​ដោយ​៖ សុវណ្ណ​កុម្ភៈ / ភ្នំពេញ​៖ ការប្រកួត​ពាន AFC Cup នា​វេលា​ម៉ោង ៨ យប់​នេះ នៅ​ទឹកដី​ប្រទេស​ឥណ្ឌូណេស៊ី ទោះបី​ក្រុមបាល់ទាត់​វិសាខា ត្រឹម​ស្មើ​ក្រុម Kedah ប៉ុណ្ណោះ ក៏បាន​ឡើងទៅ​កាន់​វគ្គ​បន្ទាប់​ដែរ​។​
​នេះ​ជា​លើកដំបូង​ហើយ ក្នុងនាម​ក្រុម​តំណាង​ឲ្យ​កម្ពុជា​សម្រាប់​ពាន AFC Cup នេះ ហើយ​បើសិន​ក្រុម​តំណាង​ឲ្យ​កម្ពុ​ជាមួយនេះ បាន​ឡើងទៅ​មែន នឹង​បំបែក​កំណត់ត្រា​មួយ​ថ្មី​ទៀត​។

​ជ័យជំនះ ឈ្នះ​២​ប្រកួត​ជាប់​គ្នា នេះ​ជា​កំណត់ត្រា​ល្អ​មួយ​ផងដែរ ដោយ​កន្លងមក ក្រុម​តំណាង​របស់​កម្ពុជា មិន​ធ្លាប់ធ្វើ​បានឡើយ នៅ​វគ្គ​នេះ​។ ជាងនេះទៅទៀត បើសិន វិសាខា បាន​ឡើងទៅ​កាន់​ជុំ​បន្ទាប់ ឬ Knock out ទៀត​នោះ ពួកគេ​នឹង​បំបែក​កំណត់ត្រា​មួយទៀត គឺ​បាន​ឡើងទៅ​ដល់​វគ្គ Knock out ជា​លើកដំបូង សម្រាប់​តំណាង​ឲ្យ​កម្ពុជា ក្នុង​ការលេង​ពាន AFC Cup​។ បើ​មើល​ទៅលើ​ភាគរយ នៃ​ការឡើង​ទៅកាន់​ជុំ​បន្ទាប់​វិសាខា ហាក់​មាន​ភាគរយ​ខ្ពស់​ខ្លាំង​។

​លោក មាស ចាន់ណា គ្រូបង្វឹក​របស់​វិសាខា បាន​និយាយ ក្នុង​សន្និសីទកាសែត​ថា​: «​អ្វីដែល​ខ្ញុំ​សង្កេតឃើញ គឺ​កីឡាករ​យើង ពួកគាត់​មាន​ឆន្ទៈ​ខ្ពស់​ណាស់ គាត់​បាន​ត្រៀមខ្លួន​រួចរាល់ សម្រាប់​ការប្រកួត​នេះ​។ ទាំង​កម្លាំង​ស្មារតី និង​យុទ្ធសាស្ត្រ គឺ​យើង​បានរៀបចំ​រួចហើយ​…​។ ខ្ញុំ​មើលឃើញថា ការប្រកួត​នេះ ជាការ​ប្រកួត ដែល​ក្រុម​យើង នៅតែ​ធ្វើ​បានល្អ​ដដែល​»​។

​គ្រូបង្វឹក​រូបនេះ បាន​បន្ថែមថា​: ជ័យជម្នះ ២ ប្រកួត​កន្លងទៅនេះ មិនទាន់​គ្រប់គ្រាន់​ឡើយ​។ ក្រុម​របស់លោក នៅតែ​បន្ត​យកចិត្តទុកដាក់​ប្រឹងប្រែង និង​ត្រៀមខ្លួន​ឲ្យ​កាន់តែ​ល្អ ព្រោះ​ការប្រកួត​នេះ លោក​គិតថា​សំខាន់​ខ្លាំង​។ អ្វីដែល​លោក​បាន​ដាស់តឿន ដល់​កីឡាករ គឺ​ប្រសិន​ធ្វើបាន​ល្អ​ហើយ កុំ​ទម្លាក់​ដៃ ឬ​បន្ថយ​ការខិតខំ​ប្រឹងប្រែង​ឲ្យ​សោះ ពោលគឺ ត្រូវតែ​ប្រឹង​ឲ្យ​បាន​កាន់តែខ្លាំង ជាង​ការប្រកួត​មុនៗ​ទៀត​។

​សូម​រំលឹកថា កាលពី ពីរ​ប្រកួត​មុន ក្រុមបាល់ទាត់ វិសាខា បាន​យកឈ្នះ Bali ៥-២ និង​ឈ្នះ​ក្រុម Kaya ២-១ ៕/V​.mara