​ប្រែ​សម្រួលៈ​បំណង​(​ដេល្លី​ម៉េល​)៖ កាំជ្រួច​របស់​រុស្ស៊ី​បាន​ធ្លាក់ចំ​ប្លុក​អាគារ​មនុស្ស​រស់​នៅក្នុង​រដ្ឋធានី​គៀវ​កាលពីដើម​ថ្ងៃអាទិត្យ​ទី​២៦​មិថុនា ដោយ​បណ្តាលអោយ​របួស​មនុស្ស​ពីរ​នាក់ នេះ​បើ​តាម​ការ​​បញ្ជាក់​ពី​អភិបាល​ក្រុង​លោក វី​តា​លី​គ្លី​តស្កូ​។​

​គេ​ឮ​ការផ្ទុះ​ចំនួន​បួន​នៅ​ដើម​ថ្ងៃអាទិត្យ​នៅ​ប្រមាណ​កន្លះ​ម៉ោង​ក្រោយ​សឺ​រ៉ែ​ន​ព្រមាន​បាន​បន្លឺឡើង​នៅក្នុង​រដ្ឋធានី​ដែល​មិន​បាន​រង​ការបាញ់​ផ្លោង​និង​ការទម្លាក់​គ្រាប់បែក​ពី​រុស្ស៊ី​អស់​ពេល​ជិត​បី​សប្តាហ៍​។​

​អភិបាលក្រុង វី​តា​លី គ្លី​តស្កូ បាន​និយាយ​តាមតេ​ឡេ​ក្រាម​ថា «​មានការ​ផ្ទុះ​ជា​ច្រើន​នៅ​សង្កាត់​សេវ​ឆិន​គី​វស្គី​(Shevchenkivsky)​។​ឡានពេទ្យ​និង​អ្នក​ជួយ​សង្គ្រោះ​បាន​ទៅដល់​កន្លែងកើតហេតុ​ភ្លាម​​ៗ​។​ការងារ​ជួយ​សង្គ្រោះ​និង​ជម្លៀស​មនុស្ស​កំពុង​ធ្វើ​នៅ​អាគារ​ចំនួន​ពីរ »​។​

​ផ្សែងហុយ​ក្រោយ​ការផ្ទុះ​នៅ​ទីក្រុង​គៀវ​កាលពី​ថ្ងៃ​៥​មិថុនា ឆ្នាំ​២០២២

​លោកគ្លី​តស្កូ ដែល​បាន​ចុះ​ទៅដល់​កន្លែងកើតហេតុ​បាន​និយាយថា «​មាន​មនុស្ស​កប់​នៅ​ក្រោម​គំនរ​បាក់បែក​។​អ្នកខ្លះ​ទៀត​ត្រូវបាន​ជម្លៀស និង​មនុស្ស​របួស​ពីរ​នាក់​ត្រូវបាន​បញ្ជូន​ទៅកាន់​មន្ទីរពេទ្យ​»​។​

​លោកគ្លី​តស្កូ​បាន​បន្ថែមថា វា​ជា​ការវាយប្រហារ​ដោយ​កាំជ្រួច​រុស្ស៊ី​មួយ​ដែល​មាន​បំណង​បំភិតបំភ័យ​ជនជាតិ​អ៊ុយ​ក្រែន​នៅ​មុន​ជំនួប​កំពូល​របស់​របស់​អង្គការ​ណា​តូ​នៅ​ទីក្រុង​ម៉ា​ឌ្រី​ដ​ចាប់ពី​ថ្ងៃ​២៨​ដល់​៣០​មិថុនា​។​

​មន្ត្រី​អ៊ុយ​ក្រែន​ម្នាក់​បាន​និយាយថា រុស្ស៊ី​បាន​បាញ់​កាំជ្រួច​១៤​ដើម​ដាក់​ទីក្រុង​គៀវ​និង​តំបន់​គៀវ​កាលពី​ព្រឹក​ថ្ងៃអាទិត្យ​៕

អ្នកពន្លត់អគ្គិភ័យធ្វើការនៅអាគារមនុស្សស្នាក់នៅដែលរងការវាយប្រហារដោយកាំជ្រួចរុស្ស៊ីកាលពីថ្ងៃ២៦មិថុនា