ដោយ​៖ សុវណ្ណ​កុម្ភៈ / ភ្នំពេញ​៖ តាម​ការប្រកាស​ពី សហព័ន្ធ​កីឡាបាល់ទាត់​ទ្វីបអាស៊ី (AFC) បាន​ពន្យារពេល កាលកំណត់​របស់ខ្លួន ក្នុង​ការទទួល​ការចូលរួម​ដេញថ្លៃ ដើម្បី​ធ្វើជា​ម្ចាស់ផ្ទះ ព្រឹត្តិការណ៍​បាល់ទាត់ Asian Cup ឆ្នាំ​២០២៣ បន្ទាប់ពី​ការសម្រេចចិត្ត​របស់​ចិន ក្នុងការ​បោះបង់ចោល​សិទ្ធិ ធ្វើ​ម្ចាស់ផ្ទះ​ព្រឹត្តិការណ៍​នេះ​។​

​មុននេះ ចិន គ្រោង​នឹង​ធ្វើជា​ម្ចាស់ផ្ទះ ព្រឹត្តិការណ៍​ប្រកួត​បាល់ទាត់ នៅ​វគ្គ ២៤ ក្រុម នា​ខែ​​មិថុនា និង កក្កដា ឆ្នាំក្រោយ ប៉ុន្តែ​ការ​រឹតបន្តឹង លើ​គោលនយោបាយ ទប់ស្កាត់​ការ​រាតត្បាត ជំងឺ​កូ​វីដ​-១៩ របស់​ប្រទេស​នេះ (​ចិន​) បានធ្វើ​ឲ្យ​លទ្ធផល នៃ​ការរៀបចំ​ព្រឹត្តិការណ៍​នេះ ត្រូវបាន​ផ្លាស់ប្តូរ​វិញ​។​

AFC បាន​ឲ្យ​ដឹង នៅក្នុង​សេចក្តីថ្លែងការណ៍ ខណៈ​កាលពីពេល មុន​កាលកំណត់ គឺ​នៅ​​ត្រឹម​ថ្ងៃទី​៣០ ខែមិថុនា តែប៉ុណ្ណោះ​។ តែ​ពេលនេះ អ្វីៗ​ត្រូវបាន​ផ្លាស់ប្ដូរ ពី​ការចូលរួម​ដេញថ្លៃ របស់​ពួកគេ នៅត្រឹម​ថ្ងៃទី​១៥ ខែកក្កដា ឆ្នាំ​២០២២​។​

​កាលពី​សប្តាហ៍​មុន សមាគម​បាល់ទាត់​កូរ៉េខាងត្បូង បាន​បញ្ជាក់ថា ខ្លួន​នឹងចូលរួម​ដេញថ្លៃ ដើម្បី​ធ្វើជា​ម្ចាស់ផ្ទះ ខណៈ​ជប៉ុន បាន​ឲ្យ​ដឹង​កាលពី​ខែឧសភា​ថា ខ្លួន​បាន​ទាក់ទង​ក្រៅផ្លូវការ ស្តីពី​ការ​អាច​ជំនួស​ចិន ក្នុង​ការធ្វើជា​ម្ចាស់ផ្ទះ​នេះដែរ​។

​សហព័ន្ធ​កីឡាបាល់ទាត់​អូស្ត្រាលី បានលើកឡើង​ថាៈ ខ្លួន​ក៏​កំពុងតែ​ថ្លឹងថ្លែង អំពី​ការចូល​​រួម​ដេញថ្លៃ សម្រាប់​ព្រឹត្តិការណ៍​នេះដែរ​៕/V​