ប្រែ​សម្រួល : កញ្ញា​ដា​លី​ស (​ប៊ី​ប៊ីស៊ី​) ៖ ក្រុម​អ្នក​រុករក​បាន​រកឃើញ​បំណែក​នាវា​លិច​ដ៏​ជ្រៅ​បំផុត​មិន​ធ្លាប់មាន ដែល​ត្រូវបាន​កំណត់​អត្តសញ្ញាណ​ជា​នាវា​ពិឃាដ​របស់​កងទ័ពជើងទឹក​អាម៉េរិក​ដែល​លិច​ក្នុង​​អំឡុង​សង្គ្រាមលោកលើកទីពីរ​។​

​នាវា USS Samuel B Roberts​បាន​លិច​ក្នុងអំឡុង​សមរភូមិ​នៅក្បែរ​ឆ្នេរ​សា​ម៉ា (Samar) ក្នុង​សមុទ្រ​ហ្វីលីពីន​នៅ​ខែតុលា ឆ្នាំ ១៩៤៤​។ វា​ស្ថិត​នៅក្នុង​ទឹក​ជម្រៅ ៦.៨៩៥ ម៉ែត្រ​។​

​អ្នក​ផ្តល់​ហិរញ្ញប្បទាន​និង​ជា​អ្នក​ផ្សងព្រេង​នៅ​រដ្ឋ​តិច​សាស លោក វី​កទ័រ វេស្កូ​វ៉ូ (Victor Vescovo) ដែល​ជា​ម្ចាស់​នាវាមុជទឹក​មុជ​ជម្រៅ​ជ្រៅ​មួយ បាន​រកឃើញ នាវា “Sammy B”​ដែល​រក្សា​រូបរាង​​សឹងតែ​នៅ​ដដែល​។​

​នាវា​នេះ​មាន​ភាពល្បីល្បាញ​សម្រាប់​ការឈរជើង​ចុងក្រោយ​បំផុត​យ៉ាង​ក្លាហាន​ដើម្បី​ប្រឆាំង​នឹង​ជប៉ុន​។​

​ដោយ​ចាញ់​ប្រៀប​ទាំង​ចំនួន​នាវា​និង​អាវុធ នាវា​នេះ​នៅតែ​អាច​ទប់ទល់​នឹង​នា​វាស​ត្រូវ​ជាច្រើន​គ្រឿង មុន​ពេល​វា​លិចទៅ​បាតសមុទ្រ​។​

​ក្នុងចំណោម​នាវិក ២២៤ នាក់​របស់​នាវា Samuel B Roberts មាន ៨៩ នាក់​ត្រូវបាន​សម្លាប់​។ អ្នក​នៅ​រស់រាន​មានជីវិត​ចំនួន ១២០ នាក់​បាន​តោង​ពោង​សុវត្ថិភាព​អស់​រយៈពេល ៥០​ម៉ោង​ដើម្បី​​រង់ចាំ​ការជួយ​សង្គ្រោះ​។​

​លោក​វេស្កូ​វ៉ូ ដែល​ជា​ទាហានជើងទឹក​ក្នុង​សម័យកាល​របស់គាត់ បាន​និយាយថា វា​គឺជា​កិត្តិយស​ដ៏​អស្ចារ្យ​ក្នុង​ការកំណត់​ទីតាំង​នាវា​លិច​មួយ​នេះ​ហើយ​តាមរយៈ​ការ​ធ្វើ​ដូច្នេះ​គឺ​មាន​ឱកាស​ដើម្បី​និយាយ​​ឡើងវិញ​នូវ​រឿងរ៉ាវ​វីរភាព​ដ៏​អស្ចារ្យ​និង​កាតព្វកិច្ច​របស់​វា​។​

​លោក​បាន​ប្រាប់ BBC News​ថា “​យើង​សូម​និយាយថា ដែក​មិនចេះ​កុហក​ទេ ហើយ​ដូច្នេះ​បំណែក​នាវា​ទាំងនេះ​គឺ​ជា​សាក្សី​ចុងក្រោយ​នៃ​សមរភូមិ ដែល​ពួក​វា​បាន​ប្រយុទ្ធ​”៕

​នាវា USS Samuel B Roberts បាន​លិច​ក្នុងអំឡុង​សមរភូមិ​នៅក្បែរ​ឆ្នេរ​សា​ម៉ា (Samar) ក្នុង​សមុទ្រ​ហ្វីលីពីន​នៅ​ខែតុលា ឆ្នាំ ១៩៤៤​