​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមមន្ត្រី​បាន​និយាយថា រថភ្លើង​ដឹក​អ្នកដំណើរ Amtrak ដែល​កំពុង​ធ្វើដំណើរ​ពី​ទីក្រុង​ឡូ​ស អ៊ែន​ជើ​ឡេស​ទៅ​កាន់​ទីក្រុង​ឈី​កា​ហ្គោ​បាន​បុក​រថយន្ត​ដឹក​សំរាម​​កាលពី​ថ្ងៃ​ចន្ទ​ទី​២៧​មិថុនា នៅ​តំបន់​ដាច់ស្រយាល​នៃ​រដ្ឋ​មីសួ​រី (Missouri) ដោយ​បាន​សម្លាប់​មនុស្ស​បី​នាក់​និង​រាប់សិប​នាក់​ផ្សេង​ទៀត​រងរបួស​ខណៈ​ទូរថភ្លើង​ចំនួន​ប្រាំពីរ​បាន​ធ្លាក់​ចេញពី​​ផ្លូវដែក​។​

​អ្នកនាំពាក្យ​កង​ល្បាតផ្លូវ​ហាយវេ​រដ្ឋ​មី​សួរី លោក​អនុសេនីយឯក ចា​ស្ទីន ដាន់ (Justin Dunn) បាន​និយាយថា អ្នក​ស្លាប់​ពីរ​នាក់​គឺ​នៅ​លើ​រថភ្លើង និង​ម្នាក់​នៅលើ​ឡាន​ដឹក​សំរាម​។​ភ្លាមៗ​នេះ​​គេ​មិន​ច្បាស់​ថា​មាន​មនុស្ស​ប៉ុន្មាន​នាក់​បាន​រងរបួស​នោះទេ ប៉ុន្តែ​មន្ទីរពេទ្យ​បាន​រាយការណ៍​ថា​បាន​ទទួល​អ្នកជំងឺ​ជាង ៤០ នាក់​ពី​ហេតុការណ៍​គ្រោះថ្នាក់​នេះ ហើយ​រំពឹង​មាន​អ្នកជំងឺ​ច្រើន​ទៀត​។​

​ក្រុមមន្ត្រី​បាន​និយាយថា រថភ្លើង Amtrak បាន​ដឹក​អ្នកដំណើរ​ប្រហែល ២៤៣ នាក់ និង​សមាជិក​បុគ្គលិក ១២ នាក់ នៅពេល​ដែល​ការប៉ះទង្គិច​គ្នា​បាន​កើតឡើង​នៅ​ជិត​តំបន់​មិន​ដុន (Mendon) នៅ​ចំណុចប្រសព្វ​ជនបទ​នៅ​លើ​ផ្លូវ​គ្រួស​មួយ ដែល​គ្មាន​ភ្លើង​សញ្ញា​ចរាចរ ឬ​ឧបករណ៍​បញ្ជា​អេឡិចត្រូនិក​។ ក្រុម​ល្បាត​បាន​និយាយថា ទូរថភ្លើង​ចំនួន​ប្រាំពីរ​បាន​ក្រឡាប់​។​

​អ្នកដំណើរ​ឈ្មោះ រ៉ូបឺត ណៃ​ធីង​ហ្គែល (Robert Nightingale) បាន​និយាយថា គាត់​កំពុង​ងងុយដេក​នៅក្នុង​ទូរថភ្លើង​របស់គាត់ នៅពេល​ដែល​ការបុក​គ្នា​បាន​កើតឡើង​។​

​គាត់​បាន​ប្រាប់​ទូរទស្សន៍ CNN ដោយ​ពណ៌នា​អំពី​របៀប​ដែល​រថភ្លើង​ញ័រ​រញ្ជួយ​មុនពេល​ធ្លាក់​ផ្លូវ​រួច​ក្រឡាប់ យ៉ាង​ដូច្នេះ​ថា “​អ្វី​គ្រប់​យ៉ាង​បាន​ចាប់ផ្តើម​ចូល​ក្នុង​ចលនា​យឺតៗ​”​។​

​លោក​ណៃ​ធី​ង​ហ្គែល​អាច​វារ​ចេញ​គើមៗ​ពី​ទូរថភ្លើង​ដែល​ក្រឡាប់​។ លោក​បន្តថា “​យើង​គ្រប់គ្នា​បាន​ត្រឹម​អង្គុយ​នៅ​ទីនោះ​ទាំង​តក់ស្លុត​”៕

រថភ្លើង​ដឹក​អ្នកដំណើរ Amtrak ដែល​កំពុង​ធ្វើដំណើរ​ពី​ទីក្រុង​ឡូ​ស​អ៊ែន​ជើ​ឡេស​ទៅ​កាន់​ទីក្រុង​ឈី​កា​ហ្គោ បាន​បុក​រថយន្ត​ដឹក​សំរាម​កាលពី​ថ្ងៃ​ចន្ទ​ទី​២៧​មិថុនា​