ប្រែ​សម្រួលៈ​បំណង​(​ដេល្លី​ម៉េល​)៖ សហរដ្ឋ​អាម៉េរិក​នឹង​បន្ថែម​កម្លាំង​ការពារ​របស់​អឺរ៉ុប​ជាមួយ​នឹង​ការបញ្ជូន​និង​ដាក់ពង្រាយ​ទ័ព​ថ្មី​មួយ នេះ​បើ​តាម​ប្រធានាធិបតី​អាម៉េរិក​បាន​ប្រកាស​កាល​ពី​ថ្ងៃ​ពុធ​ទី​២៩​មិថុនា នៅពេល​កាំជ្រួច​របស់​រុស្ស៊ី​បុក​ចូល​បណ្តា​ទីក្រុង​អ៊ុ​យក្រែន​។​

​ព័ត៌មាន​អំពី​ផែនការ​អាម៉េរិក​នេះ​កើតឡើង​ចំពេល​ពួក​មេដឹកនាំ​អង្គការ​ណា​តូ​ជួបប្រជុំគ្នា​ដើម្បី​ស្វាគមន៍​ស៊ុយអែត​និង​ហ្វាំង​ឡ​ង់​ជា​បេក្ខជន​ដើម្បី​ចូលរួម​ក្នុង​បក្ខ​សម្ពន្ធ​យោធា​របស់​ខ្លួន​ដែល​វា​ជា​ការ​វាយ​​សំពង​ទ្វេដង​លើ​ប្រធានាធិបតី​រុស្ស៊ី​លោក វ្ល៉ា​ឌី​មៀ ពូ​ទីន និង​កិច្ច​ខិតខំ​របស់លោក​ដើម្បី​គូស​ផែនទី​សន្តិសុខ​អឺរ៉ុប​ជាថ្មី​។​

​ប្រធានាធិបតី​អាម៉េរិក​ ចូ បៃដិន

​លោកបៃ​ដិនបាន​អួតថា ការប្រកាស​របស់​អាម៉េរិក​គឺជា​អ្វី​ដែល​ពូ​ទីន​«​មិន​ចង់បាន​»​និង​រដ្ឋាភិបាល​ទីក្រុង​មូ​ស្គូ​បាន​ប្រតិកម្ម​ទាំង​កំហឹង​ដោយ​បាន​ថ្កោលទោស​ផែនការ​ពង្រីក​ណា​តូ​នេះ​ថា​ជា​«​ទង្វើ​ធ្វើ​​អោយ​បាត់បង់​ស្ថិរភាព​»​ហើយ​ចោទប្រកាន់​ណា​តូ​ថា​ស្វះស្វែង​ទប់​រុស្ស៊ី​មិន​អោយ​ងើប​រួច​។​

​នៅពេល​ក្រុម​មេដឹកនាំ​លោកខាងលិច​ជួបប្រជុំ​គ្នា​នៅ​ទីក្រុង​ម៉ា​ឌ្រី​ត នៅ​អ៊ុយ​ក្រែន​ពួកម​ន្ត្រី​បាន​ត្អូញត្អែរថា កាំជ្រួច​របស់​រុស្ស៊ី​បាន​ធ្លាក់ចំ​ផ្ទះ​ជន​ស៊ីវិល​និង​ហាង​លក់ដូរ​នៅក្នុង​និង​ជុំវិញ​ទីក្រុង ឌី​នី​ប្រូ​( Dnipro) មី​កូឡាអ៊ីវ​(Mykolaiv)​និង​ខា​គី​វ​(Kharkiv) ដោយ​បណ្តាលអោយ​ស្លាប់​មនុស្ស​យ៉ាងតិច​៧​នាក់​និង​របួស​១៤​នាក់​។​

​នៅ​ទីក្រុង​ក្រេ​មិន​ឈុ​ក​(Kremenchuk) កន្លែង​ដែល​កាំជ្រួច​រុស្ស៊ី​បាន​បំផ្លាញ​ផ្សារ​លក់ដូរ​មួយ​និង​សម្លាប់​ជន​ស៊ីវិល​១៨​នាក់ ប្រតិបត្តិការ​បោសសម្អាត​នៅ​បន្ត​។​

​ក្រុម​មេដឹកនាំ​លោក​ខាងលិច​បាន​ហៅ​ការវាយប្រហារ​នៅ​ក្រេ​មិន​ឈុ​កថា​ជា​ឧក្រិដ្ឋកម្ម​សង្គ្រាម​មួយ ហើយ​ប្រធានាធិបតី​អ៊ុយ​ក្រែនលោក ហ្សេ​លេន​ស្គី​បានទាមទារ​អោយ​ក្រុម​ស៊ើបអង្កេត​អន្តរជាតិ​ចូល​​មក​ទស្សនា​។​រុស្ស៊ី​បាន​និយាយថា ខ្លួន​វាយប្រហារ​តែ​លើ​ឃ្លាំង​ស្តុក​ទុក​អាវុធ​លោកខាងលិច​មួយ​ប៉ុណ្ណោះ​។​

​ក្នុងពេល​ជាមួយគ្នា ក្រសួងការពារជាតិ​រុស្ស៊ី​បាន​និយាយថា ខ្លួន​បាន​បង្ក​ការខូចខាត​ធ្ងន់ធ្ងរ​លើ​ទាហាន​អ៊ុ​យក្រែន ដែល​ការពារ​ទីក្រុង​លី​ស៊ី​ចាន់​ស​ខ៍​(Lysychansk)​នៅ​តំបន់​ដុន​បាស​និង​ថា​ការ​វាយ​​ប្រហារ​នៅ​ក្រុង​ខា​គី​វ បាន​ត្រូវ​ចំ​មជ្ឈមណ្ឌល​បញ្ជាការ​អ៊ុយ​ក្រែ​ន​និង​មូលដ្ឋាន​ហ្វឹកហាត់​មួយ​សំរាប់​ទាហាន​ស៊ីឈ្នួល​បរទេស​។​

​អាម៉េរិក​បាន​ប្រកាស​ថា​ក្រោយ​ទទួលយក​បេក្ខភាព​របស់​ស៊ុយអែត​និង​ហ្វាំង​សំរាប់​ចូល​ជា​សមាជិក​អង្គការ​ណា​តូ រដ្ឋាភិបាល​ទីក្រុង​វ៉ាស៊ីនតោន​នឹង​រើ​ទីបញ្ជាការ​របស់​កងពល​ទី​ប្រាំ​របស់​ខ្លួន​មកកាន់​ប៉ូឡូញ​​។​កងកម្លាំង​មួយ​កងពល​តូច​នឹង​ផ្លាស់ប្តូរ​គ្នា​ចេញចូល​រ៉ូ​ម៉ានី និង​យន្តហោះ​ប្រយុទ្ធ​F-35​ពី​រកង​នឹង​ត្រូវ​បញ្ជូន​ទៅ​កាន់​អង់គ្លេស ប្រព័ន្ធ​ការពារ​ដែនអាកាស​នឹង​បញ្ជូន​ទៅ​កាន់​អាល្លឺម៉ង់​និង​អ៊ីតាលី ហើយ​​កង​នាវា​ពិឃាត​នៅអេ​ស្ប៉ា​ញនឹង​បង្កើន​ពីបួន​គ្រឿង​ដល់​ប្រាំ​មួយគ្រឿង​។​

​ចំណែក​អគ្គលេខា​អង្គការ​ណា​តូ លោក ជេ​ន ស្តូល​ថិ​ន​ប៊ឺក បាន​និយាយថា​ការពង្រីក​របស់​ណា​តូ​វា​ផ្ទុយ​ពីអ្វី​ដែល​ពូ​ទីន​សង្ឃឹម​ចង់បាន និង​ថា​ក្រុម​ដឹកនាំ​ក្នុង​កិច្ចប្រជុំ​នេះ​បាន​បញ្ជាក់​ច្បាស់​ថា​«​រុស្ស៊ី​បង្ក​ការ​​គំរាម​ផ្ទាល់​មួយ​ចំពោះ​សន្តិសុខ​របស់​យើង​»៕

លោក ជេ​ន ស្តូល​ថិ​ន​ប៊ឺក បាន​និយាយថា​ក្រុម​ដឹកនាំ​ក្នុង​កិច្ចប្រជុំ​នេះ​បាន​បញ្ជាក់​ច្បាស់​ថា​«​រុស្ស៊ី​បង្ក​ការ​គំរាម​ផ្ទាល់​មួយ​ចំពោះ​សន្តិសុខ​របស់​យើង​»