​ប្រែ​សម្រួលៈ​បំណង​(ST)៖ ប្រធានាធិបតី​រុស្ស៊ី​លោក វ្ល៉ា​ឌី​មៀ ពូ​ទីន បាន​និយាយ​កាលពី​ថ្ងៃ​ពុធ​ទី​២៩​មិថុនា​ថា រុស្ស៊ី​នឹង​ឆ្លើយ​អោយ​ស៊ីគ្នា បើសិនជា​អង្គការ​ណា​តូ​បញ្ជូន​និង​ដាក់​ទាហាន​ព្រមទាំង​ហេ​ដ្ឋា​​រចនា​សម្ពន្ធ​យោធា​នៅក្នុង​ប្រទេស​ហ្វាំង​ឡ​ង់​និង​ស៊ុយអែត​ក្រោយ​ប្រទេស​ក្បែរ​ខាង​រុស្ស៊ី​ទាំងពីរ​ចូលរួម​ក្នុង​សម្ពន្ធភាព​យោធា​ដឹកនាំ​ដោយ​អាម៉េរិក​មួយ​នេះ​។​

​ក្រោយ​ជួបពិភាក្សា​ជាមួយ​ក្រុម​មេដឹកនាំ​តំបន់​នៅក្នុង​ប្រទេសទឺ​ក​មេននី​ស្ថាន​នៅអាស៊ី​កណ្តាល​មក លោកពូ​ទីន បាន​ប្រាប់​ទូរទស្សន៍​រដ្ឋ​រុស្ស៊ី​មួយ​ថា «​ជាមួយ​ស៊ុយអែត​និង​ហ្វាំង​ឡ​ង់ យើង​មិន​មាន​បញ្ហា​​ដូចដែល​យើង​មាន​ជាមួយ​អ៊ុយ​ក្រែនទេ​។​ពួក​គេ​ចង់​ចូល​ក្នុង​អង្គការ​ណា​តូ ចូល​ចុះ ។​តែ​ពួកគេ​ត្រូវ​ដឹង​ថា​ពី​មុន​និង​ឥឡូវ​មិន​មាន​ការ​គំរាម​ទេ​។​បើ​កង​ទាហាន​និង​ហេដ្ឋារចនាសម្ពន្ធ​ណាតូ​ត្រូវបាន​បញ្ជូន​​ទៅ​ទីនោះ យើង​នឹង​ឆ្លើយតប​ស៊ីគ្នា ក្នុង​រូប​ភាពដូចគ្នា​និង​បង្កើត​ការ​គំរាម​ដូចគ្នា​សំរាប់​ដែនដី​ដែល​បង្ក​ការ​គំរាម​ដល់​យើង​»​។​

​លោក​ថា វា​ជៀស​មិន​ផុត​ទេ​ដែល​ទំនាក់ទំនង​របស់​រដ្ឋាភិបាល​ទីក្រុង​មូ​ស្គូជា​មួយរដ្ឋាភិបាល​ទីក្រុង ហែល​ស៊ីន​គី​និង​ស្តុក​ខុល​(Stockholm)​នឹង​ប្រែ​ទៅ​ជា​ជូរចត់​ដោយសារ​តែ​សមាជិកភាព​ណា​តូ​របស់គេ​។​

​លោក​បាន​និយាយថា​« គ្រប់យ៉ាង​បានល្អ​ទេ​រវាង​ពួកយើង តែ​ឥឡូវ​អាច​មាន​ភាព​តានតឹង​ខ្លះ នឹង​ប្រាក​ដ​ជា​តានតឹង​។​វា​ជៀស​មិន​ផុត​ទេ បើ​មាន​ការ​គំរាម​ចំពោះ​យើង​»​។​

​លោកពូ​ទីន​បាន​និយាយ​ដូច្នេះ​នៅ​មួយ​ថ្ងៃក្រោយ​សមាជិក​ណា​តូ​មួយ គឺ​តួ​ក​គី​បាន​ដកចេញ​ការ​វ៉េតូ​ប្រឆាំង​ការសុំ​ចូល​របស់​ហ្វាំង​ឡ​ង់​និង​ស៊ុយអែត​ក្នុង​សម្ពន្ធភាព​យោធា​លោកខាងលិចដឹកនាំ​ដោយ​អា​ម៉េ​​រិក​មួយនេះ ក្រោយ​ពី​ប្រទេស​ទាំង​បី​យល់ព្រម​ការពារ​សន្តិសុខ​ផង​គ្នា​។​

​ចំណាត់ការ​នេះ​មានន័យថា រដ្ឋាភិបាល​ទីក្រុង​ហែល​ស៊ីន​គី​និង​ស្តុក​ខុល​អាច​ដំណើរការ​ការសុំ​ចូល​ក្នុង​អង្គការ​ណា​តូ​របស់គេ ដែល​ជា​ការផ្លាស់ប្តូរ​ធំ​មួយ​នៅក្នុង​សន្តិសុខ​អឺរ៉ុប​នៅក្នុង​រយៈពេល​ប៉ុន្មាន​ទសវត្សរ៍​​មកនេះ​។​

​ពូ​ទីន​បាន​បន្ថែមថា គោល​ដៅនៃ​អ្វី​ដែល​រដ្ឋាភិបាល​ទីក្រុង​មូ​ស្គូ​ហៅថា «​ប្រតិបត្តិការ​យោធា​ពិសេស​»​នៅ​អ៊ុ​យក្រែន នៅតែ​មិន​ផ្លាស់ប្តូរ​និង​ថា​គោលដៅ​របស់​វា​គឺ​រំដោះ​តំបន់​ដុន​បាស​នៅ​អ៊ុយ​ក្រែ​ខាងកើត​​និង​បង្កើត​លក្ខខណ្ឌ​សំរាប់​ធានា​សន្តិសុខ​របស់​រុស្ស៊ី​។​

​លោក​ថា ទាហាន​រុស្ស៊ី​បាន​វាយ​ចូល​អ៊ុ​យក្រែន ហើយ​អន្តរាគមន៍​យោធា​បាន​ប្រព្រឹត្តទៅ​តាម​ផែនការ និង​គ្មាន​ត្រូវការ​កំណត់​កាលបរិច្ឆេទ​បញ្ចប់​យុទ្ធនាការ​នេះ​ទេ​៕

ប្រធានាធិបតី​រុស្ស៊ី​លោក វ្ល៉ា​ឌី​មៀ ពូ​ទីន ព្រមាន​ហ្វាំង​ឡ​ង់​និង​ស៊ុយអែត​ថា បើ​ពួកគេ​ស្វាគមន៍​ទាហាន​ណា​តូ​និង​ហេដ្ឋារចនាសម្ពន្ធ​យោធា​លើ​ទឹកដី​របស់គេ រុស្ស៊ី​នឹង​ឆ្លើយតប​ក្នុង​រូប​ភាពដូចគ្នា​