​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី វ្ល៉ា​ឌី​មៀ ពូ​ទីន បាន​និយាយថា រុស្ស៊ី​កំពុង​ព្យាយាម​កសាង​ទំនាក់ទំនង​ជាមួយ​ពួក​តា​លី​បង់ ហើយ​ថា​រុស្ស៊ី​ចង់ឃើញ​ក្រុម​ជនជាតិភាគតិច​​ទាំងអស់​ក្នុង​ប្រទេស​អា​ហ្វ​ហ្គានី​ស្ថាន​ចូលរួម​ក្នុង​ការគ្រប់គ្រ​ង​ប្រទេស​។​

​សេចក្តីថ្លែងការណ៍​របស់​លោកពូ​ទីន​ធ្វើឡើង​កាលពី​ថ្ងៃ​អង្គារ​ទី​២៨​មិថុនា​ក្នុងជំនួប​ជាមួយ​ប្រធានាធិបតី​តាជី​គី​ស្ថាន លោក អ៊ី​ម៉ូ​ម៉ាលី រ៉ា​ម៉ុន (Emomali Rahmon) ក្នុងអំឡុង​ដំណើរ​ទស្សនកិច្ច​​លើកដំបូង​របស់​មេដឹកនាំ​រុស្ស៊ី​នៅ​ក្រៅប្រទេស ចាប់​តាំងពី​ការចាប់ផ្តើម​ជម្លោះ​នៅ​អ៊ុ​យក្រែន​។​

​តាជី​គី​ស្ថាន ដែល​ទទួល​ដាក់​មូលដ្ឋាន​យោធា​រុស្ស៊ី មាន​ព្រំដែន​ដ៏​វែងឆ្ងាយ​ជាមួយ​អា​ហ្វ​ហ្គានី​ស្ថាន ហើយ​ព្រួយបារម្ភ​ថា លទ្ធិ​ជ្រុលនិយម​អ៊ីស្លាម​អាច​ជ្រាបចូល​ទៅក្នុង​ប្រទេស​។​

​លោកពូ​ទីន​បាន​និយាយ​នៅក្នុង​រដ្ឋធានី ឌូ​សាន​បេ (Dushanbe)​ថា “​យើង​កំពុង​ធ្វើ​អ្វី​គ្រប់យ៉ាង​ដើម្បី​ឱ្យ​ស្ថានភាព​នៅក្នុង​ប្រទេស​នោះ​មាន​ប្រក្រតីភាព​។​យើង​កំពុង​ព្យាយាម​កសាង​ទំនាក់​​ទំនង​ជាមួយ​កម្លាំង​នយោបាយ​ដែល​គ្រប់គ្រង​ស្ថានការណ៍​នេះ​”​។​

​លោក​បាន​និយាយថា “​យើង​កំពុង​ធ្វើការ​ចេញពី​មូលដ្ឋាន ដែល​ក្រុម​ជនជាតិភាគតិច​ទាំងអស់​នៅក្នុង​ប្រទេស​អា​ហ្វ​ហ្គានី​ស្ថាន ដូចដែល​បាន​និយាយ​រួច​ហើយ​គឺ​ត្រូវតែ​ចូលរួម​ឱ្យបាន​ត្រឹមត្រូវ​ក្នុង​ការដឹក​​នាំ​ប្រទេស​”​។​

​ទោះបីជា​រុស្ស៊ី​ចាត់ទុក​ក្រុម​តា​លី​បង់​ជា​ក្រុម​ភេរ​វករ​ក៏ដោយ ក៏​ប៉ុន្តែ​ក្រុម​តា​លី​បង់​មាន​តំណាង​នៅក្នុង​ប្រទេស​រុស្ស៊ី​និង​គណៈប្រតិភូ​មួយ​ក្រុម​បាន​ចូលរួម​វេទិកា​សេដ្ឋកិច្ច​អន្តរជាតិ​នៅ​ទីក្រុង​សេន​ភី​ត​ធឺ​ស្បឺក​ (St. Petersburg)​នា​ពេល​ថ្មីៗ​នេះ​៕

​លោកពូ​ទីន​ជួប​ប្រធានាធិបតី​តាជី​គី​ស្ថាន លោក អ៊ី​ម៉ូ​ម៉ាលី រ៉ា​ម៉ុន ក្នុង​ទីក្រុង​ឌូ​សាន​បេ​កាលពី​ថ្ងៃ​អង្គារ​