​ដោយៈ តាកែវ / តាកែវៈ នៅ​រសៀល ថ្ងៃទី​២៩ ខែមិថុនា ឆ្នាំ​២០២២ នេះ លោក កង អាណាន់ អភិបាលក្រុង​ដូន​កែវ និង​ជា​ប្រធាន​គណៈបញ្ជាការ​ឯកភាព​ក្រុង បាន​ដឹកនាំ​កិច្ចប្រជុំ ដើម្បី​ណែនាំ និង​ចាត់វិធានការ បន្ទាន់ ជាមួយ​កងកម្លាំង​សមត្ថកិច្ច​គ្រប់​ប្រភេទ និង​គណៈ​គ្រប់គ្រង​សាលា​ទាំងអស់ នៅ​ទូទាំង​ក្រុង​ដូន​កែវ លើ​បញ្ហា​បារី​អេឡិចត្រូនិក (e-cigarette) ដែល​កំពុង​ចរាចរ​ប្រើប្រាស់ និង​ជួញដូរ​យ៉ាងច្រើន នៅក្នុង​ក្រុង ពិសេស នៅតាម​រង្គសាល មណ្ឌល​កម្សាន្ត ភោជនីយដ្ឋាន តំបន់​ទេសចរណ៍ និង​សា​សា​រៀន ទាំង​រដ្ឋ និង​ឯកជន​។​

​ក្នុង​កិច្ចប្រជុំ​នោះ បានធ្វើ​ឡើង ក្រោយពី​មាន​សេចក្តីណែនាំ ពី​ក្រសួង​អប់រំ យុវជន និង​កីឡា ស្តីពី​ការទប់ស្កាត់ ការប្រើប្រាស់​បារី​អេឡិចត្រូនិក ដែល​កំពុង​ជះឥទ្ធិពល​ខ្លាំង​នៅក្នុង​សង្គម បច្ចុប្បន្ន ធ្វើឱ្យ​យុវវ័យ និង​មនុស្សពេញវ័យ មួយចំនួន នាំគ្នា​ប្រើប្រាស់ ទាំង​មិន​បានគិត ពី​ផលប៉ះពាល់ ដល់​សុខភាព ទៅ​ថ្ងៃមុខ ស្តីពី​ការប្រើប្រាស់​បារី​អេឡិចត្រូនិក ដែល​ហៅថា E-cigarette/Vape និង​ផលិតផល HTPs នោះ​។​

​ក្នុង​កិច្ចប្រជុំ​នោះដែរ​លោក​អភិបាលក្រុង​ដូន​កែវ បាន​ជំរុញ​ឱ្យ​សមត្ថកិច្ច និង​គណៈ​គ្រប់គ្រង សាលា​ទាំងអស់ ត្រូវ​កំណត់​មុខសញ្ញា​អ្នកប្រើប្រាស់ រួច​ធ្វើ​ការដកហូត​សំភារៈ និង​ហៅ​មក​ធ្វើ កិច្ចសន្យា​អប់រំ ជា​លើកដំបូង ព្រមទាំង​បន្ត​ស្វែងរក​មុខសញ្ញា​ពាក់ព័ន្ធ និង​ទីតាំង​លក់​សំភារៈ បារី​អេឡិចត្រូនិក​នេះ ៕/V​