ប្រែ​សម្រួលៈ​បំណង​(​ដេល្លី​ម៉េល​)៖ ប្រធានាធិបតី​តួ​ក​គី លោក​រេ​ស៊ី​ប តៃ​យីប អឺ​ដូ​ហ្កា​ន់ កាលពី​ថ្ងៃ​អង្គារ​បាន​ដកចេញ​ការប្រឆាំង​ជំទាស់​របស់លោក​ដើម្បី​ប្រទេស​ស៊ុយអែត​និង​​ហ្វាំង​ឡង់​ចូល​ជា​សមាជិក​អង្គការ​ណា​តូ​ក្រោយ​បាន​ជួបពិភាក្សា​ជាមួយ​មេដឹកនាំ​ប្រទេស​ក្នុង​តំបន់ន័​រ​ឌិក​(Nordic)​ទាំង​ពីរ​នៅ​ទីក្រុង​ម៉ា​ឌ្រី​ត​។​

​កន្លងមក​លោក​អឺ​ដូ​ហ្កា​ន់បាន​បដិសេធ​ការសុំ​ចូល​របស់​ប្រទេស​ទាំង​ពីរ​យ៉ាង​ចចេស ទោះជា​មាន​ការអំពាវនាវ​ពី​សម្ពន្ធមិត្ត​ណា​តូ​អោយ​បើកផ្លូវ​សំរាប់​ពួកគេ​ចូល​ក្នុង​សម្ពន្ធភា​​ព​យោធា​នេះ​ក្តី​។​តួ​ក​គី ដែល​ជា​សមាជិក​​ណា​តូ​មួយ​អាច​បោះឆ្នោត​ប្រឆាំង​ជំទាស់​ប្រទេស​ហ្វាំង​ឡ​ង់​និង​ស៊ុយអែត​ចូលក្នុង​សម្ពន្ធភាព​យោធា​លោកខាងលិច​ដ៏​ធំ​នេះ​ដោយ​​សារ​តែ​ច្បាប់​តំរូវ​អោយ​រដ្ឋ​ជា​សមាជិក​ទាំងអស់​គាំទ្រ​ទទួលយក​សមាជិក​ថ្មី​។​

លោក​រេ​ស៊ី​ប តៃ​យីប អឺ​ដូ​ហ្កា​ន់(កណ្តាល)ចាប់រលាក់ដៃជាមួយអគ្គលេខាអង្គការណាតូក្នុងអំឡុងជំនួបកំពូលរបស់សម្ពន្ធភាពយោធានេះនៅក្រុងម៉ាឌ្រីត

​កន្លងមក​លោក​អឺ​ដូ​ហ្កា​ន់(ឆ្វេង)បាន​បដិសេធ​ការសុំ​ចូល​របស់​ប្រទេស​ទាំង​ពីរ​យ៉ាង​ចចេស តែ​កាលពី​ថ្ងៃ​អង្គារ​បាន​យល់ព្រម​ក្រោយ​ការធ្វើសម្បទាន​ពី​ហ្វាំង​ឡ​ង់​និង​ស៊ុយអែត​

​តែ​កាលពី​យប់​ថ្ងៃ​អង្គារ ការិយាល័យ​របស់​អឺ​ដូ​ហ្កា​ន់ បាន​និយាយថា ខ្លួន​យល់ព្រម​គាំទ្រ​សំណើ​របស់​ប្រទេស​ទាំង​ពីរ​ចូលរួម​ក្នុង​អង្គការ​នេះ ដោយ​ថា​រដ្ឋាភិបាល​ទីក្រុង​អង់កា​រ៉ា​«​បាន​ទទួល​អ្វីដែល​ខ្លួន​ចង់បាន​ហើយ​»​។​

​ការិយាល័យ​នេះ​បាន​និយាយ​នៅ​មុន​ជំនួប​កំពូល​នៅ​ម៉ា​ឌ្រី​ត​ថា «​តួ​ក​គី​បាន​ធ្វើអោយ​មាន​ការរីក​ចំរើន​ខ្លាំង​ក្នុង​ការប្រយុទ្ធ​ទល់នឹង​អង្គការ​ភេរវកម្ម​»​។​

កន្លងមក​រដ្ឋាភិបាល​ទីក្រុង​អង់កា​រ៉ា បាន​ចោទប្រកាន់​ហ្វាំង​ឡ​ង់ ជាពិសេស​ស៊ុយអែត​ថា​ផ្តល់​ទីជម្រក​សុវត្ថិភាព​ដល់​ពួក​យុទ្ធជន​ឃឺ​ដដែល​បាន​ធ្វើ​ការបះបោរ​ចំណាស់​រាប់​ទសវត្សរ៍​ប្រឆាំង​​នឹង​រដ្ឋ​តួ​ក​គី​។​

​ប្រទេស​ក្នុង​តំបន់ន័​រ​ឌិក​ទាំងពីរក៏​បាន​យល់ព្រ​មដក​ចេញ​ការហ៊ុមព័ទ្ធ​ការដឹកជញ្ជូន​សព្វាវុធ​ទៅកាន់​តួ​ក​គី​ផងដែរ ដែល​ត្រូវបាន​ដាក់​ជា​ការឆ្លើយតប​នឹង​អន្តរាគមន៍​​យោធា​តួ​ក​គី​ចូល​ស៊ី​រី នៅ​ឆ្នាំ​២០១៩​។​

​កាលពី​ថ្ងៃ​អង្គារ តួ​ក​គី​បាន​ចុះហត្ថលេខា​លើ​អនុស្សរណៈ​នៃ​ការយោគយល់​គ្នា​មួយ​ជាមួយ​ស៊ុយអែត​និង​ហ្វាំង​ឡ​ង់ ដើម្បី​គាំទ្រ​ការអញ្ជើញ​ប្រទេស​ស៊ុយអែត​និង​ហ្វាំង​ឡ​ង់​ចូល​​ជា​សមាជិក​ណ​ណា​តូ​។​

​សម្ពន្ធមិត្ត​ណា​តូ​ទាំងអស់ រួម​ទាំង​អង់គ្លេស បាន​អបអរ​កិច្ចព្រមព្រៀង​នេះ​។​

​ចំណាត់ការ​នេះ​កើត​ឡើង​ក្រោយ​អគ្គលេខា​អង្គការ​ណា​តូ លោក​ជេន ស្តូល​ថិ​ន​ប៊ឺក បាន​សម្របសម្រួល​អោយមាន​កិច្ច​ពិភាក្សា​នៅ​ទីក្រុង​ម៉ា​ឌ្រី​ត​រវាង​លោក​អឺ​ដូ​ហ្កា​ន់ និង​​មេដឹកនាំ​ស៊ុយអែត​និង​ហ្វាំង​ឡ​ង់​។​

​លោក​បាន​និយាយថា «​ខ្ញុំ​សប្បាយចិត្ត​ដែល​ប្រកាស​ថា យើង​ឥឡូវ​មាន​កិច្ចព្រមព្រៀង​មួយ​ដែល​ត្រួសត្រាយ​ផ្លូវ​សំរាប់​ស៊ុយអែត​និង​ហ្វាំង​ឡ​ង់​ចូលក្នុង​អង្គការ​ណា​តូ​។​កិច្ច​ព្រម​​ព្រៀង​នេះ​ដោះស្រាយ​ទុក្ខ​កង្វល់​របស់​តួ​ក​គី រួម​មាន​ការនាំចេញ​សព្វាវុធ និង​ការប្រយុទ្ធប្រឆាំង​ភេរវកម្ម​»​។​

​នាយករដ្ឋមន្ត្រី​ស៊ុយអែត កាលពី​ថ្ងៃ​អង្គារ​បាន​អបអរ​វា​ថា​ជា​«​កិច្ចព្រមព្រៀង​ល្អ​ណាស់​»​មួយ​ជាមួយ​តួ​ក​គី តែ​ថា​ស៊ុយអែត​មិនបាន​ធ្វើ​សម្បទាន​ច្រើនពេក​ដល់​លោក​អឺ​ដូ​ហ្កា​ន់​​ទេ​។​

​នាយករដ្ឋមន្ត្រី​អង់គ្លេស​លោក​បូរី​ស ច​ន​សុន​ន​ក៏បាន​ស្វាគមន៍​កិច្ចព្រមព្រៀង​នេះ ដោយ​លោក​បាន​និយាយថា​« សមាជិកភាព​របស់​ស៊ុយអែត​និង​ហ្វាំង​ឡ​ង់​នឹង​ធ្វើអោយ​​សម្ពន្ធភាព​របស់​យើង​កាន់តែ​រឹងមាំ​ឡើង​និង​មាន​សុ​វត្ថ​ភាព​ឡើង​»​។​

​លោក​អឺ​ដូ​ហ្កា​ន់ ត្រូវ​រំពឹងថា​នឹង​ជួបពិភាក្សា​ជាមួយ​ប្រធានាធិបតី​អាម៉េរិក​ចូ បៃ​ដិន នៅ​ថ្ងៃ​ពុធ​នៅក្រៅ​ជំនួប​កំពូល​ណា​តូ ។​សូមបញ្ជាក់​ថា រដ្ឋាភិបាល​អាម៉េរិក​បានដាក់​​ទណ្ឌកម្ម​លើ​តួ​ក​គី​ដោយសារតែ​រដ្ឋាភិបាល​ទីក្រុង​អង់កា​រ៉ា​ចចេស​ទិញ​ប្រព័ន្ធ​ការពារ​កាំជ្រួច​ទំ​​នើប​ពី​រុស្ស៊ី​កាលពី​ឆ្នាំ​២០១៩​។​ការទិញ​នេះ​នាំ​អោយ​អាម៉េរិក​ទម្លាក់​តួ​ក​គី​ចេញ​​ពី​កម្មវិធី​យន្តហោះ​ប្រយុទ្ធ​រួម​F-35 និង​ដាក់​ការ​រឹតត្បិត​ពាណិជ្ជកម្ម​លើ​ទីភ្នាក់ងា​រទិញ​និង​ផ្គត់ផ្គង់​សម្ភារ​យោធាតួកគី​។​

​ទោះជា​យ៉ាងណា រដ្ឋាភិបាល​ទីក្រុង​វ៉ា​ស៊ី​តោន​បាន​អោយ​សញ្ញា​ថា ខ្លួន​អាច​ទុក​ជម្លោះ​នេះ​ទៅ​មួយ​ផ្នែក​។​រដ្ឋាភិបាល​របស់​លោកបៃ​ដិន​កំពុង​ថ្លឹងថ្លែង​អំពី​លទ្ធភាព​ផ្គត់ផ្គង់​យន្ត​​ហោះ​F-16​ជំនាន់​ចាស់​ជាង​ដើម្បីអោយ​តួ​ក​គី​ផ្លាស់ប្តូ​រកង​យន្តហោះ​ចាស់ៗ​របស់​ខ​ខ្លួន​៕