​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ជំទាវ​ទី​មួយ​របស់​អ៊ុ​យក្រែន លោកស្រី អូ​ឡេ​ណា ហ្សេ​លេន​ស្កា (Olena Zelenska) បាន​និយាយថា ទំនាក់ទំនង​របស់​លោក​ស្រី​ជា​មួយ​ស្វាមី​គឺ​ត្រូវ “​ផ្អាក​” ចំ​ពេល​មាន​ជម្លោះ​កំពុង​បន្ត​ជាមួយ​រុស្ស៊ី ហើយ​ដូច្នេះ​អ្នក​ទាំង​ពីរ​កំពុង “​ទន្ទង់រង់ចាំ​ការជួប​ជុំ​គ្នា​ឡើង​វិញ​” ជាមួយ​កូនៗ​របស់​ពួកគេ​។​

​លោកស្រី​ហ្សេ​លេន​ស្កា​បាន​លា​ត្រដាង​កាលពី​ថ្ងៃ​អង្គារ​ទី​២៨​មិថុនា​ថា លោកស្រី​មិន​អាច​ជួប​ប្រធានាធិបតី វ៉ូ​ឡូ​ឌី​មៀ ហ្សេ​លេន​ស្គី អស់​រយៈពេល​ជា​យូរ​មកហើយ​ហើយ​និយាយថា​វា​មិនមែន​ជា​រឿង​​ធម្មតា​ទេ​ដែល​កូនៗ​របស់​ពួកគេ​អាច​និយាយ​ជាមួយ​ឪពុក​បាន​តែ​តាម​ទូរស័ព្ទ​។​

​សូមបញ្ជាក់​ថា អ្នក​ទាំង​ពីរ​បាន​បដិសេធ​មិន​ចាកចេញ​ពី​ប្រទេស​អ៊ុ​យក្រែន នៅពេល​ដែល​កងទ័ព​រុស្ស៊ី​វាយលុក​ឆ្លងកាត់​ព្រំដែន​នៅ​ថ្ងៃទី ២៤ ខែ​កុម្ភៈ​ហើយ​ជំនួស​មក​វិញ​បាន​ស្នាក់​នៅក្នុង​ទីក្រុង​គៀវ​​ដើម្បី​ដឹកនាំ​កិច្ចខិតខំ​ប្រឹងប្រែង​សង្គ្រាម​ដ៏​ពិសេស ដោយ​ទទួលបាន​ការកោតសរសើ​រ​ទូទាំង​ពិភពលោក​ចំពោះ​ការតស៊ូ​យ៉ាង​ម៉ឺងម៉ាត់​ទល់នឹង​ប្រធានាធិបតី​រុស្ស៊ី វ្ល៉ា​ឌី​មៀ ពូ​ទីន​។​

​ប៉ុន្តែ​វា​មានន័យថា ពួកគេ​ត្រូវបាន​អនុញ្ញាត​ឱ្យ​ជួប​គ្នា​យូរៗ​ម្តង​ក្នុង​រយៈពេល​ខ្លី​ប៉ុណ្ណោះ​ដើម្បី​ធានា​សុវត្ថិភាព​។​

​លោកស្រី​បាន​ប្រាប់​ពិធី​ការិនី គ្រី​ស្ទៀន អា​មែន​ភួ (Christiane Amanpour) របស់​ទូរទស្សន៍ CNN ក្នុង​បទសម្ភាសន៍​មួយ ដែល​បាន​ផ្សាយ​កាលពី​ថ្ងៃ​អង្គារ​ថា “​នេះ​មិនមែន​ជា​រឿង​ធម្មតា​ទេ​។ វា​មិនមែន​ជា​ទំនាក់ទំនង​ធម្មតា​ទេ នៅពេល​ដែល​កូនៗ​មិន​អាច​ឃើញ​មុខ​ឪពុក​របស់​គេ ហើយ​ត្រូវ​និយាយ​ជាមួយ​គាត់​តាម​ទូរស័ព្ទ​។ ដូច្នេះ​ទំនាក់ទំនង​របស់​យើង​ត្រូវ​បាន​ផ្អាក​ដូច​ជនជាតិ​អ៊ុយ​ក្រែន​ទាំងអស់​ផងដែរ​។​ពួកយើង​…​កំពុង​ទន្ទឹង​ចាំ​ជួបជុំគ្នា​ម្តងទៀត ដើម្បី​ចំណាយពេល​ល្ងាច​ជាមួយ​គ្នា ជជែក​ជាមួយ​កូនៗ​អំពី​រឿងរ៉ាវ​របស់​ពួកគេ​”៕

លោកស្រី​ហ្សេ​លេន​ស្កា​ខាន​ជួប​ស្វាមី​ជា​យូរ​មក​ហើយ​ចាប់តាំងពី​ការ​លុកលុយ​របស់​រុស្ស៊ី​កាលពី​ថ្ងៃទី​២៤​កុម្ភៈ ឆ្នាំ​២០២២