

​មនុស្ស​រាប់សែន​នាក់​ត្រូវបាន​ជម្លៀស​ចេញពី​តំបន់​រងគ្រោះ​ខ្លាំងជាងគេ រួម​មាន​ខេត្ត​ក្វាង​ទុង ដែល​ជា​មជ្ឈមណ្ឌល​ផលិតកម្ម​និង​ភស្តុភារ និង​ជា​ជម្រក​របស់​មណ្ឌល​បច្ចេក​វិជ្ជា​ចិន​គឺ​ទីក្រុង​សិន​ចិន (Shenzhen)​។​

​ក្រសួង​ធនធានទឹក​របស់​ចិន​កាលពី​ថ្ងៃ​ពុធ​បាន​ចេញផ្សាយ​ការ​ជូនដំណឹង​អំពី​ទឹក​ជំនន់​នៅ​កម្រិត​ខ្ពស់​បំផុត​នៅ​អាង​ទន្លេ​គុជ ដោយ​និយាយថា កម្រិត​ទឹក​នៅ​ទីតាំង​មួយ​”​គឺ​លើស​ពី​កំណត់ត្រា​​ប្រវត្តិសាស្ត្រ​” ហើយ​ថា​ទីក្រុង​ក្វាង​ចូ​វ ដែល​ជា​ទី​រួម​ខេត្ត អាច​នឹង​រង​ផលប៉ះពាល់​។​

​កាលពី​ថ្ងៃ​ពុធ រូបភាព​ពី​ទីក្រុង​សៅ​គ័ន (Shaoguan) ស្ថិត​នៅ​ភាគ​ខាងជើង​ទីក្រុង​ក្វាង​ចូ​វ បានបង្ហាញ​អ្នកស្រុក​កំពុង​ធ្វើដំណើរ​ឆ្លងកាត់​ផ្លូវ​សំខាន់ៗ​ដែល​ជន់​លិច​ខណៈ​ទឹក​នៅ​តំបន់​ខ្លះ​បាន​ឡើង​​ដល់​ដំបូល​ឡាន​។​

​ទឹកជំនន់​បាន​ពន្លិច​ហាង​និង​អគារ​ជាច្រើន ហើយ​គេ​ឃើញ​ប្រជាជន​កំពុង​បោសសម្អាត​កម្ទេចកម្ទី​។

​តំបន់​ដីសណ្ត​ទន្លេ​គុជ​ខ្យង​គឺជា​លំនៅ​របស់​ទីក្រុង​មហាអំណាច​សេដ្ឋកិច្ច ក្វាង​ចូ​វ និង​សិន​ចិន ក៏ដូចជា​ទីក្រុង​តូចៗ​មួយចំនួន​ដែល​មាន​ប្រជាជន​រស់នៅ​យ៉ាងច្រើន​ក្រាស់ក្រែល ដែល​មាន​វិស័យ​ផលិតកម្ម​ធំៗ​និង​ឧស្សាហកម្ម​ផ្សេងៗ​ទៀត​។​

​អាជ្ញាធរ​គ្រប់គ្រង​គ្រាអាសន្ន​របស់​ខេត្ត​បាន​និយាយ​នៅ​ដើម​សប្តាហ៍​នេះ​ថា ការខាតបង់​សេដ្ឋកិច្ច​ដោយ​ផ្ទាល់​ត្រូវបាន​ប៉ាន់ប្រមាណ​ថា​មាន​ចំនួន ១,៧ ពាន់​លាន​យ័ន (២៥៣ លាន​ដុល្លារ​)៕

អ្នកស្រុក​កំពុង​ធ្វើដំណើរ​ឆ្លងកាត់​ផ្លូវ​សំខាន់ៗ​ដែល​ជន់​លិច​នៅ​ទីក្រុង​សៅ​គ័ន​កាលពី​ថ្ងៃ​ពុធ