​ប្រែ​សម្រួល : កញ្ញា​ដា​លី​ស (​អេ​ស៊ាវ័ន​) ៖ មេដឹកនាំ​នៃ​ក្រុម​ប្រទេស​អ្នក​មាន​ទាំង​ប្រាំពីរ​បាន​ចម្អក​ឱ្យ​រូប​ភាព​នៃ​សត្រូវ​របស់​ពួកគេ​គឺ​លោក​វ្ល៉ា​ឌី​មៀ ពូ​ទីន កាលពី​ថ្ងៃអាទិត្យ ទី​២៦​មិថុនា​នៅ​ឯ​កិច្ចប្រជុំ​​មួយ​ក្នុង​ប្រទេស​អាល្លឺម៉ង់​ដែល​គ្របដណ្តប់​ដោយ​ផល​និង​វិធានការ​នៃ​ការ​លុកលុយ​របស់​មេដឹកនាំ​រុស្ស៊ី​រូប​នេះ​លើ​អ៊ុ​យក្រែន​។​

​នៅពេល​មេដឹកនាំ​ស្លៀកពាក់​ឈុត​ធំ​សមសួន​ទាំងនេះ​អង្គុយ​ចុះ​សម្រាប់​កិច្ចប្រជុំ​លើកដំបូង​របស់​ពួកគេ​នៃ​កិច្ចប្រជុំ​កំពូល G7 រយៈពេល​បី​ថ្ងៃ​នៅ​ជួរ​ភ្នំ​អាល់​នៃ​តំបន់​បា​វ៉ា​រៀន (Bavarian Alps) នាយករដ្ឋមន្ត្រី​អង់គ្លេស​លោក បូរី​ស ច​ន​សុន បាន​សួរថា​តើ​អាវធំ​របស់​ពួក​គេ​គួរតែ​ដោះចេញ ឬ ពួក​គេ​គួរតែ​ដោះអាវ​បន្ថែមទៀត​ឬ​អត់​។​

​លោក​ច​ន​សុន​បាន​និយាយ​ទៅកាន់​មេដឹកនាំ​ដែល​កំពុង​សើច​ដទៃ​ទៀត​ថា “​យើងទាំងអស់គ្នា​ត្រូវតែ​បង្ហាញថា យើង​តឹង​ប៉ឹង​ជាង​ពូ​ទីន​”​។​

​នាយករដ្ឋមន្ត្រី​កាណាដា​លោក ចា​ស្ទីន ទ្រូ​ដូ (Justin Trudeau)​បាន​និយាយ​បាញ់​ទៅ​វិញ​ថា “​តោះ​ជិះសេះ​ព្រលែង​ដើមទ្រូង​”​។​

​ប្រធាន​គណៈកម្មការ​អឺរ៉ុប​លោក​ស្រី អឺ​ស៊ូ​ឡា វ៉ុន ដឺ​ឡេន (Ursula von der Leyen) បាន​និយាយថា “​អូ​ចា៎​! ការ​ជិះសេះ​គឺ​ល្អ​បំផុត​”​។​

​លោកពូ​ទីន ដែល​ចូលចិត្ត​ចាយរាង​ក្នុង​រូបថត​បែប​កីឡា​របស់គាត់ ត្រូវបាន​គេ​ថតរូប​ដោយ​ដោះ​អាវ​ជាច្រើន​លើក​នៅក្នុង​រូបថត ដែល​ចេញផ្សាយ​ដោយ​ប្រព័ន្ធ​ផ្សព្វផ្សាយ​រដ្ឋ​រុស្ស៊ី​រួម​ទាំង​ឈុត​មួយ​ដែល​​គាត់​ជិះសេះ​ពណ៌​ត្នោត ពាក់​វ៉ែន​តាខ្មៅ ខ្សែក​មាស និង​ស្លៀកខោ​ទាហាន​៕

ក្រុម​មេដឹកនាំ G7 ចម្អក​លេងសើច​រឿង​ពូ​ទីន​ព្រលែង​ដើមទ្រូង​ជិះ​លើ​ខ្នង​សេះ បង្អួត​រាង​មាំទាំ​របស់គាត់