​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ គ្រីស្ទា​ណូ រ៉ូ​ណាល់​ដូ​កំពុង​ពិចារណា​ចាកចេញ​ពី​ក្រុម​បិសាច​ក្រហម Manchester United នៅ​រដូវក្តៅ​នេះ ដោយសារតែ​ពួកគេ​មិន​មាន​សកម្មភាព​ទិញដូរ​កីឡាករ​ជោគជ័យ​ណាមួយ​សោះ នេះ​បើ​យោងតាម​របាយការណ៍​នៅក្នុង​ប្រទេស​ព័រ​ទុយ​ហ្គាល់​។​

​ខ្សែប្រយុទ្ធ​ឆ្នើម​រូបនេះ​បាន​ត្រឡប់​ទៅ​កាន់​ទឹកដី Old Trafford កាល​ពី​រដូវក្តៅ​ឆ្នាំមុន ពោលគឺ ១៣ ឆ្នាំ​បន្ទាប់ពី​ចាកចេញ​ទៅ Real Madrid ក្នុងតម្លៃ​កំណត់ត្រា​ពិភពលោក ប៉ុន្តែ​វា​មិន​បាន​ស​បញ្ជាក់​ពី​ការ​ត្រឡប់មកវិញ​ដ៏​រុងរឿង​ដែល​គាត់​បាន​សង្ឃឹម​នោះទេ​។​

​រ៉ូ​ណាល់ដូ​ស៊ុត​បញ្ចូល​ទីបាន ២៤ គ្រាប់​ក្នុង ៣៨ ប្រកួត ប៉ុន្តែ​ក្រុម​បិសាច​ក្រហម​នៅ​តែ​ត្រដាបត្រដួស​ដោយ​បញ្ចប់​ត្រឹម​ចំណាត់ថ្នាក់​លេខ ៦ នៅ Premier League ចំ​ពេល​មាន​ការរិះគន់​ឥទ្ធិពល​របស់​គាត់​ទៅលើ​សមត្ថភាព​វាយ​សង្គ្រប់​របស់​ក្រុម​និង​ភាពស៊ីចង្វាក់​គ្នា​ជា​ទូទៅ​។​

​កីឡាករ​ជើងចាស់​សញ្ជាតិ​ព័រ​ទុយ​ហ្គាល់​វ័យ ៣៧ ឆ្នាំ​រូប​នេះ​នៅសល់​កុងត្រា​មួយ​ឆ្នាំ​ទៀត ហើយ​ទាំង​គាត់​និង​គ្រូបង្វឹក​ថ្មី លោក អេ​រិក ថេន ហាក (Erik ten Hag) ដែល​បាន​ជំនួស​តំណែង​គ្រូបង្វឹក​បណ្តោះអាសន្ន​លោក រ៉ា​ហ្វ រេ​ង​នី​ក (Ralf Rangnick) កាលពី​ខែ​មេសា បាន​និយាយ​ជាមួយនឹង​ក្តីរំភើប​អំពី​រដូវ​កាល​ថ្មី បន្ទាប់​ពី​គ្រូបង្វឹក​សញ្ជាតិ​ហូឡង់​រូប​នេះ​អនុវត្ត​ការកសាង​ក្រុម​ឡើង​វិញ​។​

​ប៉ុន្តែ​ទោះបីជា​មាន​ការចាប់អារម្មណ៍​លើ​ខ្សែប្រយុទ្ធ ដា​វីន នូ​ណេ​ស (Darwin Nunez) ដែល​បាន​ចូលរួម​ជាមួយ Liverpool ខ្សែ​បម្រើ ហ្វ្រែង​គី ដេ​ជុង (Frenkie de Jong) របស់ Barcelona និង​ខ្សែបម្រើ​ស្លាប អាន​ថូ​នី (Antony)​របស់ Ajax ក៏ដោយ ក៏​ក្លឹប​នៅតែ​មិន​ទាន់​បាន​ចុះហត្ថលេខា​ទិញ​បាន​កីឡាក​រណា​ម្នាក់​នៅឡើយ​ទេ​។​

​ហើយ​បើ​យោង​តាម​កាសែត​ព័រ​ទុយ​ហ្គាល់ Record បានឱ្យដឹងថា រ៉ូ​ណាល់ដូ​ដែល​មាន​ការខកចិត្ត​យ៉ាងខ្លាំង បាន​ត្រៀម​ខ្លួន​រួចជាស្រេច​ដើម្បី​ចាកចេញ​ពី​ក្រុម​នៅ​ភាគ​ពាយព្យ​អង់គ្លេស​មួយ​នេះ ដោយសារ​ការ​ខ្វះ​មហិច្ឆតា​ក្នុង​ការទិញ​កីឡាករ​។​

​ហើយ​រ៉ូ​ណាល់ដូ​ថែមទាំង​ចេញ​ឱសានវាទ​ដល់​ក្លិប​ទៀតផង ដោយ​និយាយថា “​ពង្រឹង​ក្រុម មិនចឹង​ទេ​ខ្ញុំ​នឹង​ចាកចេញ​”​។​

​តាម​ដឹង​រ៉ូ​ណាល់ដូ​បាន​ប្រាប់​ក្រុម​ផ្ទៃក្នុង​របស់​គាត់​ថា កង្វះ​ការទិញ​ដូរ​កីឡាករ​ជា​បន្ត​នឹង​ឃើញ​គាត់​ចាប់ផ្តើម​ស្វែងរក​ក្លិប​ថ្មី​៕

រ៉ូ​ណាល់ដូ​នឹង​ចាប់ផ្តើម​ស្វែងរក​ក្លិប​ថ្មី បើ​បិសាច​ក្រហម​នៅតែ​មិន​ទិញ​បាន​កីឡាករ​ថ្មី