ដោយ​៖ សុវណ្ណ​កុម្ភៈ​/​ភ្នំពេញ​៖ ក្លិប​បាល់ទាត់​វិសាខា​របស់​កម្ពុជា​បាន​យកឈ្នះ​ក្រុម​ម្ចាស់ផ្ទះ Bali United ក្នុង​លទ្ធផល ៥-២ សម្រាប់​ការប្រកួត​ទី​២ ក្នុង​ពូ​ល G នៃ​ព្រឹត្តិការណ៍ AFC Cup 2022 នៅ​ទឹកដី​កោះ​បាលី ប្រទេស​ឥណ្ឌូនេស៊ី នៅ​ល្ងាច​ថ្ងៃទី​២៧ ខែមិថុនា ឆ្នាំ​២០២២​ម្សិល​ម៉ិ​ញ​នេះ នេះ​។​

​ក្រុម Bali United បាន​ស៊ុត​គ្រាប់​បាល់​នាំមុខ​ក្រុម​តំណាង​កម្ពុជា ១​គ្រាប់​មុន​នៅ​នាទី​ទី​៩ ដោយ​កីឡាករ Irfan Jaya​។ ប៉ុន្ដែ​មុន​បញ្ចប់​វគ្គ​ទី​១​វិសាខា​បាន​ស៊ុត​បំប៉ោង​សំណាញ់​ទី​ក្រុម​
​ម្ចាស់ផ្ទះ ២​គ្រាប់​វិញ​ដោយ​កីឡាករ Paulo Victor នៅ​នាទី​១៧ និង​ការទា​ត់បាល់​ហ្វ្រី​ឃី​ត របស់​ខ្សែការពារ អ៊ុក សុវណ្ណ នៅ​នាទី​៤៥​។​

​វគ្គ​ទី​២ ក្រុម វិសាខា ធ្វើបាន​កាន់តែ​ល្អ ដោយ​រកបាន ២​គ្រាប់​បន្ថែមទៀត ពី​សំណាក់​កីឡាករ​កូរ៉េខាងត្បូង Lee Jaegun នៅ​នាទី​៥៥ និង​កីឡាករ Paulo Victor នៅ​នាទី​៦៣ Privat រកបាន ១​គ្រាប់​ឲ្យ​ក្រុម Bali United វិញ នៅ​នាទី​៨៥ ។ ប៉ុន្ដែ​មុន​បញ្ចប់​ការប្រកួត អ៊ុក សុវណ្ណ បាន​ស៊ុត​បន្ថែម ១​គ្រាប់​ទៀត ដើម្បី​ធានា ៣​ពិន្ទុ​ជូន​ក្រុម​តែម្ដង ។​

​ក្រុម​វិសាខា​ពេលនេះ ឈរ​កំពូល​តារាង​ពូ​ល G ជា​បណ្ដោះអាសន្ន ហើយក៏​មានឱកាស​ច្រើន ដើម្បី​ឡើងទៅ​ជុំ​បន្ទាប់ ក្រោយ​រកបាន ៦​ពិន្ទុ​ពេញ ពី​ជ័យជម្នះ ២​ប្រកួត​ផ្ទួនៗ ខណៈ​ប្រកួត​ដំបូង គឺ​ក្រុម​វិសាខា បាន​យកឈ្នះ​ក្រុម​ហ្វីលីពីន Kaya FC ដោយ​លទ្ធផល ២-១ ។​

​យ៉ាងណាក្ដី វិសាខា នៅសល់​ការប្រកួត ១​ប្រកួត​ទៀត ដោយ​ត្រូវ​ជួប​ក្រុម Kedah Darul Aman របស់​ម៉ាឡេស៊ី នា​ថ្ងៃទី​៣០ ខែមិថុនា​ខាងមុខ នៅ​ប្រទេស​ឥណ្ឌូនេស៊ី​ដដែល ៕​