​ប្រែ​សម្រួលៈ​បំណង​(ST)៖ ប្រធានាធិបតី​ឥណ្ឌូនេស៊ី​លោក ចូកូ វី​ដូ​ដូ​(Joko Widodo)​ហៅ “​ចូ​កូវី​” កាលពី​ថ្ងៃ​ពុធ​ទី​២៩​មិថុនា បាន​សុំ​ពាំនាំ​សារ​អ្វីមួយ​ពី​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​ឡេន​ស្គី ទៅកាន់​ប្រធានាធិបតី​រុស្ស៊ី​លោក វ្ល៉ា​ឌី​មៀ ពូ​ទីន ដើម្បី​ព្យាយាម​ជំរុញ​ក្តី​សង្ឃឹម​អំពី​សន្តិភាព​។​

​លោក​ចូកូ វី​ដូ​ដូ ស្វាគមន៍​លោក វ៉ូ​ឡូ​ឌី​មៀ ហ្សេ​ឡេន​ស្គី ក្នុងអំឡុង​ជំនួប​របស់​អ្នក​ទាំង​ពីរ​នៅ​ទីក្រុង​គៀវ​កាលពី​ថ្ងៃ​២៩​មិថុនា​

​វា​មិន​ទាន់​ដឹង​ច្បាស់​ថា​តើ​លោក​ហ្សេ​ឡេន​ស្គី​បាន​ឆ្លើយតប​នឹង​សំណើ​នេះ​យ៉ាងណា​ក្នុងអំឡុងពេល​ពួក​លោក​បាន​ជួបគ្នា​នៅ​ទីក្រុង​គៀវ ឬក៏​ថា​តើ​មេដឹកនាំ​អ៊ុយ​ក្រែន​មានសារ​អ្វីមួយ​ដែល​លោក​ចង់​ផ្ញើ​ទៅ​​កាន់​លោកពូ​ទីន​។​

​លោក វី​ដូ​ដូ ជា​ប្រធាន​អង្គការ​ប្រទេស​មាន​ឧស្សាហកម្ម​ជឿនលឿន​ទាំង​ម្ភៃ(G-20)​និង​ជា​មេដឹកនាំ​ម្នាក់​ក្នុងចំណោម​មេដឹកនាំ​ប្រាំមួយ​នាក់​ដែល​អង្គការសហប្រជាជាតិ​បាន​តែងតាំង​ជា​ប្រធាន​”​ក្រុម​ឆ្លើយតប​វិបត្តិ​សកល​”​មួយ​សំរាប់​ដោះស្រាយ​ការ​គំរាម​អំពី​ការអត់ឃ្លាន​និង​ស្ថានការណ៍​ធ្លាក់​ចុះ​ដោយសារ​តែ​សង្គ្រាម​នៅ​អ៊ុ​យក្រែន​។​

​លោក​វី​ដូ​ដូ ត្រូវ​ទៅ​ដល់​ទីក្រុង​មូ​ស្គូ ដើម្បី​ជួប​លោក​ពូ​ទីន​នៅ​ថ្ងៃ​ព្រហស្បតិ៍​ទី​៣០​មិថុនា និង​បាន​និយាយថា​លោក​បាន​ទទូច​សុំ​ប្រធានាធិបតី​រុស្ស៊ី​អោយ​យល់ព្រម​លើ​បទ​ឈប់​បាញ់​គ្នា​មួយ​។​

​កិច្ចពិភាក្សា​ស្វែងរក​សន្តិភាពរ​វាងរដ្ឋាភិបាល​ទីក្រុង​មូ​ស្គូនិង​ទីក្រុង​គៀវ បាន​ជាបគាំង ដោយសារ​ភាគី​ម្ខាងៗ​បន្ទោស​គ្នា​។​

​ក្រោយ​ជួបពិភាក្សា​ជាមួយ​លោក​ហ្សេ​ឡេន​ស្គី លោក​វី​ដូ​ដូ បាន​និយាយថា​« ទោះជា​វា​ពិបាក​នឹង​សំរេចបាន ខ្ញុំ​បាន​សម្តែង​អំពី​សារសំខាន់​នៃ​ដំណោះស្រាយ​ស្វែងរកសន្តិភាព​មួយ​។​ខ្ញុំ​បាន​សុំ​នាំសារ​ពី​ប្រធានាធិបតី​​ហ្សេ​ឡេន​ស្គី ទៅកាន់​លោក​ប្រធានាធិបតី ពូ​ទីន ដែល​ខ្ញុំ​នឹង​ជួបពិភាក្សា​ក្នុងពេល​ឆាប់ៗ​»​។​

​ប្រធានាធិបតី​ឥណ្ឌូនេស៊ី​បាន​និយាយថា លោក​ប្តេជ្ញា​ដោះស្រាយ​កំណើន​ថ្លៃ​ស្បៀង​និង​ថាមពល ព្រមទាំង​កង្វះខាត​ទំនិញ​ទាំង​ពីរ​ចាប់តាំងពី​ពេលផ្ទុះសង្រ្គាមនៅអ៊ុយក្រែន​។​លោក​ថា​«​កិច្ចខិតខំ​គ្រប់យ៉ាង​គឺ​ដើម្បី​​ធានាថា អ៊ុយ​ក្រែន​អាច​បន្ត​ការនាំ​ចេញ​គ្រាប់ធ​ញ្ញ​ជា​តិ​»​។​

​លោក​វី​ដូ​ដូ ដែល​បាន​ទៅដល់​ទីក្រុង​គៀវ ជាមួយ​ភរិយា​លោកស្រី​អ៊ី​រី​យ៉ាណា ចូកូ វី​ដូ​ដូ​(Iriana Joko Widodo)​ក្នុង​ដំណើរ​ចេញពី​ប៉ូឡូញ​តាម​រថភ្លើង​មួយ​កាលពី​ព្រឹក​ម្សិលមិញ បាន​បញ្ជាក់​អំពី​ការ​​អញ្ជើញ​ហ្សេ​ឡេន​ស្គី អោយ​ចូលរួម​ជំនួប​កំពូល​G-20​នៅ​កោះ​បាលី ប្រទេស​ឥណ្ឌូនេស៊ី​នៅ​ខែ​វិច្ឆិកា​។​

​ប្តី​ប្រពន្ធ​ទាំង​ពីរ​បាន​ធ្វើ​ដំណើរកាត់​ទីប្រជុំជន​អៀពី​ន​(Irpin)​ដែល​ត្រូវ​បំផ្លាញ​ខ្ទេចខ្ទីរ​ដោយ​សង្គ្រាម​នៅ​ចម្ងាយ​២១​គីឡូម៉ែត្រ​ពី​រដ្ឋធានី​គៀវ​។​លោក​បាន​សម្លឹង​មើល​អាគារ​ដែល​រង​ការបំផ្លាញ​ដោយ​សង្គ្រា​​ម​ និងបាន​ទៅ​មន្ទីរពេទ្យ​មួយ​នៅ​ទីក្រុង​គៀវ​ដើម្បី​ចែក​ជំនួយ​។​

​ដំណើរ​ទស្សនកិច្ច​របស់​មេដឹកនាំ​ឥណ្ឌូនេស៊ី កើត​ឡើង​នៅ​ពេល​កងកម្លាំង​រុស្ស៊ី​បង្កើន​ការវាយប្រហារ​នៅ​គ្រប់​ខ្សែត្រៀម​ជួរ​មុខ​ហើយ​អង្គការ​ណា​តូ​ចាត់ទុក​រុស្ស៊ី​ជាការ​គំរាម​ផ្ទាល់​បំផុត​ចំពោះ​សន្តិសុខ​របស់​​សម្ពន្ធភាពយោធាលោកខាងលិច​។​

​សម្ពន្ធ​ភាព​យោធា​នេះ​បាន​ប្តេជ្ញា​ធ្វើ​ទំនើបកម្ម​យោធា​អ៊ុ​យក្រែន និង​ថា​ខ្លួន​ឈរ​នៅ​ជាមួយ​រដ្ឋាភិបាល​ទីក្រុង​គៀវ​ក្នុង​ការការពារ​ប្រទេស​របស់​គេ​៕