ដោយៈ​ ប​.​ខុន​/ភ្នំពេញ: ទឹក​បឹង​ទន្លេសាប​បាន​ស្រក​ចុះ​បន្តិច​ទៅវិញ​បន្ទាប់ពី​បាន​ងើប​ឡើងដល់​កម្រិត​២,១៤​ម៉ែត្រ​កាលពី​ថ្ងៃទី​១៧​ខែមិថុនា ក្នុងពេល​ទឹកទន្លេ​មេគង្គ​បាន​ងើប​ឡើងដល់​កម្រិត​៣,៨៦​ម៉ែត្រ។ កាលពី​ថ្ងៃទី​៧​ខែមិថុនា ហើយ​គេ​រំពឹងថា​ទឹកទន្លេ​នេះ​វា​នឹង​ហក់​ឡើង​មកវិញ​នៅ​ដើមខែ​កក្កដា​ខាងមុខ​។​

លោក ​ម៉ៅ ហាក់ អនុប្រធាន​អាជ្ញាធ​ឬ​ទន្លេសាប​និង​ជា​មន្ត្រី​របប​ជលសា​ស្ត្រ​នៃ​ក្រសួង​ធនធានទឹក​និង​ឧតុនិយម​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​២៧​ខែមិថុនា​ឆ្នាំ ២០២២​ថា​ ​ទឹក​បឹង​ទន្លេសាប​ដែល​បាន​ងើបឡើង​លឿន​នៅ​ដើមរដូវ​វស្សា​កន្លងទៅ​នោះ ប៉ុន្មាន​ថ្ងៃនេះ​បាន​ស្រក​ចុះ​បន្តិច​ទៅវិញ​តែ​វា​មិនបាន​ហូរ​ចេញពី​បឹង​ទន្លេសាប​នោះទេ គឺ​វា​ស្រក​ដោយសារ​ការហូរ​ចូលទៅ​កាន់​បឹង​និង​ព្រែក​នៅតាម​ដង​ទន្លេសាប ខណៈពេល​ទឹកទន្លេ​មេគង្គ​បាន​ស្រក​ទៅវិញ​នៅ​គ្រប់​ស្ថានីយ​ដែរនោះ​រួចមក​។​

លោក ​ម៉ៅ ហាក់ បាន​និយាយ​ដោយ​រំពឹងថា​នៅ​ដើមខែ​កក្កដា​ខាងមុខនេះ ទឹកទន្លេ​មេគង្គ​នឹង​ចាប់ផ្តើម​ងើបឡើង​មកវិញ​ក្រោយពី​ឃើញ​មាន​សញ្ញា​ភ្លៀង​ធ្លាក់​ច្រើន​នៅ​តំបន់​អាង ទន្លេមេគង្គ​លើ​នៅ​ប៉ុន្មាន​ថ្ងៃ​ខាងមុខ ដោយសារ​បាតុភូត​កើតមាន​នៅក្នុង​សមុទ្រ​ចិន​ខាងត្បូង​។ ទឹក​បឹង​ទន្លេសាប​ក៏​នឹង​ងើបឡើង​បន្តទៀត​នៅពេល​ទឹកទន្លេ​មេគង្គ ចាប់ផ្តើម​ហក់​ឡើង​លើក​ទី​១​នៅក្នុង​ខែកក្កដា​នោះ​។​

​ទឹក​បឹង​ទន្លេសាប​នៅ​ស្ថានីយ​ជលសា​ស្ត្រ​ក្រគរ កំពង់​ហ្លួង​ថ្ងៃទី​២៧​ខែមិថុនា​បាន​ស្រក​មក​នៅត្រឹម​ក​ម្ព​ស់​២,០៧​ម៉ែត្រ បន្ទាប់ពី​បាន​ឡើងដល់​កម្រិត​កម្ពស់​២,១៤​ម៉ែត្រ កាលពី​ថ្ងៃទី​១៧​ខែមិថុនា​។ ឯ​ទឹកទន្លេ​មេគង្គ​នៅ​ស្ថានីយ​ជលសា​ស្ត្រ​ទន្លេបាសាក់​ចតុមុខ​បាន​ស្រក​មក​នៅត្រឹម​កម្ពស់​៣,៣៤​ម៉ែត្រ បន្ទាប់ពី​បាន​ឡើងដល់​កម្ពស់​៣,៨៧​កាលពី​ថ្ងៃទី​៧​ខែមិថុនា​។​

​ក្រសួង​ធនធានទឹក​និង​ឧតុនិយម​កាលពី​ថ្ងៃទី​២៣​ខែឧសភា​បាន​ជូន​ដម​ណឹ​ង​ស្តីពី​ការព្យាករ​កម្ពស់​ទឹកជំនន់​ទន្លេមេគង្គ​លើក​ទី​១​ប្រចាំឆ្នាំ​២០២២​ថា​ទឹកទន្លេ​មេគង្គ​នៅ​ស្ថានីយ​ជល​សាស្ត្រ​ទន្លេ បាសាក់​ចតុមុខ អាច​នឹង​ឡើងដល់​កម្ពស់​៩,៦៥​ម៉ែត្រ​ចាត់ទុកជា ប្រភេទ​ជំនន់​មធ្យម​៕​សរន