​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អូស្ត្រាលី​កំពុង​ស្វែងរក​មធ្យោបាយ​ថ្មី​ដើម្បី​គាំទ្រ​អ៊ុយ​ក្រែន​បន្ទាប់​ពី​ការលុកលុ​យរបស់​រុស្ស៊ី នេះ​បើ​តាម​នាយករដ្ឋមន្ត្រី​ស្តីទី​។​

​ឧបនាយករដ្ឋមន្ត្រី រី​ឆាត ម៉ា​ឡេស (Richard Marles) បាន​និយាយថា រហូតមកទល់​ពេលនេះ អូស្ត្រាលី​បាន​សន្យា​ផ្តល់​ជំនួយ​ជិត ៣០០ លាន​ដុល្លារ​ដល់​អ៊ុយ​ក្រែន​ទោះបីជា​ជំនួយ​ទាំងអស់​នៅ​មិន​​ទាន់​បាន​ប្រគល់​រួច​ក៏​ដោយ​។​

​ខណៈ​ឯកអគ្គរដ្ឋទូត​អ៊ុយ​ក្រែន​ប្រចាំ​នៅ​អូស្ត្រាលី លោក វ៉ា​ស៊ី​ល មី​រ៉ូ​ស្នី​ឈិន​កូ (Vasyl Myroshnychenko) បាន​អំពាវនាវ​ឱ្យមាន​ការបញ្ជូន​រថពាសដែក Bushmaster​បន្ថែម​ទៀត​ទៅ​​កាន់​ប្រជាជាតិ​អឺរ៉ុប​ខាងកើត​នេះ លោក​ម៉ា​ឡេស​បាន​យល់ស្រប​ថា​ការផ្តល់​ជំនួយ​គឺជា​រឿង​ចាំបាច់​។​

​រដ្ឋមន្ត្រី​ការពារជាតិ​បាន​ប្រាប់​អ្នកយកព័ត៌មាន​នៅ​ទីក្រុង​កង់​បេរ៉ា​កាលពី​ថ្ងៃ​អង្គារទី​២៨​មិថុនា​ថា “​យើង​ក៏​កំពុង​សម្លឹង​មើល​មធ្យោបាយ​បន្ថែម ដែល​យើង​អាច​គាំទ្រ​ដល់​អ៊ុយ​ក្រែន​ផងដែរ​”​។​

“​ខណៈ​អ៊ុយ​ក្រែន​ស្ថិតនៅ​ឆ្ងាយ​ពី​អូស្ត្រាលី យើង​ពិតជា​មើលឃើញថា គោលការណ៍​នានា ដែល​ប្រឈម​ហានិភ័យ​នៅក្នុង​ជម្លោះ​នេះ​ដែល​សំខាន់​សម្រាប់​សណ្តាប់ធ្នាប់​ពិភពលោក​ផ្អែកលើ​ច្បាប់​សកល​​ដែល​អូស្ត្រាលី​គាំទ្រ​និង​ជួយ​កសាង​និង​ការពារ គឺ ចាំបាច់​ត្រូវ​ការពារ​នៅ​គ្រប់​ទីកន្លែង​”​។

​ខណៈ​នាយករដ្ឋមន្ត្រី អាន​ថូ​នី អា​បា​នី​ស (Anthony Albanese) ថ្លឹងថ្លែង​ការអញ្ជើញ​ឱ្យទៅ​ធ្វើ​ទស្សនកិច្ច​នៅ​ប្រទេស​ហែកហួរ​ដោយ​សង្គ្រាម​នេះ លោក​មី​រ៉ូ​ស្នី​ឈិន​កូ​បាន​និយាយ​ថា​អូស្ត្រាលី​​គឺជា​សម្ពន្ធមិត្ត​ដ៏​សំខាន់​មួយ​របស់​អ៊ុយ​ក្រែន​ប្រឆាំងនឹង​ការឈ្លានពាន​របស់​រុស្ស៊ី​។​

​លោក​បាន​ប្រាប់​ទូរទស្សន៍ Sky News កាលពី​ថ្ងៃ​អង្គារ​ថា “​អូស្ត្រាលី​កំពុង​ចូលរួម​ពាក់ព័ន្ធ​។ វា​មាន​ទំនៀមទម្លាប់​មួយ​នៅ​អូស្ត្រាលី ដែល​ប្រឆាំង​នឹង​ឥរិយាបថ​គំរាមកំហែង ហើយ​នាយក​រដ្ឋមន្ត្រី​អាល់​បាណេ​សយល់​រឿងនេះ​យ៉ាងច្បាស់​”​។​

“(​រដ្ឋាភិបាល​ថ្មី​) មិនទាន់​អាច​ប្រកាស​អំពី​កញ្ចប់​ជំនួយ​ថ្មី​ណាមួយ​បាន​នៅឡើយ​ទេ ប៉ុន្តែ​ខ្ញុំ​ប្រាកដថា ជំនួយ​កំពុងដំណើរការ​”៕

ជំនួយ​៣០០​លាន​ដុល្លារ​សន្យា​ដោយ​អូស្ត្រាលី​ក៏​រួម​បញ្ចូល​រថពាសដែក Bushmaster​ដែរ