​ប្រែ​សម្រួលៈ​បំណង​(ST)៖​កាំជ្រួច​រុស្ស៊ី​ពីរ​គ្រាប់​បាន​ធ្លាក់​ចូល​ផ្សារ​មាន​មនុស្ស​ណែនណាន់​មួយ​នៅ​ទីក្រុងក្រេ​មិន​ឈុ​ក​(Kremenchuk)​របស់​អ៊ុយ​ក្រែ​នភាគ​កណ្តាល​កាលពី​ថ្ងៃ​ចន្ទ​ទី​២៧​មិថុនា ដោយបាន​​សម្លាប់​មនុស្ស​យ៉ាង​តិច​១៣​នាក់ និង​របួស​៥០​នាក់ នេះ​បើ​តាម​ការបញ្ជាក់​អះអាង​របស់​អភិបាល​តំបន់​របស់​អ៊ុ​យក្រែន​។​

​ប្រធានាធិបតី វ៉ូ​ឡូ​ឌី​មៀ ហ្សេ​ឡេ​ស្គី បាន​និយាយថា​មនុស្ស​ជាង​១.០០០​នាក់​បាន​ស្ថិតនៅក្នុង​ផ្សារ​ទំនើប​នេះចំ​ពេល​វា​រង​ការវាយប្រហារ ដែល​សាក្សី​បាន​និយាយថា​វា​បណ្តា​អោយ​មាន​អគ្គិភ័យ​ដ៏​ធំ​មួ​យ​និង​​បាន​បញ្ជូន​ផ្សែងខ្មៅ​ចូល​ក្នុង​អាកាស​។​

​អ្នកយក​ព័ត៌មាន​អោយ​ទីភ្នាក់ងារ​សារព័ត៌មាន​រ៉​យ​ទ័របាន​ឃើញ​សំបក​ហាង​ទំនិញ​ឆេះ​ខ្លោច​ជាមួយនឹង​ដំបូលរ​ហែក​ដាច់ នៅ​ពេល​អ្នក​ពន្លត់ភ្លើង​និង​ទាហាន​ទាញ​បំណែក​ដែក​ចេញ​ដើម្បី​ស្វែងរក​ជន​រង​​គ្រោះ​។​

​ប្រធានាធិបតី ហ្សេ​លេន​ស្គី បាន​និយាយ​ក្នុងតេឡេ​ក្រាម​ថា «​សូម្បី​ស្រមៃ​ក៏​នឹង​មិន​ស្មាន​ដល់​…​គ្មាន​សង្ឃឹមថា​នឹង​ទទួលបាន​សុជីវធម៌​និង​មនុស្សធម៌​ពី​រុស្ស៊ី​ទេ​»​។​

​ឌី​មីត្រូ លូ​នី​ន​(Dmytro Lunin)​អភិបាល​តំបន់​ប៉ុល​ត្រា​វ៉ា​(Poltava)​ភាគ​កណ្តាលបាន​សរសេរ​បង្ហោះ​ក្នុងតេឡេ​ក្រាម​ថា មនុស្ស​១៣​នាក់​ត្រូវ​បាន​បញ្ជាក់​ថា​ស្លាប់​ដោយ​ការវាយប្រហារ​នេះ តែ​ចំនួន​​ស្លាប់​អាច​កើន​ឡើង​ដោយសារតែ​អ្នក​ជួយ​សង្គ្រោះ​កំពុង​ស្វែងរក​ក្នុង​គំនរ​បាក់បែកនៅឡើយ​»​។​

​លោក​ក៏​បាន​បន្ថែមថា មនុស្ស​២១​នាក់​ត្រូវបាន​នាំ​ទៅកាន់​មន្ទីរពេទ្យ និង​២៩​នាក់​ទៀត​ទទួល​ជំនួយ​បឋម​។​«​វា​ជា​អំពើ​ភេរវកម្ម​ប្រឆាំង​ជន​ស៊ីវិល ដោយសារ​មិន​មាន​ទីតាំង​យោធា​នៅ​ក្បែរៗ​នោះ​ដែល​​សម​នឹង​រុស្ស៊ី​វាយប្រហារ​»​។​

ចំណែក​បញ្ជាក​ង​កម្លាំ​អាកា​សអ៊ុយ​ក្រែន​បាន​និយាយថា ផ្សារ​នេះ​រង​ការវាយប្រហារ​ដោយ​កាំជ្រួច​ចម្ងាយ​ឆ្ងាយ​X-22​ពី​គ្រាប់​ចេញពី​យន្តហោះ​ទម្លាក់​គ្រាប់បែក​Tu-22M3​ដែល​ហោះ​ចេញ​ពី​មូលដ្ឋាន​ទ័ពអាកាស​​សាត​កូវ​កា​(Shaykovka)​នៅ​តំបន់​កា​លូ​ហ្កា​(Kaluga)​របស់​រុស្ស៊ី​។​

​ទោះជា​យ៉ាងណា​ឯកអគ្គរដ្ឋទូត​រងរ​បស់​រុស្ស៊ី​ប្រចាំ​អង្គការ​សហប្រជាជាតិ លោក​ឌី​មី​ទ្រី ប៉ូ​លី​យ៉ាន​ស្គីយ​(Dmitry Polyanskiy) បាន​សរសេរ​បង្ហោះ​ថា​ការវាយប្រហារ​នេះ​ជាការ​«​បង្ក​រឿង​របស់​អ៊ុយ​​ក្រែន​»​ខ្លួនឯង​។​លោក​ថា របប​ទីក្រុង​គៀវ​ចង់អោយ​គេ​ចាប់អារម្មណ៍​អ៊ុយ​ក្រែន​នៅ​មុន​ជំនួប​កំពូល​អង្គការ​ណា​តូ​​ដែល​នឹង​ចាប់ផ្តើម​នៅ​ថ្ងៃ​អង្គារ​នៅអេ​ស្ប៉ាញ​។​

​តែ​លោក វ៉ា​ឌី​ម ដេនី​សេន​កូ​(Vadym Denysenko)​ទីប្រឹក្សា​ក្រសួង​មហាផ្ទៃ​អ៊ុ​យក្រែន បាន​និយាយថា រុស្ស៊ី​មាន​ហេតុផល​បី​សំរាប់​ការវាយប្រហារ​នេះ មួយ​ដើម្បី​បំភិតបំភ័យ ទី​ពីរ​បំផ្លា​ហេដ្ឋារចនាសម្ពន្ធ​​និង​ទី​បី បង្ខំ​អោយ​លោកខាងលិចចូលតុ​ចរចា​ជាថ្មី​។​

​អគ្គលេខា​ង​អង្គការ​ណា​តូ​បាន​និយាយ​កាលពី​ថ្ងៃ​ចន្ទ​ថា ជំនួប​កំពូល​នេះ​នឹង​បន្ថែម​ជំនួយ​ថ្មី​ដល់​អ៊ុយ​ក្រែន​លើ​វិស័យ​ដូចជា ទូរគមនាគមន៍ និង​ប្រព័ន្ធ​ប្រឆាំង​ដ្រូ​ន រួម​ទាំង​ប្រេងឥន្ធនៈ​។​

​សូមបញ្ជាក់​ថា រុស្ស៊ី​ដែល​បាន​ចាប់យក​ទីក្រុងស៊ី​វី​រ៉ូ​ដូណិត​សខ៍ក្រោ​យ​ការឡោមព័ទ្ធ​វាយប្រហា​រអស់​ជាច្រើន​សប្តាហ៍ បាន​បង្កើន​ការវាយប្រហារ​ដោយ​កាំជ្រួច​នៅ​ទូទាំង​អ៊ុយ​ក្រែន​នៅ​ប៉ុន្មាន​ថ្ងៃ​ចុងក្រោយ​​នេះ​៕

​អ្នក​ជួយ​សង្គ្រោះ​នៅ​កន្លែង​រង​ការវាយប្រហារ​ដោយ​កាំជ្រួច​នៅ​ផ្សារ​មួយ​ក្នុង​ក្រុង ក្រេ​មិន​ឈុ​ក កាលពី​ថ្ងៃ​២៧​មិថុនា​