​ដោយៈ ប​.​ជ័យ / បន្ទាយ​មាន​ជ័​យៈ ដោយសារ​តែមាន​ជីវភាព​ក្រ ស្ត្រី​ម្នាក់ បាន​ដើរ​រើស​ខ្យង ដើម្បី​ដោះ​ទ័ល​ជីវភាព​ប្រចាំថ្ងៃ ទាំង​មាន​ផ្ទៃពោះ ជិត​គ្រប់​ខែ ហើយ​បាន​ជួប​គ្រោះអាក្រក់ មួយទៀត គឺ​ត្រូវ​រន្ទះបាញ់​ស្លាប់ ទាំង​ម្តាយ ទាំង​កូន​ក្នុង​ផ្ទៃ ដោយ​បន្សល់ទុក​សមាជិកគ្រួសា​រ ៨ នាក់ នៅក្នុង​បន្ទុក​។ ឧបទ្ទវហេតុ​នោះ បានកើត​ឡើង កាលពី​ថ្ងៃទី​២៦ ខែមិថុនា ឆ្នាំ​២០២២ វេលា​ម៉ោង ៤ និង​២០ រសៀល នៅ​ភូមិ​សន្តិភាព ឃុំ​ទួល​ពង្រ ស្រុក​ម៉ាឡៃ ខេត្តបន្ទាយមានជ័យ​។​

​សមត្ថកិច្ច​មូលដ្ឋាន បានឱ្យដឹងថា នៅពេល​កំពុង​អង្គុយ​ចាក់​ខ្យង នៅ​នៅក្បែ​ផ្ទះ ស្ត្រី​រងគ្រោះ ឈ្មោះ បាន លី អាយុ ៤៤ ឆ្នាំ (​មាន​ផ្ទៃពោះ​៨​ខែ​) បាន​ត្រូវ​រន្ទះបាញ់ ពេល​មេឃ​ជិត​ភ្លៀង ។ ក្នុងពេលនោះ អ្នក​ជួយសង្គ្រោះ បាន​ព្យាយាម​បញ្ជូន​ជន​គ្រោះ មក​មណ្ឌល​សុខភាព ឃុំ​ទួល​ពង្រ ប៉ុន្តែ​ជនរងគ្រោះ បាន​ស្លាប់​បាត់ទៅហើយ ។​.

​ទទួលបាន​ដំណឹង​នេះ លោក ស្ដុក លីម បេក្ខជន​មេឃុំ​ទួល​ពង្រ មកពី​គណបក្ស​ប្រជាជន កម្ពុជា និង​ក្រុមការងារ បាន​ចុះទៅ ជួប​ក្រុមគ្រួសារ​ជនរងគ្រោះ នៅ​មណ្ឌល​សុខភាព ហើយ​បានផ្តល់​ថវិកា មួយចំនួន សម្រាប​ធ្វើបុណ្យ ហើយ​បាន​អំពាវនាវ សូមឱ្យ​សប្បុរសជន មេត្តាជួយ​ក្រុមគ្រួសារ​ស្ត្រី​ទុរគត នេះ បន្ត​ផង​៕/V​