​ដោយៈ​ស​រិ​ទ្ធ​-​អង្គា​រ៍​ហេង​/​ភ្នំពេញៈ នៅ​ថ្ងៃទី​២៣ ខែមិថុនា ឆ្នាំ​២០២២ វេលា​ម៉ោង​៥​ល្ងាច កំលាំង​ជំនាញ​នគរបាល​ខណ្ឌឫស្សីកែវ បាន​សហការ ជាមួយ​កំលាំង​នគរបាល​ប៉ុស្តិ៍​រដ្ឋបាល​សង្កាត់​ស្វាយប៉ាក​ឃាត់ខ្លួន​ជនសង្ស័យ​ម្នាក់ ករណី​ឃាតកម្ម (​ប្រើ​ចបកាប់​ដង​ដែក​វាយ​លើ​ជនរងគ្រោះ​បណ្តាល​ឲ្យ​ស្លាប់​) នៅត្រង់ចំណុច​ផ្ទះ​លេខ​១៦៧A ផ្លូវជាតិ​លេខ​៥ ក្រុម​២ ភូមិ​ឡ​កំបោរ សង្កាត់​ស្វាយប៉ាក ខណ្ឌឫស្សីកែវ រាជធានី​ភ្នំពេញ​។​

​ជនរងគ្រោះ​ឈ្មោះ មុំ ហៀ​ង ភេទ​ស្រី អាយុ​៧៧​ឆ្នាំ ស្នាក់​នៅផ្ទះ​ក្នុង​ទីតាំង​កើតហេតុ​ខាងលើ មុខរបរ​នៅផ្ទះ ។​ រីឯជនបង្ក​ឈ្មោះ ឯម ពិ​សិទ្ធ ភេទ​ប្រុស អាយុ​៣០​ឆ្នាំ (​ត្រូវជា​ចៅ​បង្កើត​) ស្នាក់នៅ​ជាមួយគ្នា មុខរបរ​គ្មាន ។​

​លោក​វរសេនីយ៍ឯក ហ៊ាង ថា​រ៉េត អធិការនគរបាល​ខ​ណ្ឌ​ឫស្សីកែវ​បានឱ្យដឹងថា មុនពេល​កើតហេតុ​កាល​នៅ​ថ្ងៃទី​១០ ខែ មិថុនា ឆ្នាំ​២០២២​វេលា​ម៉ោង​ប្រហែល​២:១៥​នាទី​រំលង​អា​ធ្រា​ត ជនសង្ស័យ​បាន​ទិញ​ស្រាថ្នាំ​កន្លះ​លីត្រ​យកមក​ផឹក រហូតដល់​ម៉ោង​កើតហេតុ​៤:៤០​នាទី​ទៀបភ្លឺ ជនរងគ្រោះ​បាន​ដើរចេញ​ពីក្នុងផ្ទះ​មកដល់​ចំណុច​មាត់​ជណ្ដើរ ជនសង្ស័យ​បាន​យក​ចបកាប់​មក​វាយ​ជីដូន​បណ្ដាល​ឲ្យ​ស្លាប់​នៅនឹងកន្លែង​កើតហេតុ​រួច​គេចខ្លួនបាត់​។

​ក្រោយពី​ទទួល​ពាក្យបណ្តឹង​សមត្ថកិច្ច​ជំនាញ​ខណ្ឌ ប៉ុស្តិ៍​បាន​បន្ត​នីតិវិធី ស្រាវជ្រាវ​ជា​បន្តបន្ទាប់​ឈានទៅដល់​ឃាត់ខ្លួន​ជនបង្ក​បាន​នៅ​ថ្ងៃទី​២៣ ខែមិថុនា ឆ្នាំ​២០២២ វេលា​ម៉ោង​៥​ល្ងាច​ត្រង់ចំណុច​គល់ស្ពាន លី យុង​ផាត់​ខាងកើត ស្ថិត​ក្នុងភូមិ​ព្រែក​តា​រដ្ឋ សង្កាត់​ព្រែក​តាសេក ខណ្ឌ​ជ្រោយចង្វា​។​

​ក្រោយពី​សម​ត្កិ​ច្ច​បានធ្វើ​ការសាកសួរ ជនសង្ស័យ​បាន​សារភាពថា ខ្លួន​ពិតជា​បាន​យក​ចបកាប់​ដង​ដែក​វាយ​ជីដូន​ប្រាកដ​មែន​។​

​បច្ចុប្បន្ន​ជនសង្ស័យ​ខាងលើ​ជំនាញ​ខណ្ឌ ប៉ុស្តិ៍ បាន​កសាង​សំណុំរឿង​បញ្ចូនទៅ​សាលាដំបូង​រាជធានី​ភ្នំពេញ ដើម្បី​អនុវត្តន៍​តាម​នីតិវិធី​ច្បាប់​៕