ដោយៈ បញ្ញា​សាស្ត្រ / ភ្នំពេញៈ អតីត​តារាចម្រៀង Rock ម៉ូ​លីកា ធ្លាប់បាន​អះ អាង​ថាៈ នៅពេលដែល​ស្ថានភាព​កូ​វីដ ១៩ ស្ងប់ស្ងាត់ នាង​នឹងធ្វើ​ពិធី​ឡើងផ្ទះ​វីឡា​ថ្មី ផ្គួប​ជាមួយ ខួបកំណើត​កូនស្រី សំណព្វចិត្ត​របស់​នាង ឥឡូវ ពេលនេះ អ្នកលក់ Online ល្បីឈ្មោះ​រូបនេះ បាន​ត្រៀម​រួចជាស្រេច ក្នុង​ការរៀបចំ​កម្មវិធី ខាងលើនេះ ដែល​នឹង​រៀបចំ​ពិធីជប់លៀង​ធំ ដល់​ទៅ ១០០ តុ ឯណោះ នៅ​ថ្ងៃទី​៧ ខែកក្កដា ឆ្នាំ​២០២២ ខាងមុខនេះ​។​

​តាម​ការ​បង្ហើប​របស់ ម៉ូ​លីកា ភ្ញៀវ​ដែល​នាង​បាន​អញ្ជើញ​នោះ មាន​លោកស្រី ហ៊ុន ស៊ី​ណាត និង​តារា​ធ្លាប់​រួម​អាជីព ព្រមទាំង​អ្នកលក់ Online រួមទាំង​ដៃគូ​សហការ រកស៊ី​ជាមួយ​នាង​ទាំង អស់​។ ប៉ុន្ដែ​ការត្រៀម​ចំណាយលុយ អស់​ប៉ុន្មាន​នោះ មិនត្រូវ​បាន​ម៉ូ​លីកា ប្រាប់​ជាមុន​ឡើយ ដោយ​នាង​ថា នឹង​រៀបចំ​កម្មវិធី​នោះ ទៅតាម​សភាព​ជាក់ស្ដែង​។

​តែ​អ្វីដែល​គូរ​ឲ្យ​ចាប់អារម្មណ៍​នោះ ថៅកែ​ស្រី ហាង​អិន​ខេ ម៉ូ​លីកា ប៊ី​យូ​ធី ត្រេ​ឌី​ង .​ឯ​.​ក រូបនេះ បាន​ទិញ​រថយន្ដ ១​គ្រឿង​ដ៍​ថ្មី​សន្លាង ម៉ាក Jaguar កាដូ​ឲ្យ​កូនស្រី​នាង ឈ្មោះ នុ​ណ ច័ន្ទ​ម៉ូ​នី​តា សម្រាប់​ខួប​គម្រប់ ២ ឆ្នាំនេះ​។ នេះ​ជាការ​បន្ថែម​រថយន្ដ ទំនើប ១​គ្រឿង​ផ្សេងទៀត ខណៈដែល​កន្លងមក គេ​ឃើញ​ម៉ូ​លីកា ជិះ​រថយន្ដ​ម៉ាក ទំនើបៗ ដូចជា Ford Raptor , Range Rover និង Alphard ជាដើម​។​

​សូម​រំលឹកថា ម៉ូ​លីកា បាន​ដឹក​ដៃ​តារា​សម្ដែង​លោក ហុង មា​នុ​ណ ហៅ ឆា​នុ​ន រៀបការ កាលពី​ថ្ងៃទី​១៨ ខែមករា ឆ្នាំ​២០២០ និង​បាន​សម្រាល​កូនស្រី នៅ​ថ្ងៃទី​៥ ខែកក្កដា ឆ្នាំ​២០២០​។ ដោយសារតែ​មានការ​ម​ហា​ញឹក ក្នុង​អាជីវកម្ម​ផ្ទាល់ខ្លួន ម៉ូ​លីកា បាន​ផ្អាក​ឡើង​ច្រៀង សម្ដែង​តាម​បណ្ដា​ឆាក​តន្ដ្រី​ទាំងឡាយ រយៈពេល ជាច្រើន​ខែ​មកហើយ ខណៈដែល​ស្វាមី​នាង លោក ឆា​នុ​ណ វិញ ក៍​មិនសូវមាន ពេល​ថត​ភាពយន្ដ ដូច​មុន​ទៀត​ដែរ​។ គូស្នេហ៍​តារា ១​គូ​នេះ ត្រូវបាន​គេ​សរសើរ ពី​ជីវភាព​របស់​ពួកគេ​ថា ធូ​ធារ​ខ្លាំង ក្រោយ​ចាប់ដៃគ្នា ជាង ២ ឆ្នាំនេះ ដោយ ពេលនេះ មានផ្ទះ​យ៉ាង​ប្រណិត និង​ជិះ​រថយន្ដ​ទំនើបៗ ខណៈដែល​អ្នក​ទាំងពីរ ក៏​តែងតែបាន​លេចមុខ ធ្វើ​កម្មវិធី​សប្បុរសធម៌ ជា​បន្ដបន្ទាប់​ផងដែរ តាមរយៈ​ការ ផ្ដល់ជំនួយ ដល់​តារា​ចាស់ជរា​គ្មាន​ទីពឹង និង​ជនទីទ័លក្រ មួយចំនួន​។​

​ដោយឡែក ទាក់ទង​គម្រោង​យក​កូន​ថែម​វិញ ម៉ូ​លីកា ធ្លាប់​វាចា​ថា នាង​មិនទាន់ គិតគូរ ក្នុងពេល​ឆាប់ៗ​នេះឡើយ ព្រោះ​ក្រោយពី​កូ​វីដ ថមថយ​ទៅវិញ​នេះ អាជីវកម្ម តាម Online របស់​នាង មាន​សន្ទុះ​ខ្លាំងក្លា​វិញ ទើប​ពិតជា​មមាញឹក ជាមួយ​ការងារ ផ្ទាល់ខ្លួន​នោះ មិនអាច​ដកឃ្លា ឬ​គិតគូ​រឿង​យក​កូន​ទី​២ នោះទេ​៕/V​-PC