ដោយៈ មុនី​រ័ត្ន / ភ្នំពេញៈ ក្នុងនាម​ជា​ប្រេសិត​ពិសេស របស់​ប្រធាន​អាស៊ាន ស្តីពី​មី​យ៉ាន់​ម៉ា លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និង​សហប្រតិបត្តិការ​អន្តរជាតិ នៃ​ព្រះរាជាណាចក្រ​កម្ពុជា នឹង​ដឹកនាំ​គណៈប្រតិភូ អញ្ជើញ​ទៅ​បំពេញ​ទស្សនកិច្ច​ការងារ លើក​ទី​ពីរ នៅ​សាធារណរដ្ឋ​សហភាព​មី​យ៉ាន់​ម៉ា ពីថ្ងៃ​ទី​២៩ ខែមិថុនា ដល់​ថ្ងៃទី​០៣ ខែកក្កដា ឆ្នាំ​២០២២ ។ មុន​ដំណើរ​អញ្ជើញ​ទៅ​មី​យ៉ាន់​ម៉ា ជា​លើក​ទី​២ ក្នុងនាម​ជា​ប្រេសិត​ពិសេស របស់​ប្រធាន​អាស៊ាន បាន​ទទូច​ឲ្យ​ឱ្យ​ក្រុមប្រឹក្សា​រដ្ឋបាល​រដ្ឋ នៃ​មី​យ៉ាន់​ម៉ា សម្រួល​ដល់​ការវិល ត្រឡប់​របស់លោក​ស្រី អោ​ង​សាន ស៊ូ​ជី ទៅកាន់​លំនៅដ្ឋាន វិញ​។

​អញ្ជើញ​អមដំណើរ​លោក​ឧបនាយករដ្ឋមន្ត្រី ប្រាក់ សុខុន រួមមាន លោក ឯក​ផាប់ ផាន់​ថាវ​ង់ អគ្គលេខាធិការរង​អាស៊ាន ទទួលបន្ទុក​សហគម​ន៍ សង្គម​វប្បធម៌​អាស៊ាន និង​មន្ត្រីជាន់ខ្ពស់ របស់​រាជរដ្ឋាភិបាល​មួយចំនួន ព្រមទាំង​បុគ្គលិក​របស់ លេខាធិការដ្ឋាន​អាស៊ាន ផងដែរ ។​

​ក្រសួងការបរទេស និង​សហប្រតិបត្តិការ​អន្តរជាតិ បានបញ្ជាក់​ថាៈ​ដំណើរ​ទស្សនកិច្ច​លើក​ទី​ពីរ របស់​ប្រេសិត​ពិសេស ទៅកាន់​មី​យ៉ាន់​ម៉ា មាន​គោលបំណង​តាមដាន​វឌ្ឍនភាព នៃ​ការអនុវត្ត ការព្រមព្រៀង​ជា​ឯកច្ឆន្ទ ៥ ចំណុច និង​លទ្ធផល​នៃ​កិច្ចប្រជុំ​ពិគ្រោះ​យោបល់ ស្តីពី​ជំនួយ មនុស្សធម៌​របស់​អាស៊ាន សម្រាប់​មី​យ៉ាន់​ម៉ា ដែល​បាន​ប្រព្រឹត្តិ​ទៅ កាលពី​ថ្ងៃទី​៦ ខែឧសភា ឆ្នាំ​២០២២ នៅ​រាជធានី​ភ្នំពេញ និង​ដើម្បី​រួមចំណែក​ដល់ ការបង្កើត​បរិយាកាស​អំណោយ ផល សម្រាប់​ដំណើរការ​សន្ទនា នយោបាយ ប្រកបដោយ​បរិ​យា​ប័ន្ន តាមរយៈ​ការជួបពិភាក្សា ជាមួយ​គ្រប់ភាគី​ពាក់ព័ន្ធ ។​

​សូមជម្រាបថា មុន​ដំណើរ​ទៅ​បំពេញ​ទស្សនកិច្ច​ការងារ ជា​លើក​ទី​២ លោក ប្រាក់ សុខុន បាន​ជម្រាបជូន ក្រុមប្រឹក្សា​រដ្ឋបាល​រដ្ឋ (SAC) នៃ​សហភាព​មី​យ៉ាន់​ម៉ា នូវ « ក្តីកង្វល់ យ៉ាងខ្លាំង​របស់​សហសេវិក​អាស៊ាន​» ចំពោះ​របាយការណ៍ ស្ដីពី​ការផ្ទេរ​លោកស្រី អោ​ង សាន ស៊ូ​ជី ពី​លំនៅដ្ឋាន ទៅកាន់​ពន្ធនាគារ នៅក្នុង​ទីក្រុង​ណៃ​ពិដោ និង​បាន​ទទូច​ឱ្យ​ក្រុមប្រឹក្សា រដ្ឋបាល​រដ្ឋ សម្របសម្រួល ដល់​ការបញ្ជូន​លោកស្រី ត្រឡប់​ទៅ​លំនៅដ្ឋាន ដែលជា​ទីតាំង​លោកស្រី ត្រូវបាន​ឃុំខ្លួន​ពីដំបូង​។​

​លោក​ឧបនាយករដ្ឋមន្ត្រី ប្រាក់ សុខុន បានលើកឡើង ក្នុង​លិខិត​ផ្ញើជូន​លោក Wunna Maung Lwin រដ្ឋមន្ត្រីការបរទេស នៃ​សាធារណរដ្ឋ សហភាព​មី​យ៉ាន់​ម៉ា ក្នុងពេល​ថ្មីៗ នេះ​ថាៈ «​ខ្ញុំ​មិនមាន​មន្ទិលសង្ស័យ​ទេ​ថា ក្តីបារម្ភ​ដូចគ្នានេះ កើតឡើង​ហួស​ពី​ក្នុង​រង្វង់​អាស៊ាន ដោយហេតុថា លោកស្រី អោ​ង​សាន ស៊ូ​ជី ត្រូវបាន​ចាត់ទុក ក្នុង​រង្វង់​អន្តរជាតិ និង​ដោយ ប្រជាជន​ជាច្រើន នៅ​មី​យ៉ាន់​ម៉ា ថា​មាន​តួនាទី​ដ៏​សំខាន់ ក្នុងការ​វិលត្រឡប់​ទៅរក​ប្រក្រតីភាព និង​ការផ្សះផ្សា​ជាតិ​ឡើងវិញ នៅក្នុង​ប្រទេស​មី​យ៉ាន់​ម៉ា​តាមរយៈ​ដំណោះស្រាយ​នយោបាយ ដោយ​សន្តិវិធី​មួយ​»​។​

​លោក​ឧបនាយករដ្ឋមន្ត្រី បាន​បន្តទៀតថាៈ ក្នុងតួនាទី​ជា​ប្រេសិត​ពិសេស របស់​ប្រធាន​អាស៊ាន ស្ដីពី​មី​យ៉ាន់​ម៉ា «​ខ្ញុំ​សូម​លើកឡើង ពី​ការទទូច​របស់ សហសេវិក​អាស៊ាន សូមឱ្យ​ក្រុមប្រឹក្សា រដ្ឋបាល​រដ្ឋ នៃ​មី​យ៉ាន់​ម៉ា ប្រកាន់​យកក្តី​អនុគ្រោះ និង​សម្រួល​ដល់​ការវិលត្រឡប់​របស់ លោកស្រី អោ​ង​សាន ស៊ូ​ជី ទៅកាន់​លំនៅដ្ឋាន ដែល​លោកស្រី​ត្រូវបាន​ឃុំខ្លួន​ពីដំបូង ដោយ​ហេតុផល​សុខភាព និង​សុខមាលភាព ទ្រុឌទ្រោម​របស់លោក​ស្រី ក៏ដូចជា​ការអនុវត្ត នីតិរដ្ឋ ប្រកបដោយ​យុត្តិធម៌ និង​សុភ​វិនិច្ឆ័យ​»​។​

​ប្រេសិត​ពិសេស​របស់​ប្រធាន​អាស៊ាន បានលើកឡើង​ថាៈ «​យើងទាំងអស់គ្នា មាន​ទស្សនៈ ដូចគ្នា​ថា ការផ្សះផ្សា​ជាតិ ដោយ​សន្តិវិធី មិនអាច​កើតឡើង​បានឡើយ នៅពេលដែល​ភាគី មួយ​នៃ​ជម្លោះ មិនត្រូវ​បា​នប​ញ្ជូ​ល​ទៅក្នុង​សមីការ (equation) ដំណោះស្រាយ​» និង​បាន​គូសបញ្ជាក់ថា «​អាស្រ័យហេតុនេះ សហសេវិក​អាស៊ាន​ទាំងអស់ ជំរុញ​យ៉ាងខ្លាំង ឱ្យ​ក្រុមប្រឹក្សា​រដ្ឋបាល​រដ្ឋ របស់​មី​យ៉ាន់​ម៉ា ចាប់ផ្តើម​ដំណើរការ​ប្រកបដោយ​បរិ​យា​ប័ន្ន នៃ​ការផ្សះផ្សា​ជាតិ ដោយ​មិនមាន​ការពន្យារពេល បន្ថែមទៀត​នោះឡើយ​»​។
​លោក​ប្រេសិត​ពិសេស បាន​បន្ថែមថាៈ ដំណោះស្រាយ​នយោបាយ ដោយ​សន្តិវិធី ចំពោះ​ជម្លោះ​មួយ ទោះបី​ជាមាន​ភាពស្មុគស្មាញ យ៉ាងណាក៏ដោយ​ត្រូវតែមាន​ការចែករំលែក លំហ​នយោបាយ ដោយ​ភាគី​ពាក់ព័ន្ធ​ទាំងអស់​៕/V​