​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុម​និយតករ​បាន​និយាយ​កាលពី​ថ្ងៃ​ចន្ទ ទី​២៧ មិថុនា​ថា ក្រុមហ៊ុន​អគ្គិសនី​ផ្តាច់មុខ​របស់​រដ្ឋ​ស្រីលង្កា ដែល​ខាតបង់​យ៉ាងធ្ងន់ធ្ងរ​បាន​ស្នើសុំ​ឱ្យមាន​ការដំឡើង​​ថ្លៃ​ដ៏​គួរឱ្យភ្ញាក់ផ្អើល​ជាង ៨០០ ភាគរយ​សម្រាប់​អតិថិជន​ក្រីក្រ​បំផុត​របស់​ខ្លួន ខណៈ​ប្រទេស​ក្ស័យធន​នេះ​បាន​អស់​ប្រេងឥន្ធនៈ​ប្រើ​ទៅហើយ​។​

​ប្រទេស​អាស៊ី​ខាងត្បូង​មួយ​នេះ​ត្រូវ​បាន​វាយ​សំពង​ដោយ​វិបត្តិ​រូបិយប័ណ្ណ​បរទេស ដែល​ធ្វើឱ្យ​ប្រទេស​ខ្វះខាត​ប្រាក់​ដុល្លារ​យ៉ាងខ្លាំង​សម្រាប់​ការនាំ​ចូល​ទំនិញ​ផ្សេងៗ រួម​ទាំង​ប្រេង​សម្រាប់​ផលិត​អគ្គិសនី​និង​សម្រាប់​ការដឹកជញ្ជូន​។​

​គណៈកម្មាធិការ​ប្រើប្រាស់​ថាមពល​សាធារណៈ​នៃ​ប្រទេស​ស្រីលង្កា (PUCSL)​បាន​និយាយថា ក្រុមប្រឹក្សាភិបាល​អគ្គិសនី​សី​ឡុន (Ceylon)​ហៅ​កាត់ CEB បាន​ខាតបង់ ៦៥ ពាន់​លាន​រូពី (១៨០​លាន​​ដុល្លារ​) នៅក្នុង​ត្រីមាស​ទីមួយ ហើយ​បាន​ស្វែងរក​ការដំឡើងថ្លៃ ៨៣៥ ភាគរយ​សម្រាប់​អ្នក​ប្រើប្រាស់​ថាមពល​តូច​បំផុត​របស់​ខ្លួន ដែល​កំពុង​ធ្លាក់ចុះ​យ៉ាងខ្លាំង​។​

​បច្ចុប្បន្ន អ្នកណា​ដែល​ប្រើប្រាស់​ថាមពល​តិចជាង ៣០ គីឡូវ៉ាត់​ក្នុង​មួយខែ ត្រូវ​បង់ ៥៤,២៧ រូពី​ក្នុង​មួយ​គីឡូវ៉ាត់ ដែល CEB ស្នើ​សុំ​ដំឡើង​ដល់ ៥០៧,៦៥ រូ​ពី​។​

​ប្រធាន PUCSL លោក ចា​ណា​កា រ៉ា​ត​ណា​យ៉ាកេ (Janaka Ratnayake)​បាន​ប្រាប់​អ្នកយកព័ត៌មាន​នៅ​ទីក្រុង​កូឡុំបូ​ថា​”​អ្នកប្រើប្រាស់​ក្នុងស្រុក​ភាគច្រើន​នឹង​មិន​អាចមាន​លទ្ធភាព​សម្រាប់​​ការដំឡើងថ្លៃ​ដ៏​ខ្ពស់​នេះ​បានទេ​។​ហេតុដូច្នេះ យើង​បាន​ស្នើ​ឱ្យ​មាន​ការឧបត្ថម្ភ​ធន​ដោយ​ផ្ទាល់​ពី​រតនាគារ ដើម្បី​រក្សា​ការដំឡើងថ្លៃ​នេះ​ឱ្យ​តិច​ជាង​ពាក់កណ្តាល​នៃ​អ្វីដែល​ពួកគេ​បាន​ស្នើសុំ​”៕

​អ្នកបើក​ម៉ូតូ​រង់ចាំ​ចាក់​សាំង​នៅ​តាម​ស្ថានីយ​ប្រេង​ចំពេល​មាន​វិបត្តិ​ប្រេង​នៅ​ទីក្រុង​កូឡុំបូ ប្រទេស​ស្រីលង្កា​កាលពី​ថ្ងៃទី​២៦ មិថុនា ឆ្នាំ​២០២២