​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អាជ្ញាធរ​និង​និយោជក​របស់​គាត់​បាន​និយាយ​កាលពី​ថ្ងៃ​ពុធ​ទី​២៩​មិថុនា​ថា អ្នកយក​ព័ត៌មាន​ម៉ិក​ស៊ិកម្នាក់​ត្រូវបាន​សម្លាប់​នៅក្នុងរ​ដ្ឋ​ព្រំដែន​ភាគ​ខាងជើង​​ពោរពេញ​អំពើហិង្សា​បំផុត​មួយ​របស់​ប្រទេស​នេះ ដែល​នេះ​ជា​ការវាយប្រហារ​ចុងក្រោយ​បំផុត​នៅក្នុង​ប្រទេស​ដែល​មាន​គ្រោះថ្នាក់​បំផុត​មួយ​នៅ​លើ​ពិភពលោក​សម្រាប់​អ្នកកាសែត​។​

​លោក អង់​តូ​នីញ៉ូ ដេ ឡា គ្រូ​ស (Antonio de la Cruz) ជា​អ្នកកាសែត​សម្រាប់​កាសែត​ក្នុងស្រុក Expreso ត្រូវបាន​បាញ់សម្លាប់​នៅក្នុង​ផ្ទះ​របស់​គាត់​ក្នុង​ទីក្រុង​ស៊ីវ​ដា​ដ វី​ក​តូ​រៀ (Ciudad Victoria) រដ្ឋ​តា​មូលី​ប៉ាស (Tamaulipas) នេះ​យោង​តាម​កាសែត​ដែល​គាត់​ធ្វើការ​ឱ្យ​។​

​រដ្ឋ​តា​មូលី​ប៉ាស​គឺជា​រដ្ឋ​ឈូង​សមុទ្រ ដែល​ស្ថិត​ភាគខាងត្បូង​នៃ​រដ្ឋ​តិច​សាស់ជា​កន្លែង​ដែល​ក្រុម​ជួញដូរ​គ្រឿងញៀន​ដ៏​ឃោរឃៅ​ប្រយុទ្ធ​គ្នា​ដណ្តើម​ផ្លូវ​រត់ពន្ធ​គ្រឿងញៀន​ដ៏​កាក់កប​។ អ្នកកាសែត​ក្នុងស្រុក​ដែល​ផ្ដោត​លើ​ឧក្រិដ្ឋកម្ម​និង​អំពើពុករលួយ គឺ​ងាយ​រងគ្រោះ​ណាស់​។​

​ការស្លាប់​របស់​លោកគ្រូ​ស​កើតឡើង​បន្ទាប់​ពី​បុគ្គលិក​ប្រព័ន្ធ​ផ្សព្វផ្សាយ​យ៉ាងតិច​ប្រាំបី​នាក់​ផ្សេង​ទៀត​ត្រូវបាន​សម្លាប់​ក្នុងប្រទេស​ម៉ិក​ស៊ិ​កក្នុងឆ្នាំនេះ ដោយសារតែ​ការរាយការណ៍​ព័ត៌មាន​របស់​ពួកគេ នេះ​បើ​យោង​តាម​កម្មវិធី​ដែល​មានឈ្មោះ​ថា “​មាត្រា ១៩” របស់​អង្គការ​សិទ្ធិមនុស្ស​។​

​លោក លី​អូ​ប៉ុល​ដូ ម៉ាល់​ដូ​ណា​ដូ (Leopoldo Maldonado) នាយក​ប្រចាំ​តំបន់​នៃ​កម្មវិធី​មាត្រា​១៩ នៅ​ម៉ិក​ស៊ិកនិង​អាម៉េរិក​កណ្តាល​បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័​រថា តម្រុយ​ដំបូង​”​លើក​​ឡើង​ថា ឃាតកម្ម​របស់គាត់​អាច​ជាប់​ទាក់ទង​នឹង​ការរិះគន់​ខាង​នយោបាយ​របស់​គាត់​” ក្នុងនាម​ជា​អ្នកកាសែត​។​

​កូនស្រី​របស់​អ្នកកាសែត​រូបនេះ​បាន​រងរបួស​ក្នុង​ការវាយប្រហារ​។ អភិបាលរដ្ឋ​តា​មូលី​ប៉ាស លោក ហ្វ្រង់​ស៊ី​ស្កូ ហ្គាសៀ ខាបេ​ហ្សា ដេ វ៉ា​កា (Francisco Garcia Cabeza de Vaca)​បាន​និយាយ​​កាលពី​រសៀល​ថ្ងៃ​ពុធ​ថា នាង​កំពុង​ស្ថិតក្នុង​ស្ថានភាព​ធ្ងន់ធ្ងរ​។​

​លោក​អភិបាល​បាន​និយាយថា “​យើង​នឹង​មិន​ឈប់​ទេ​ដរាបណា​យើង​រកឃើញ​អ្នកទទួលខុសត្រូវ ហើយ​យើង​នឹង​ផ្តន្ទាទោស​ពួក​គេ​ដោយ​ទម្ងន់​ច្បាប់​ពេញទំហឹង​”​។​

​ក្រុមហ៊ុន​មេ La Razon របស់​កាសែត Expreso បានទាមទារ​យុត្តិធម៌​។​

​ការិយាល័យ​អគ្គ​រដ្ឋអាជ្ញា​របស់​រដ្ឋ​តា​មូលី​ប៉ាស​បានឱ្យ​ដឹង​នៅក្នុង​សេចក្តីថ្លែងការណ៍​មួយ​ថា ខ្លួន​បាន​បើក​ការស៊ើបអង្កេត ហើយ​ប៉ូលិស​កំពុង​ប្រមូល​ភស្តុតាង និង​តាម​ប្រមាញ់​ជន​វាយប្រហារ​។​លោក​អភិ​​បាល​បាន​និយាយថា ការិយាល័យ​នឹង​ផ្តល់​បច្ចុប្បន្នភាព​ក្នុង​រយៈពេល​ច្រើន​ម៉ោង​ទៀត​៕

​លោក អង់​តូ​នីញ៉ូ ដេ ឡា គ្រូ​ស គឺជា​អ្នកកាសែត​ទី​៩​ហើយ​ដែល​គេ​សម្លាប់​នៅ​ម៉ិក​ស៊ិកក្នុង​ឆ្នាំ​២០២២