​ប្រែ​សម្រួល : កញ្ញា​ដា​លី​ស (​អេ​ស៊ាវ័ន​) ៖ ម៉ាត់ ធឺ​ន​ណឺ (Matt Turner) បាន​ចូលរួម​ជាមួយ Arsenal ជា​ផ្លូវការ​ក្នុងតម្លៃ ៥,៧៥ លាន​ផោន​ក្នុង​ការផ្ទេរ​ពី​ក្លិប New England Revolutionរបស់​សហរដ្ឋ​អាម៉េរិក​។​

​ជាមួយនឹង​ឯកសារ​បាន​បំពេញ​រួច​កាលពី​ខែ​កុម្ភៈ កីឡាករ​អាម៉េរិក​រូប​នេះ​បានបញ្ចប់​រដូវ​កាល​ក្របខ័ណ្ឌ MLS មុន​ពេល​ការផ្ទេរ​ឆ្លង​សមុទ្រ​អា​ត្លង់​ទិក​នេះ​។​

​គណនី Twitter របស់ Arsenal បានបញ្ជាក់​ថា អ្នកចាំទី​អាយុ ២៨ ឆ្នាំ​ទីបំផុត​បាន​មក​ដល់​ទី​ក្រុង​ឡុង​ដ៍​កាលពី​ថ្ងៃ​សុក្រ​។​

​ក្រុម​កាំភ្លើង​ធំ​បាន​សរសេរថា “​ពី New Jersey មក​កាន់​ទីក្រុង​ឡុង​ដ៍​ភាគ​ខាងជើង​…​សូម​ស្វាគមន៍​ការ​មក​ដល់​ផ្ទះ ម៉ាត់ ធឺ​ន​ណឺ​”​។​

​ក្លឹប​បានបញ្ជាក់​ថា រូប​គេ​នឹង​ពាក់អាវ​លេខ ៣០ សម្រាប់ Arsenal ហើយ​អាច​ចូលរួម​ហ្វឹកហាត់​មុន​បើក​រដូវ​កាល​ភ្លាមៗ​តែម្តង​។​

​អ្នក​ចាត់ការ​ទូទៅ​ក្រុម Arsenal លោក មី​គែល អាតិតា បាន​ប្រាប់​វេបសាយ​របស់​ក្លិប​ថា “​ម៉ាត់​គឺ​ជា​អ្នក​ចាំទី​មាន​បទពិសោធន៍ ដែល​នឹង​នាំមក​នូវ​គុណភាព​ខ្ពស់​ដល់​ក្រុម​របស់​យើង​។​គាត់​បាន​​បង្ហាញ​នៅក្នុង​ប៉ុន្មាន​ឆ្នាំ​ថ្មីៗ​នេះ​ទាំង​នៅក្នុង​ក្របខ័ណ្ឌ MLS និង​កម្រិត​អន្តរជាតិ​ជាមួយ​សហរដ្ឋ​អាម៉េរិក​ថា​គាត់​ជា​អ្នកចាំទី​ដែល​នឹង​ផ្តល់ឱ្យ​យើង​នូវ​ភាពរឹងមាំ​បន្ថែមទៀត​មុននឹង​ចាប់ផ្តើម​រដូវ​​កាល​ក្រោយ​”៕

ម៉ាត់ ធឺ​ន​ណឺ ក្លាយ​ជា​កីឡាករ Arsenal ជា​ផ្លូវការ