ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ពេល​ចាប់ផ្តើម​កិច្ចប្រជុំ​G7​ក្រុម​ប្រទេស​មាន​ឧស្សាហកម្ម​ជឿនលឿន​លើ​ពិភពលោក​ទាំង​ប្រាំពីរ​កាលពី​ថ្ងៃអាទិត្យ​ទី​២៦​មិថុនា​បាន​យល់ព្រម​ហាមឃាត់​ការ​​នាំចូល​មាស​ពី​ប្រទេស​រុស្ស៊ី ក្នុង​គោលបំណង​ចាត់​វិធានការ​ថ្មី​ដើម្បី​កម្ទេច​ធនធាន​សម្រាប់​ធ្វើ​សង្គ្រាម​របស់​ទីក្រុង​មូ​ស្គូ​និង​ពង្រឹង​ការការពារ​របស់​អ៊ុ​យក្រែន​។​

​ប្រធានាធិបតី​អាម៉េរិក​លោក ចូ បៃ​ដិន និង​សម​ភាគី​របស់​លោក​មក​ពី​ប្រទេស​ឧស្សាហកម្ម​រីកចម្រើន​បំផុត​របស់​ពិភពលោក កំពុង​ជួបជុំគ្នា​នៅ​ប្រាសាទ​អែល​មូ (Elmau)​ក្នុង​តំបន់ភ្នំ​អាល់​​របស់​អាល្លឺម៉ង់ មុន​ពេល​ពួកគេ​បន្តដំណើរ​ទៅ​កាន់​ទីក្រុង​ម៉ា​ឌ្រី​ដ (Madrid)​ដើម្បី​ពិភាក្សា​ជាមួយ​ដៃគូ​របស់​អង្គការ​ណា​តូ​។​

​មេដឹកនាំ​ទាំងអស់នេះ​កំពុង​ព្យាយាម​រួបរួម​គ្នា​សម្រាប់​អ៊ុយ​ក្រែន​ប្រឆាំងនឹង​ការលុកលុ​យរបស់​រុស្ស៊ី​ខណៈ​កំពុង​ប្រឈមមុខ​នឹង​ផលវិបាក​ជា​សកល​ខ្លាំង​ឡើង​ពី​សង្គ្រាម​នេះ​។​

​លោកបៃ​ដិនបាន​ប្រាប់​អធិការ​ប​តី​អាល្លឺម៉ង់​លោក អូ​ឡា​ហ្វ ស្កូ​ល (Olaf Scholz) ដែល​ជា​ម្ចាស់ផ្ទះ​នៃ​កិច្ចប្រជុំ​រយៈពេល​បី​ថ្ងៃនេះ​ថា “​ពួក​យើង​ត្រូវតែ​រួបរួមគ្នា​”​។​

​លោកបៃ​ដិ​ននិយាយថា “​ប្រធានាធិបតី​រុស្ស៊ី វ្ល៉ា​ឌី​មៀ ពូ​ទីន សង្ឃឹម​យ៉ាង​មុតមាំ​ថា ណា​តូ​និង​ក្រុម G7 នឹង​បែកបាក់​គ្នា​។ ប៉ុន្តែ​យើង​មិន​បាន​បែកបាក់​គ្នា​ទេ ហើយ​យើង​នឹង​មិន​បែកបាក់​នោះឡើយ​”​។​

​លោក​ស្កូល​ក៏​បាន​សាទរ​ផងដែរ​ចំពោះ​ការរួបរួម​របស់​លោក​ខាងលិច ដែល​គាត់​និយាយថា “​ពូ​ទីន​មិន​ដែល​រំពឹង​អ៊ីចឹង​នោះទេ​” ដោយ​បន្ថែម​ថា សមាជិក​នីមួយៗ​នៃ​ក្រុម G7″​ត្រូវ​ចែករំលែក​ការទទួល​​ខុស​ត្រូវ​” ដើម្បី​តតាំង​នឹង​បញ្ហា​ប្រឈម​ខ្លាំង​ឡើង ដែល​បង្កឡើង​ដោយ​សង្គ្រាម​។​

​សេចក្តីថ្លែងការណ៍​រួម​នេះ​បាន​កើតឡើង​ខណៈ​រុស្ស៊ី​បាន​បន្ត​ការវាយប្រហារ​លើ​ក្រុង​គៀវ​ជា​លើក​ដំបូង​ក្នុង​រយៈពេល​បី​សប្តាហ៍ ដែល​ការវាយប្រហារ​នេះ​ត្រូវបាន​លោកបៃ​ដិន​ថ្កោលទោស​ថា​ជា “​អំពើ​ព្រៃផ្សៃ​ខ្លាំង​ឡើង​របស់​ពួកគេ​”​។​

​ក្រឡេក​ទៅ​មើល​ក្នុង​កិច្ចប្រជុំ​កំពូល​នេះ រដ្ឋមន្ត្រីការបរទេស​អ៊ុ​យក្រែន លោក ឌី​មីត្រូ គូ​ឡេ​បា (Dmytro Kuleba)​បាន​ជំរុញ​ឱ្យ​ក្រុម G7​អនុម័ត​ទណ្ឌកម្ម​បន្ថែម​លើ​ទីក្រុង​មូ​ស្គូ​និង​ផ្តល់​អាវុធ​ធុន​ធ្ងន់​​បន្ថែម​ទៀត​សម្រាប់​អ៊ុ​យក្រែន ដើម្បី​កម្ចាត់ “​ចក្រពត្តិនិយម​ដែល​ឈឺ​របស់​រុស្ស៊ី​”​។​

​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី នឹង​ធ្វើការ​អង្វរ​ដូចគ្នានេះដែរ​នៅ​ពេល​លោក​ចូលរួម​កិច្ចប្រជុំ​តាម​វីដេអូ​នៅ​ថ្ងៃ​ចន្ទ​នេះ​។​

​រាប់​ចាប់ពី​អតិផរណា​ខ្ពស់​រហូតដល់​វិបត្តិ​ស្បៀងអាហារ​និង​កង្វះ​ថាមពល ការ​លុកលុយ​របស់​រុស្ស៊ី​លើ​អ៊ុ​យក្រែន ដែល​ឥឡូវ​ឈាន​ដល់​ខែ​ទី​ប្រាំ​របស់​ខ្លួន បានធ្វើឱ្យ​ពិភពលោក​មាន​វិបត្តិ​ជា​បន្តបន្ទាប់​។​

​មេដឹកនាំ G7 ក៏​កំពុង​ប្រឈម​មុខ​នឹង​ការគំរាមកំហែង​នៃ​ការធ្លាក់​ចុះ​សេដ្ឋកិច្ច​ក៏​ដូច​ជា​សម្ពាធ​ជុំវិញ​បម្រែបម្រួល​អាកាសធាតុ​ផងដែរ​។​

​ដោយ​ស្វះស្វែង​បង្កើន​កម្តៅ​លើ​ទីក្រុង​មូ​ស្គូ ក្រុម​ប្រទេស G7 បាន​ប្រកាសថា​ខ្លួន​នឹង​ហាមឃាត់​ការនាំ​ចូល​មាស​របស់​រុស្ស៊ី​។​សហរដ្ឋ​អាម៉េរិក​បាន​និយាយថា​មាស​គឺជា​ការនាំ​ចេញ​ដ៏​ធំ​ទី​ពីរ​សម្រាប់​រុស្ស៊ី​និង​ជា​​ប្រភព​ចំណូល​ដ៏​សំខាន់​សម្រាប់​លោកពូ​ទី​ន​និង​សម្ពន្ធមិត្ត​របស់គាត់​៕

​មេដឹកនាំ G7 យល់ព្រម​ហាមឃាត់​ការនាំ​ចូល​មាស​ពី​រុស្ស៊ី