ដោយ​: សុវណ្ណ​កុម្ភៈ​/ ភ្នំពេញ​: វិទ្យាស្ថាន​ខេ​ម​អេ​ដ បានដាក់​ក្ដី​សង្ឃឹមថា​ក្នុង​ព្រឹត្តិការណ៍​ប្រកួត​កីឡា​និស្សិត​ឧ​ត្ត​មសិ​ក្សា និង​មធ្យ​សិក្សា​បច្ចេកទេស​ថ្នាក់ជាតិ​ប្រចាំឆ្នាំ​២០២២ ដែល​កំពុងដំណើរការ​នេះ​ក្រុម​បាល់បោះ​ទាំង​បុរស នារី​របស់ខ្លួន​កំពុងតែ​សង្ឃឹម​ប្រជែង​បាន​មេដាយ​ល្អ​។​

​បើ​មើ​លពី​លទ្ធផល​នៃ​ការប្រកួត​ជម្រុះ​វិលជុំ គឺ​ក្រុម​បាល់បោះ​បុរស​វិទ្យាស្ថាន​ខេ​ម​អេ​ដ​បាន​យកឈ្នះ​២​ប្រកួត ដោយ​ប្រកួត​ឈ្នះ​ក្រុម​សាកលវិទ្យាល័យ​ភូមិន្ទ​ភ្នំពេញ នៅ​ប្រកួត​ទី​១ ដោយ​លទ្ធផល​បច្ចេកទេស​៩៦​ទល់​៥៨​និង​បន្ត​យកឈ្នះ​នៅ​ប្រកួត​ទី​២​លើ​ក្រុម​វិទ្យាស្ថាន​ផា​រ៉ា​ហ្គេម ក្នុង​លទ្ធផល ១០៩​ទល់​៦១​។​សម្រាប់​ក្រុម​បាល់បោះ​នារី​វិទ្យាស្ថាន​ខេ​ម​អេ​ដ​បាន​យកឈ្នះ​វិទ្យាស្ថាន​បច្ចេកវិទ្យា​កម្ពុជា ដោយ​លទ្ធផល ៣៨​ទល់​១៨ ។​

​តាម​ការបញ្ជាក់​ពី​មន្ត្រី​បច្ចេកទេស​នៃ​សហព័ន្ធ​កីឡាបាល់បោះ​កម្ពុជា​ដែល​សហការ​​រៀបចំ​ជាមួយ​ក្រសួង​អប់រំ​យុវជន និង​កីឡា​បាន​បញ្ជាក់ថា​ប្រភេទ​កីឡាបាល់បោះ​នេះ​ផ្នែក​បុរស​មាន​៦​ក្រុម​ចូលរួម​ខណៈ​ផ្នែក​នារី​មាន​៤​ក្រុម​។​ក្នុង​ផ្នែក​បុរស​និង​ផ្នែក​នារី​ត្រូវ​ប្រកួត​វិលជុំ​ចំនួន​១​ជុំ​យក​ចំណាត់ថ្នាក់​តែម្តង​។​

​នាយក​វិទ្យាស្ថាន​ខេ​ម​អេ​ដ (CamEd Business School) លោក ខេ​ស៊ី បា​ណេ​ត (Casey Barnett) មាន ប្រសាសន៍ថា សម្រាប់​ការចូលរួម​ប្រកួត​កីឡា​ឧ​ត្ត​ម​សិក្សា​ថ្នាក់​នេះ គឺ​វិទ្យាស្ថាន​ខេ​ម​អេ​ដ​ចូលរួម កីឡា​រួមមាន​៖ បាល់បោះ (​បុរស​-​នារី​) តេ​ក្វាន់​ដូ WT (​នារី​) ហែល​ទឹក (​បុរស​-​នារី​) វាយ​សី (​បុរស​-​នារី​) តេ​ក្វាន់​ដូ ITF (​បុរស​-​នារី​) កា​រ៉ា​តេ (​នារី​) អត្តពលកម្ម (​បុរស​-​នារី​) និង​វាយ​កូនឃ្លី​លើ​តុ (​បុរស​)​។​

​លោក​បញ្ជាក់ ថា កីឡាករ កីឡាការិនី ដែលជា​និស្សិត​របស់​ខេ​ម​អេ​ដ ចូលរួម​សរុប​មាន ចំនួន ៤៥​នាក់ ដោយ​ក្នុងនោះ​មាន​និស្សិត​នារី ២៣​នាក់ និង​បុរស ២២​នាក់​។ គិត​ម​ដល់​ថ្ងៃទី​២៤ ខែមិថុនា ឆ្នាំ​២០២២​នេះ និស្សិត​ខេ​ម​អេ​ដ​បានចាប់ផ្តើម​ការប្រកួត​ខាង​ប្រភេទ​កីឡាបាល់បោះ​ផ្នែក​នារី និង​បុរស ជាមួយនឹង​ក្តី​ស​ង្ឈឹ​ម​ខ្ពស់​ថា​នឹង​ដណ្តើមបាន​មេដាយ លើ​ប្រភេទ​កីឡាបាល់បោះ​នេះ​។​​សម្រាប់​ប្រភេទ​កីឡា​ផ្សេងៗ​ទៀត​បន្ទាប់ពី​ចាប់ឆ្នោត​ចែក​ពូ​ល​ថ្ងៃទី​២៥​មិថុនា​រួចរាល់​នោះ​ការប្រកួត​នឹង​ចាប់ផ្ដើម​ពីថ្ងៃ​ទី​២៦ ខែមិថុនា រហូតដល់​ថ្ងៃទី​២៩ ខែមិថុនា ឆ្នាំ​២០២២៕​