​ដោយៈ ទេ​ពក​ង្រី​/​កំពង់ឆ្នាំងៈ មនុស្ស​ពីរ​នាក់​បាន​ស្លាប់ និង​៦​នាក់​ផ្សេងទៀត បាន​រងរបួស​ធ្ងន់ និង​ស្រាល នៅក្នុង​ហេតុការណ៍​គ្រោះថ្នាក់​ចរាចរណ៍​រវាង​រថយន្ត​ធុន​ធំ​ដឹក​ត្រី​ពីរ​គ្រឿង​បុក​គ្នា​នៅលើ​កំណាត់​ផ្កូ​វ​ជាតិ​លេខ​៥ ចន្លោះ​បង្គោលគីឡូម៉ែត្រ​លេខ​៦៣ និង​៦៤ ស្ថិតក្នុង​ភូមិ​សូរ្យ​វង្ស ឃុំ​តា​ជេស ស្រុក​កំពង់ត្រឡាច ខេត្តកំពង់ឆ្នាំង នា​វេលា​ម៉ោង​៦:៥៧​នាទី​យប់​ថ្ងៃទី​២៥ ខែមិថុនា ឆ្នាំ​២០២២​។​

​សមត្ថកិច្ច​នគរបាល​ចរាចរណ៍​ផ្លូវគោក​ស្រុក​កំពង់ត្រឡាច​បានអោយដឹង​នៅ​កន្លែងកើតហេតុ​ថា រថយន្ត​រថយន្ត​ដឹក​ត្រី​ទាំងពីរ​គ្រឿង​នេះ​ធ្វើដំណើរ​ច្រាស់ទិស​គ្នា​ដែល​រថយន្ត​មួយគ្រឿង ម៉ាក FRONTER ពណ៌​ស ពាក់​ស្លាក​លេខ ភ្នំពេញ ២N ៤៩៤៤ បើកបរ​ដោយ​ឈ្មោះ សឿន រដ្ឋា ភេទ​ប្រុស អាយុ​៣៥​ឆ្នាំ ស្លាប់​នៅ​កន្លែងកើតហេតុ រស់នៅក្នុង​ភូមិ​ស្វាយ​ទោល ឃុំ​ជ្រៃ​កំពក ស្រុក​ព្រះស្តេច ខេត្តព្រៃវែង និង​មាន​អ្នករួមដំណើរ​ពីរ​នាក់ គឺ ឈ្មោះ ផាម យ៉ាំង​ផាម ភេទ​ស្រី ជនជាតិ​វៀតណាម (​ស្លាប់​) រស់នៅក្នុង​ភូមិ​ព្រែក​ល្វា ឃុំ​ពញ្ញាឮ ស្រុក​ពញ្ញាឮ ខេត្តកណ្ដាល និង​ម្នាក់ទៀត​មិន​ស្គាល់ឈ្មោះ​និង​អាសយដ្ឋាន​។​

​ដោយឡែក​រថយន្ត​ម្ខាង​ទៀត​ម៉ាក​ហ៊ីយ៉ាន់ដាយ ពណ៌​ស ពាក់​ស្លាក​លេខ កំពង់ឆ្នាំង ១A ១៤២៧ បើកបរ​ដោយ​ឈ្មោះ ធី ផា​រិ​ទ្ធ ភេទ​ប្រុស អាយុ​២៧​ឆ្នាំ ទីលំនៅ​ភូមិ​ចុង​កោះ សង្កាត់​ផ្សារឆ្នាំង ក្រុង​និង​ខេត្តកំពង់ឆ្នាំង ដោយមាន​មនុស្ស​៤​នាក់​រួម​ដំណើរ​រួមមាន​៖ ១.​ឈ្មោះ​ខាត់​សា​រុំ ភេទ​ប្រុស អាយុ​៣២​ឆ្នាំ​, ២.​ឈ្មោះ ជួប កុម្ភៈ ភេទ​ប្រុស អាយុ​៣៣​ឆ្នាំ​, ៣.​ឈ្មោះ​ធី ឆៃ​រិ​ទ្ធ ភេទ​ប្រុស អាយុ ២០​ឆ្នាំ និង​ម្នាក់​ផ្សេងទៀត​មិន​ស្គាល់​អត្តសញ្ញាណ​។​

​ក្រោយពេល​កើតហេតុ​អ្នកស្លាប់​ត្រូវបាន​សមត្ថកិច្ច​ធ្វើ​កំណត់ហេតុ​ប្រគល់​ឲ្យ​ទៅ​ក្រុមគ្រួសារ​សព​នាំយកទៅ​ធ្វើបុណ្យ​តាម​ប្រពៃណី​ដោយឡែក​អ្នករងរបួស​ធ្ងន់ និង​ស្រាល​ត្រូវបាន​សមត្ថកិច្ច​ហៅ​រថយន្ត​សាមុយ​របស់​មន្ទី​ពេទ្យ ដឹក​យកទៅ​សង្គ្រោះបន្ទាន់​នៅ​មន្ទីរពេទ្យបង្អែក​ស្រុក​កំពង់ត្រឡាច​ផងដែរ ។​

​ដោយឡែក​រថយន្ត​ទាំង ២ គ្រឿង​ត្រូវបាន​សមត្ថកិច្ច​នាំយក​មក​រក្សាទុក​នៅ​អធិការនគរបាល​ស្រុក​កំពង់ត្រឡាច​ដើម្បី​រង់ចាំ​ធ្វើការ​ដោះស្រាយ​តាម​នីតិវិធី ។​

​នៅក្នុង​ករណី​គ្រោះថ្នាក់​ចរាចរណ៍​ខាងលើនេះ​សមត្ថកិច្ច​នគរ​បាលច​រាចរ​ស្រុក​កំពង់ត្រឡាច​បានធ្វើការ​សន្និដ្ឋានថា​បណ្ដា​មកពី​កត្តា​មនុស្ស​បើកបរ​ក្នុង​ល្បឿន​លឿន ៕​