​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ សហរដ្ឋ​អាម៉េរិក​កាលពី​ថ្ងៃ​ពុធ​ទី​២៩​មិថុនា​បាន​ប្រកាស​កិច្ចព្រមព្រៀង​ជាមួយ​ក្រុមហ៊ុនហ្វាយ​ហ្សឺ​( Pfizer) និង​បាយ​អូ​អ៊ិន​តិច​( BioNTech) ទិញ​និង​ផ្គត់ផ្គង់​វ៉ាក់សាំង​កូវី​ដ​ចំនួន ១០៥ លាន​ដូស​សម្រាប់​ចាក់ជូន​ជន​ជា​តិ​អាម៉េរិក​នៅ​រដូវ​ស្លឹកឈើ​ជ្រុះ​នេះ​។​

​កិច្ចសន្យា​តម្លៃ ៣,២ ពាន់​លាន​ដុល្លារ ដែល​បាន​ចុះហត្ថលេខា​រវាង​ក្រុមហ៊ុន​និង​ក្រសួង​សុខាភិបាល​និង​ក្រសួង​ការពារជាតិ​អាម៉េរិក គឺ​រួមមាន​វ៉ាក់សាំង​សម្រាប់​ទារក កុមារ​តូច ក្មេង​ជំទង់​និង​មនុស្ស​​ពេញវ័យ ហើយ​អាច​រួមបញ្ចូល​ទាំង​វ៉ាក់សាំង​ជាក់លាក់​សម្រាប់​មេរោគ​អូ​មី​ក្រុង ដែល​ក្រុម​អ្នក​ជំនាញ​របស់​រដ្ឋាភិបាល​បាន​ណែនាំ​កាលពី​ថ្ងៃ​អង្គារ​។​

​ក្រុមហ៊ុន​បាន​និយាយថា ការ​ចែកចាយ​នឹង​ចាប់ផ្តើម​នៅ​ចុង​រដូវក្តៅ ហើយ​បន្ត​ដល់​ត្រីមាស​ទី​បួន​។ កិច្ចសន្យា​នេះ​ផ្តល់​ឱ្យ​សហរដ្ឋ​អាម៉េរិក​នូវ​ជម្រើស​ក្នុង​ការទិញ​វ៉ាក់សាំង​រហូតដល់ ៣០០ លាន​ដូស​។​

​រដ្ឋមន្ត្រីក្រសួង​សុខាភិបាល​និង​សេវា​មនុស្សជាតិ លោក សា​វី​យ៉េ បេ​សឺរ៉ា (Xavier Becerra)​បាន​និយាយ​នៅក្នុង​សេចក្តីថ្លែងការណ៍​មួយ​ថា​”​រដ្ឋបាលបៃដិ​ន​-​ហារី​ស​ប្តេជ្ញា​ធ្វើ​អ្វី​គ្រប់​យ៉ាង​ដែល​យើង​​អាច​ធ្វើបាន​ដើម្បី​បន្ត​បង្កើត​វ៉ាក់សាំង​ដោយ​ឥតគិតថ្លៃ​និង​ទូលំទូលាយ​សម្រាប់​ប្រជាជន​អាម៉េរិក ហើយ​នេះ​គឺជា​ជំហាន​ដំបូង​ដ៏​សំខាន់​ក្នុងការ​រៀបចំខ្លួន​ពួក​យើង​សម្រាប់​រដូវ​ស្លឹកឈើ​ជ្រុះ​”​។​

​រដ្ឋបាល​របស់​ប្រធានាធិបតី​ចូ បៃ​ដិនបាន​ស្នើ​សុំ​សភា​ចំនួ​ន ២៣,៥ ពាន់​លាន​ដុល្លារ​ក្នុង​ការផ្តល់​មូលនិធិ​កូ​វីដ​បន្ថែមទៀត ប៉ុន្តែ​សេចក្តីព្រាងច្បាប់​មូលនិធិ​នេះ​មិនទាន់​ត្រូវបាន​អនុម័ត​នៅឡើយ​ទេ​។​

​មន្ត្រី​សេត​វិមាន​មុននេះ​បាន​និយាយថា បើ​គ្មាន​មូលនិធិ​ថ្មី​ទេ វ៉ាក់សាំង​នាពេល​អនាគត​អាច​នឹង​ផ្តល់ឱ្យ​ដោយ​ឥតគិតថ្លៃ​សម្រាប់​តែ​អ្នក​ដែល​មាន​ហានិភ័យ​ខ្ពស់​បំផុត​ប៉ុណ្ណោះ​៕

បើ​គ្មាន​មូលនិធិ​ថ្មី​ទេ វ៉ាក់សាំង​នាពេល​អនាគត​អាច​នឹង​ផ្តល់ឱ្យ​ដោយ​ឥតគិតថ្លៃ​សម្រាប់​តែ​អ្នក​ដែល​មាន​ហានិភ័យ​ខ្ពស់​បំផុត​ប៉ុណ្ណោះ