ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មេដឹកនាំ​ចិន លោក ស៊ី ជីន​ភីង នឹង​ធ្វើ​ទស្សនកិច្ច​នៅ​ហុងកុង​នៅ​សប្តាហ៍​ក្រោយ​ដើម្បី​ប្រារព្ធ​ខួប​លើក​ទី ២៥​នៃ​ការប្រគល់​អតីត​អាណានិគម​អង់គ្លេស​​មួយ​នេះ​មក​ប្រទេស​ចិន បន្ទាប់​ពី​ការបង្ក្រាប​លើ​ចលនា​គាំទ្រ​លទ្ធិប្រជាធិបតេយ្យ ដែល​បាន​ធ្វើឱ្យ​មាន​ភាព​តានតឹង​ជាមួយ​ទីក្រុង​វ៉ាស៊ីនតោន​និង​អឺរ៉ុប​។​

​ទីភ្នាក់ងារ​ព័ត៌មាន​ស៊ីន​ហួរ​បាន​ប្រកាស​កាលពី​ថ្ងៃ​សៅរ៍​ទី​២៥​មិថុនា​ថា លោក​ស៊ី​នឹង​ចូលរួម​ក្នុង​ការប្រជុំ​លើកដំបូង​ជាមួយ​នាយក​ប្រតិបត្តិ​ថ្មី​របស់​រដ្ឋាភិបាល​ហុង​កុង​គឺ​លោក ច​ន លី (John Lee)​។ ស៊ីនហួ​មិន​បាន​បង្ហាញថា​តើ​លោក​ស៊ី ដែល​ជា​ប្រធានាធិបតី​និង​ជា​អគ្គលេខា​បក្ស​កុម្មុយនីស្ត​កំពុងកាន់​អំណាច នឹង​ស្នាក់​នៅ​រយៈពេល​ប៉ុន្មាន​ថ្ងៃ​ឬ​ផ្តល់​ព័ត៌មាន​លម្អិត​ផ្សេង​នោះទេ​។​

​លោក​ស៊ី​បាន​ចៀសវាង​ការធ្វើដំណើរ​នៅក្រៅ​ចិន​ដីគោក ចាប់​តាំងពី​ការចាប់ផ្តើម​នៃ​ជំងឺ​រាតត្បាត​កាលពី​ជាង​២​ឆ្នាំមុន​។ ការសម្រេចចិត្ត​របស់​លោក​ទៅ​កាន់​ទីក្រុង​ហុងកុង​ដែល​ជួប​ការលំបាក​ក្នុង​​ការទប់ស្កាត់​កំណើន​ករណី​ឆ្លង​កូ​វីដនៅ​ឆ្នាំនេះ ឆ្លុះបញ្ចាំង​ពី​សារៈសំខាន់​នៃ​ខួប​លើក​នេះ​ចំពោះ​លោក​ស៊ី ដែល​ចង់ឱ្យ​គេ​មើលឃើញថា​ជា​អ្នកដឹកនាំ “​ស្តារ​ជាតិ​ឡើងវិញ​”​ចំ​ពេល​មាន​ការពង្រឹង​យោធា​និង​​គោល​នយោបាយ​ចិន​នៅ​បរទេស​។​

​ខួប​លើក​នេះ​ធ្វើឡើង​បន្ទាប់​ពី​ការបង្ក្រាប​មួយផ្នែក ដែល​ដឹកនាំ​ដោយ​លោក​លី ជា​អតីត​ប្រធាន​សន្តិសុខ​ហុងកុង ដើម្បី​កម្ទេច​អ្វី​ដែល​លោក​ខាងលិច​ហៅ​ថា​ចលនា​គាំទ្រ​លទ្ធិប្រជាធិបតេយ្យ​តែ​ចិន​ហៅ​​ថា​ក្រុម​អនាធិបតេយ្យ​ក្រោយ​ខ្សែ​ញាក់​នៃ​កម្លាំង​បរទេស​។​សកម្មជន​ជា​ច្រើន​រូប​ត្រូវបាន​កាត់ទោស​ឱ្យ​ជាប់ពន្ធនាគារ មនុស្ស​ជាច្រើន​នាក់​ផ្សេង​ទៀត​ត្រូវបាន​ចាប់ខ្លួន ហើយ​កាសែត​គាំទ្រ​លទ្ធិ​ប្រជា​ធិប​​តេ​យ្យ​ដ៏​លេចធ្លោ​បំផុត​របស់​ហុងកុង​ត្រូវ​បាន​បិទ​។​

​ការគ្រប់គ្រង​កាន់តែ​តឹងតែង​ក្រោម​ច្បាប់​សន្តិសុខ​ជាតិ​ដែល​បាន​ដាក់ចេញ​ក្នុង​ឆ្នាំ ២០២០ បាន​ជំរុញ​ឱ្យ​មនុស្ស​មួយចំនួន​ចាកចេញ​ទៅ​កាន់​កោះ​តៃវ៉ាន់ ចក្រភព​អង់គ្លេស និង​ប្រទេស​ដទៃ​ទៀត​។​

​ការណ៍​នោះបាន​ជំរុញ​ឱ្យ​មាន​ការ​ព្រមាន​ថា គណបក្សកាន់អំណាច​ចិន​កំពុង​បំផ្លាញ​ឋានៈ​របស់​ហុងកុង​ជា​មជ្ឈមណ្ឌល​ពាណិជ្ជកម្ម​និង​ហិរញ្ញវត្ថុ​ពិភពលោក​៕

​លោក​ស៊ី​នឹង​ធ្វើ​ទស្សនកិច្ច​នៅ​ហុងកុង​សប្តាហ៍​ក្រោយ