​ដោយៈ ស​រិ​ទ្ធ / កណ្តាល​: ជនសង្ស័យ ១៨ នាក់ ដែល​ក្លែង​ជា​សង្ឃភេទ ហើយ​ដែល​តែងតែ ធ្វើ​សកម្មភាព​ដើរ​បិណ្ឌ​បាត្រ យកប្រាក់​ពី​ប្រជាពលរដ្ឋ ជាពិសេស​តាម​តំបន់​រោងចក្រ ដែលមាន​មនុស្ស​ច្រើន​នោះ ឥឡូវនេះ បាន​ត្រូវ​ផ្ដន្ទាទោស​ឱ្យ​ជាប់ពន្ធនាគា​រហើយ ។​

លោក វ៉ាន់ សុ​បញ្ញា និង​លោក ថោង ផល្លា​រង្សី ដែល​លោក​ទាំងពីរ ជា​ចៅក្រម​ស៊ើបសួរ សាលាដំបូង​ខេត្តកណ្តាល បានសម្រេច​ចេញ​ដីកាឃុំខ្លួន ក្រុម​សង្ឃ​ក្លែងក្លាយ ចំនូ​ន ១៨ នាក់ ដាក់ពន្ធនាគារ បណ្តោះអាសន្ន កាលពី​ល្ងាច ថ្ងៃទី​២៨ ខែមិថុនា ឆ្នាំ​២០២២​។​

​ការសម្រេច​ឃុំខ្លួន​ក្រុម​សង្ឃ​ក្លែងក្លាយ​ទាំងនេះ គឺ​បន្ទាប់ពី​លោក ឯក ស៊ុន​រស្មី ព្រះរាជអាជ្ញារង អម​សាលាដំបូង​ខេត្តកណ្តាល សម្រេច​ចោទប្រកាន់​ពីបទ «​ឆបោក ស្លៀកពាក់​បែប ព្រះពុទ្ធសាសនា ដោយ​គ្មាន​សិទ្ធិ​ប្រើប្រាស់ ឯកសារ​សាធារណៈ​ក្លែង និង​ប្រើប្រាស់ ដោយ​ខុសច្បាប់ នូវ​សារធាតុ​ញៀន​» តាម​មាត្រា ៣៧៧ , មាត្រា ៣៧៨ និង​មាត្រា ៥០៨ នៃ ក្រមព្រហ្មទណ្ឌ និង​មាត្រា ៤៥ នៃ​ច្បាប់​ស្តីពី​ការត្រួតពិនិត្យ​គ្រឿងញៀន ។ បទល្មើស​ទាំងនេះ បាន​ប្រព្រឹត្ត​ជា​បន្តបន្ទាប់ នៅ​ថ្ងៃទី​២៧ ខែមិថុនា ឆ្នាំ​២០២២ តាម​បណ្ដោយ​ផ្លូវជាតិ​លេខ​៥១ ភូមិ​អង្គ​តា​សិត ឃុំ​ទួល​ព្រេជ ស្រុក​អង្គស្នួល ខេត្តកណ្តាល​។​

​សមត្ថកិច្ច បានឱ្យដឹងថាៈ កម្លាំង​ប៉ុស្ដិ៍នគរបាល​ទួល​ព្រេជ បាន​ទទួលបាន​ព័ត៌មាន ពី​ប្រជាពលរដ្ឋ​ថា ឃើញ​មាន​រថយន្ត​ម៉ាក​តូយ៉ូតា ហាយ​ឡែ​ន​ឌ័​រ ឆ្នាំ​២០០៧ ពណ៌​ទឹកមាស ពាក់​ផ្លាកលេខ ខេមរភូមិន្ទ មួយគ្រឿង បាន​ដឹក​ព្រះសង្ឃ​មួយចំនួន ហើយ​ចុះ​បិណ្ឌ​បាត្រ នៅមុខ​រោងចក្រ តាម​បណ្ដោយ​ផ្លូវ​លេខ​៥១ ។ ក្រោយពី​ទទួលបាន​ព័ត៌មាន ប៉ុស្ដិ៍នគរបាល ទួល​ព្រេជ សហការ​ជាមួយ​កម្លាំង​អន្តរាគមន៍​ស្រុក​អង្គស្នួល បាន​និមន្ត​ព្រះសង្ឃ ទៅ​វត្ត​អង្គ​ព​ពាយ ឃុំ​ក្រាំង​ម្កាក់ ស្រុក​អង្គស្នួល ដើម្បី​បន្ត​នីតិវិធី ។​

​ក្រោយពី​ការសួរនាំ​រួច ទើប​ជនសង្ស័យ ឈ្មោះ ទូច វិច្ឆិកា សារភាពថា ខ្លួន និង​បក្ខពួក មិនមែនជា​ព្រះសង្ឃ ពិតប្រាកដ​ឡើយ ដោយ​ខ្លួន​និង​បក្ខពួក បាន​ពាក់​ស្បង់​ចីវរ ជា​ព្រះសង្ឃ ដើម្បី​បិណ្ឌ​បាត្រ​យក​បច្ច័យ មក​ដោះស្រាយ​ជីវភាព ក្នុង​គ្រួសារ​ប៉ុណ្ណោះ​៕/V