​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ទីបំផុត​អង្គការ​ណា​សាបាន​បាញ់​បង្ហោះ​យានអវកាស CAPSTONE របស់ខ្លួន​កាលពី​ព្រឹក​ថ្ងៃ​អង្គារ ទី​២៨​មិថុនា​ដើម្បី​សម្គាល់​ដំណាក់កាល​ដំបូង​ដ៏​សំខាន់​​នៅក្នុង​កម្មវិធី​អវកាស Artemis របស់ខ្លួន​។​

​យាន​ប៉ុន​ម៉ាស៊ីន​ម៉ៃក្រូ​វ៉េវ​និង​មាន​ទម្ងន់​ត្រឹម​តែ ២៥ គីឡូក្រាម​នេះ​បាន​បាញ់​បង្ហោះ​ចេញពី​ឧបទ្វីប​ម៉ា​ហ៊ី​អា (Māhia)​ប្រទេស​នូវែ​លសេ​ឡង់​នៅ​ម៉ោង ១០៖៥៥ ។​

​យាន​នេះ​នឹង​សាកល្បង​មើល​ស្ថិរភាព​នៃ​គន្លង​រាង​ពងក្រពើ​នៅ​ជុំវិញ​ព្រះ​ចន្ទ​សម្រាប់​រយៈពេល​ជាង​ប្រាំ​មួយខែ មុន​ពេល​គន្លង​នេះ​ត្រូវបាន​ប្រើប្រាស់​ដោយ​យាន Lunar Gateway​ដែល​ជា​យាន​​គោចរ​នៅ​គន្លង​ព្រះ​ចន្ទ​របស់​ណា​សា​។​

​យាន Lunar Gateway ដែល​គ្រោង​នឹង​បាញ់​បង្ហោះ​នៅ​ឆ្នាំ ២០២៤ នឹង​បម្រើ​ជា “​តំបន់​ដំណាក់កាល​” សម្រាប់​មនុស្ស​ចុះចត​លើ​ឋាន​ព្រះ​ចន្ទ​ជា​លើកដំបូង​ក្នុង​រយៈពេល ៥០ ឆ្នាំ​និង​មាន​សក្តានុពល​​ក្លាយជា​ចំណុច​សំចត​សម្រាប់​បេសកកម្ម​ទៅ​កាន់​ភព​ព្រះ​អង្គារ​ផងដែរ​។​

​យាន​អវកាស CAPSTONE ដែល​ដើមឡើយ​គ្រោង​បាញ់​បង្ហោះ​នៅ​ខែតុលា ឆ្នាំ ២០២១ ត្រូវបាន​បញ្ជូន​ទៅ​កាន់​ទី​អវកាស​នៅលើ​រ៉ុក្កែត “Electron” ដែល​ផលិត​ដោយ​ក្រុមហ៊ុន​អាម៉េរិក Rocket Lab ។​

​យាន​នេះ​មាន​លក្ខណៈ​ពិសេស​ត្រង់​ថា វា​នឹង​ធ្វើដំណើរ​លើ​គន្លង​រាង​ពងក្រពើ ដែល​នឹង​នាំ​វា​ខិត​ជិត​បំផុត ១.៦០០ គីឡូម៉ែត្រ​និង​ឆ្ងាយ​បំផុត ៧០.០០០ គីឡូម៉ែត្រ​ពី​ផ្ទៃ​ព្រះ​ចន្ទ​។​

​វា​នឹង​ប្រើ​ប្រព័ន្ធ​រុញ​របស់​វា​ដើម្បី​ធ្វើដំណើរ​ប្រហែល​ពី​បី​ទៅ​បួន​ខែ​មុននឹង​ចូល​ទៅ​ក្នុង​គន្លង​ជុំវិញ​ព្រះ​ចន្ទ​។ គន្លង​មួយ​នឹង​កើតឡើង​រៀង​រាល់​ប្រាំពីរ​ថ្ងៃ​ម្តង​៕

​យាន​អវកាស CAPSTONE ត្រូវ​បាន​បាញ់​បង្ហោះ​តាម​រ៉ុក្កែត Electron កាលពី​ថ្ងៃ​អង្គារ​នៅ​ឧបទ្វីប​ម៉ា​ហ៊ី​អា ប្រទេស​នូវែ​លសេ​ឡង់