​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រព័ន្ធ​ផ្សព្វផ្សាយ​រដ្ឋ​បាន​និយាយ​កាលពី​ថ្ងៃ​សុក្រ​ទី​២៤​មិថុនា​ថា មេដឹកនាំ​កូរ៉េខាងជើង​លោក គីម ជុង​អ៊ុន បាន​បញ្ជា​ឱ្យ​ពង្រឹងសមត្ថភាព​ការពារ​របស់​ប្រទេស ខណៈ​លោក​បាន​បញ្ចប់​កិច្ចប្រជុំ​គណបក្ស​ដ៏​សំខាន់​មួយ​ជាមួយ​មន្ត្រី​យោធា​កំពូលៗ ដែល​បាន​កើតឡើង​ចំ​ពេល​មាន​ការព្រួយបារម្ភ​ពី​ក្រៅ​ប្រទេស​អំពី​លទ្ធភាព​សាកល្បង​អាវុធ​នុយក្លេអ៊ែរ​។​

​កិច្ចប្រជុំ​នេះ​ត្រូវ​បាន​ឃ្លាំមើល​យ៉ាង​ដិតដល់​ដោយសារ​តែ​វា​អាច​ផ្តល់​តំរុយ​ខ្លះ​ចំ​ពេល​មាន​ការរំពឹងទុក​ខ្លាំង​ឡើង​ថា​ទីក្រុង​ព្យុង​យ៉ាង​អាច​ធ្វើ​ការសាកល្បង​អាវុធ​នុយក្លេអ៊ែរ​លើកដំបូង​របស់​ខ្លួន​ក្នុង​រយៈពេល​ប្រាំ​ឆ្នាំ ដែល​មន្ត្រី​អាម៉េរិក​និង​កូរ៉េខាងត្បូង​និយាយថា​អាច​កើតឡើង​គ្រប់ពេល​។​

​ប្រព័ន្ធ​ផ្សព្វផ្សាយ​ផ្លូវការ KCNA បាន​និយាយថា លោក​គីម​បាន​ធ្វើ​ជា​អធិបតី​ក្នុង​កិច្ចប្រជុំ​ធំ​រយៈពេល​បី​ថ្ងៃ​នៃ​គណៈកម្មការ​យោធា​មជ្ឈិម​ទី​៨ ដែល​បាន​បញ្ចប់​កាលពី​ថ្ងៃ​ព្រហស្បតិ៍ ទី​ដែល​ក្រុមមន្ត្រី​កំពូល “​បាន​ពិនិត្យ​និង​អនុម័ត​លើ​បញ្ហា​សំខាន់​ក្នុង​ការផ្តល់​ការធានា​ខាង​យោធា​សម្រាប់​ការពង្រឹង​បន្ថែមទៀត​នូវ​ការ​ទប់ទល់​សង្គ្រាម​របស់​ប្រទេស​”​។​

​របាយការណ៍​របស់ KCNA មិន​បាន​និយាយ​ដោយ​ផ្ទាល់​អំពី​កម្មវិធី​នុយក្លេអ៊ែរ​ឬ​មី​ស៊ី​ល​ផ្លោង​របស់​កូរ៉េ​ខាងជើង​នោះទេ ប៉ុន្តែ​និយាយថា លោក រី ព្យុង ឆុ​ល (Ri Pyong Chol)​ដែល​កំពុង​ដឹកនាំ​​ការអភិវឌ្ឍ​មី​ស៊ី​ល​របស់​កូរ៉េខាងជើង ត្រូវបាន​ជ្រើសរើស​ជា​អនុប្រធាន​គណៈកម្មាធិកា​រ​យោធា​មជ្ឈិមបក្ស​ដ៏​មាន​ឥទ្ធិពល​។​

KCNA បាន​និយាយថា​”​លោក​គីម​បាន​សង្កត់ធ្ងន់​លើ​តម្រូវការ​សម្រាប់​កងទ័ព​ទាំងមូល​ដើម្បី​…​ពង្រឹងសមត្ថភាព​ការពារ​ខ្លួន​ដ៏​ខ្លាំងក្លា​តាម​គ្រប់​មធ្យោបាយ​សម្រាប់​ទប់ទល់​នឹង​កងកម្លាំង​អរិភាព​​ដ៏​ច្រើន​លើសលប់​ណាមួយ​”​។​

​ក្នុង​អំឡុងពេល​នៃ​កិច្ចប្រជុំ​នោះ កូរ៉េ​ខាងជើង​បាន​លើកឡើង​យ៉ាង​កម្រ​អំពី​ការកែប្រែ​ផែនការ​សង្គ្រាម​របស់ខ្លួន ហើយ​និយាយ​ថា​ខ្លួន​បាន​សម្រេចចិត្ត​ពង្រឹង​ភារកិច្ច​ប្រតិបត្តិកា​ររ​បស់​អង្គភាព​​ជួរមុខ​របស់​ខ្លួន​ជាមួយ​នឹង “​ផែនការ​សកម្មភាព​យោធា​ដ៏​សំខាន់​មួយ​”​។​

​ប្រព័ន្ធ​ផ្សព្វផ្សាយ​រដ្ឋ​កាលពី​ថ្ងៃ​ព្រហស្បតិ៍​បាន​ចេញផ្សាយ​រូបថត​របស់​មន្ត្រី​កំពូល​កូរ៉េខាងជើង​នៅក្នុង​កិច្ចប្រជុំ​ជាមួយនឹង​ផែនទី​នៃ​អ្វីដែល​ហាក់ដូចជា​ឆ្នេរសមុទ្រ​ភាគ​ខាងកើត​នៃ​ឧបទ្វីប​កូរ៉េ​។​

​កាលពី​ខែ​មេសា លោក​គីម​បាន​អំពាវនាវ​ឱ្យ​យោធា​របស់​ប្រទេស “​ពង្រឹងកម្លាំង​របស់​ពួកគេ​តាម​គ្រប់​មធ្យោបាយ​ដើម្បី​កម្ទេច​សត្រូវ​”៕