​ប្រែ​សម្រួល : កញ្ញា​ដា​លី​ស (VNExpress) ៖ បុគ្គលិក​សួនសត្វ​ប្រមូល​លាមក​បាន​ប្រហែល ៨០០ គីឡូក្រាម​ពី​ដំរី​ប្រាំ​ក្បាល​នៅ​ក្នុង​បរិវេណ​របស់​ពួកគេ​។​

​កាលពីមុន លាមក​ត្រូវបាន​បោះចោល​ឬ​ធ្វើ​ជា​ជីរ​។ ឥឡូវនេះ វា​ត្រូវ​បាន​កែច្នៃ​ជា​ក្រដាស​។​

​លោក ម៉ៃ ខាក់ ជុង ជុ​ក (Mai Khac Trung Truc) នាយក​សួនសត្វ​និង​សួន​រុក្ខសាស្ត្រ​សៃ​ហ្គ​ន បាន​និយាយថា សត្វ​ដំរី​ភាគច្រើន​ស៊ី​ស្មៅ​និង​អំពៅ ដូច្នេះ​លាមក​របស់​វា​មាន​ជាតិ​សរសៃ​ច្រើន ហើយ​មិន​មាន​ក្លិនស្អុយ​ខ្លាំងពេក​ទេ​។​

​លោក​បាន​បន្តថា “​លាមក​វា​អាច​ប្រើ​សម្រាប់​ធ្វើ​ក្រដាស​បាន​។ ប្រទេស​មួយចំនួន​បាន​ធ្វើ​វា​រួចហើយ ហើយ​កំពុង​ផលិត​ក្រដាស​ដែល​មាន​គុណភាព​ខ្ពស់​”​។​

​លោក​ជុ​កបាន​និយាយថា ការកែច្នៃ​ឡើងវិញ​បែប​នេះ​នឹង​ជួយ​លើកកម្ពស់​ការយល់ដឹង​អំពី​ការការពារ​សត្វព្រៃ​និង​បង្រៀន​កុមារ​ឱ្យ​ចេះ​សន្សំសំចៃ​ធនធាន​និង​ការពារ​បរិស្ថាន​។​

​សួនសត្វ​បានចាប់ផ្តើម​កែច្នៃ​លាមក​ដំរី​តាំងពី​ខែ​កុម្ភៈ​មក​ម្ល៉េះ​។​

​កាលពី​ថ្ងៃ​សុក្រ​កន្លងទៅ លោក​ជុ​កបាន​លាង​សម្អាត​លាមក​ដែល​ប្រមូល​បាន​យ៉ាង​ហោច​ណាស់​ប្រាំ​ពីរដង ដើម្បី​លុបបំបាត់​ភាពកខ្វក់​ចេញ ដោយ​ទុក​តែ​ជាតិ​សរសៃ​សម្រាប់​កែច្នៃ​ឡើងវិញ​។ ជាតិ​សរសៃ​ត្រូវ​បាន​ស្ងោរ​នៅ​សីតុណ្ហភាព ២០០ អង្សា​សេ រយៈពេល ២ ម៉ោង​ដើម្បី​សម្លាប់​បាក់តេរី និង​បំបាត់​ក្លិន​។​

​សួនសត្វ​នេះ​ប្រើ​លាមក​ដំរី​ប្រហែល ៣-៥ គីឡូក្រាម​ដើម្បី​ធ្វើ​ក្រដាស​រៀងរាល់​ចុង​សប្តាហ៍​។​

​លោក​ជុ​កបាន​និយាយថា “​នេះ​នៅតែ​ជា​ការសាកល្បង ហើយ​គ្មាន​គ្រឿង​ម៉ាស៊ីន​ណាមួយ​ត្រូវបាន​ប្រើប្រាស់​នោះ​ទេ​។ យើង​ធ្វើ​វា​ដោយ​ដៃ និង​មិន​រក​ប្រាក់ចំណេញ​ទេ ដូច្នេះ​យើង​ធ្វើ​តែ​ក្រដាស​ប៉ុន្មាន​សិប​សន្លឹក​ក្នុង​មួយ​លើកៗ​ប៉ុណ្ណោះ​”៕

​ក្រដាស​ត្រូវ​បាន​កែច្នៃ​ពី​លាមក​ដំរី​នៅ​សួនសត្វ​និង​សួន​រុក្ខសាស្ត្រ​សៃ​ហ្គ​ន