​ប្រែ​សម្រួលៈ​បំណង​(​ដេល្លី​ម៉េល​)៖ រុស្ស៊ី​ទំនងជា​មិន​មាន​លទ្ធភាព​សងបំណុល​ជា​លើកដំបូង​ក្នុង​រយៈពេល​ប៉ុន្មាន​ទសវត្សរ៍​មក​នេះ នៅ​ពេល​ម្ចាស់​មូល​ប​ត្រ​ខ្លះ​បាន​និយាយថា ពួកគេ​មិន​បាន​ទទួល​ការ​​ប្រាក់​ដែល​រដ្ឋ​ត្រូវ​បង់​អោយ​ខ្លួន ខណៈ​ដែល​ឥឡូវ​នៅ​កាលពី​ថ្ងៃ​ចន្ទ​ទី​២៧​មិថុនា​វា​ហួស​កាលកំណត់​ត្រូវ​បង់​មួយថ្ងៃ​។​

​រុស្ស៊ី​កំពុង​ខិតខំ​យ៉ាង​ត្រដាបត្រដួស​ដើម្បី​សង​មូល​ប​ត្រ​ចំនួន​៤០​ពាន់​លាន​ដុល្លារ​របស់​ខ្លួន ចាប់តាំងពី​ខ្លួន​បើក​ប្រតិបត្តិការ​សឹក​ចូល​អ៊ុយ​ក្រែន​កាលពី​ថ្ងៃ​២៤​មិថុនា ខណៈ​ការដាក់ទណ្ឌកម្ម​ទូទៅ​នាំអោយ​​ប្រទេស​នេះ​កាត់​ផ្តាច់ចេញ​ពី​ប្រព័ន្ធ​ហិរញ្ញវត្ថុ​សកល និង​រារាំង​មិន​អោយ​វិនិយោគិន​ជាច្រើន​ប្រើប្រាស់​ទ្រព្យធន​រុស្ស៊ី​។​

​រដ្ឋាភិបាល​វិមាន​ក្រឹម​ឡាំង​បាន​និយាយ​ម្តង​ហើយ​ម្តងទៀត​ថា គ្មាន​ហេតុផល​ដែល​រុស្ស៊ី​មិន​មាន​លទ្ធភាព​សងបំណុល​ទេ តែ​ពេល​នេះ​ខ្លួន​មិន​អាច​បញ្ជូន​លុយ​ទៅ​កាន់​ម្ចាស់បំណុល​ដោយសារតែ​ទណ្ឌកម្ម​។​​រដ្ឋាភិបាល​ទីក្រុង​មូ​ស្គូ​ចោទប្រកាន់​លោក​ខាងលិ​ច​ថា កំពុង​ព្យាយាម​រុញ​ខ្លួន​អោយ​ធ្លាក់​ចូល​ក្នុង​ស្ថានភាព​មិន​អាច​សងបំណុល​បាន​បែប​សិប្បនិម្មិត​។​

​កិច្ចខិតខំ​របស់​រុស្ស៊ី​ដើម្បី​ជៀសវាង​អ្វី​ដែល​អាច​ជា​ការ​មិន​អាច​សងបំណុល​បរទេស​ជា​លើកដំបូង​ចាប់តាំងពី​បដិវត្តន៍​បុល​សេ​វិក​(Bolshevik)​កាលពី​ជាង​មួយ​សតវត្សរ៍​មុន​មិន​បាន​ជោគជ័យ​ទេ​កាលពី​​ចុងខែ​ឧសភា​នៅពេល​ការិយាល័យ​ទ្រព្យសម្បត្តិ​បរទេស​នៃ​ក្រសួង​រតនាគារ​អាម៉េរិក​បិទ​ខ្ទប់​រដ្ឋាភិបាល​ទីក្រុង​មូ​ស្គូ​មិនអោយ​ធ្វើ​ការទូទាត់​សង​បាន​។​

តាមពិត ​ការ​មិន​មាន​លទ្ធភាព​សងបំណុល​វា​គ្រាន់តែ​ធ្វើអោយ​រុស្ស៊ី​មិន​អាច​ខ្ចី​ប្រាក់​ជា​អន្តរជាតិ​នៅពេលនេះ និង​វា​ក៏​មិន​សំខាន់​ដែរ​ព្រោះរដ្ឋាភិបាលទីក្រុងមូស្គូមាន​ចំណូល​ដ៏​ក្រាស់ក្រែល​ពី​ប្រេង​និង​ហ្គាស​។​

​ក្រសួង​ហិរញ្ញវត្ថុ​រុស្ស៊ី​បាន​និយាយថា ខ្លួន​បាន​សង​ម្ចាស់បំណុល​រួចរាល់​អស់ហើយ​ជា​ប្រាក់​អឺរ៉ូ​និង​ដុល្លារ តែ​ប្រភព​ព័ត៌មាន​បាន​និយាយថា ម្ចាស់​មូលប​ត្រ​ខ្លះ​មិន​បាន​ទទួល​ប្រាក់​ទេ​កាលពី​ថ្ងៃ​ចន្ទ​៕