​ដោយៈ សុផល / ភ្នំពេញ​: ក្រសួង​សាធារណការ និង​ដឹកជញ្ជូន នា​ពាក់កណ្តាល​សប្តាហ៍​នេះ បាន​អញ្ជើញ​ជួបពិភាក្សា​ការងារ ជាមួយ​ក្រសួង​ដឹកជញ្ជូន​សហរដ្ឋអាមេរិក (DOT) តាម​ប្រព័ន្ធ​វីដេអូ​ពី​ចម្ងាយ ដោយមាន​ការចូលរួម ពី​ថ្នាក់ដឹកនាំ​ក្រសួង ជា​អនុរដ្ឋលេខាធិការ អគ្គនាយក អគ្គនាយករង ប្រធាន អនុប្រធាននាយកដ្ឋាន និង​មន្ត្រី​ជំនាញ​ពាក់ព័ន្ធ និង​ដោយឡែក ខាង​ភាគី​សហរដ្ឋអាមេរិក រួមមាន លោក Jiga Phat មន្ត្រី​កិច្ចការ​អាស៊ាន នៃ​ស្ថានទូត​អាមេរិក មន្ត្រី​ជំនាញ​ទំនាក់ទំនង​អន្តរជាតិ និង​មន្ត្រី​វិភាគ​បច្ចេកវិទ្យា គោ​លន​យ​បាយ​ប្រព័ន្ធ​ដឹកជញ្ជូន នៃ​ការិយាល័យ​ដឹកជញ្ជូន​អន្តរជាតិ និង​ពាណិជ្ជកម្ម នៃ​ក្រសួង​ដឹកជញ្ជូន​អាមេរិក មន្ត្រី​កិច្ចការ​អាស៊ាន មន្ត្រី​សេដ្ឋកិច្ច និង​ពាណិជ្ជកម្ម​នៃ ស្ថានទូត​អាមេរិក​ប្រចាំ​នៅ​កម្ពុជា​។

​កិច្ចប្រជុំ​នេះ បាន​ផ្តោតជាសំខាន់ លើ​កិច្ចសហការ និង​ការសម្របសម្រួល ក្នុងការ​កំណត់​ប្រធានបទ​គន្លឹះ​ជា អាទិភាព (Priority Area) រួមមាន​: ការកាត់បន្ថយ​ប​ម្រែ​ប្រួល​អាកាសធាតុ កិច្ចសហប្រតិបត្តិការ​តំបន់ ជាដើម សម្រាប់​ជា​កាលានុវត្តភាព ក្នុង​កិច្ចសហប្រតិបត្តិការ​ខាង​បច្ចេកទេស លើ​វិស័យ​ដឹកជញ្ជូន រវាង ក្រសួង​សាធារណការ និង​ដឹកជញ្ជូន នៃ​ព្រះរាជាណាចក្រ​កម្ពុជា និង​នាយកដ្ឋាន​ដឹកជញ្ជូន​សហរដ្ឋអាមេរិក​។

​លោក Jiga Phat បានបញ្ជាក់​ពី​ការគាំទ្រ​លើ​ការសម្របសម្រួល និង​រៀបចំ​កិច្ចប្រជុំ របស់​ស្ថានទូត​អាមេរិក នៅ​ភ្នំពេញ នៅពេលនេះ និង​នាពេលខាងមុខ​។

​ជាការ​ឆ្លើយតប លោកស្រី កុយ សុ​ដា​នី រដ្ឋលេខាធិការ​ក្រសួង​សាធារណការ និង​ដឹកជញ្ជូន បាន​ថ្លែង​អំណរ គុណ ដល់​អ្នកចូលរួម​ទាំង​អស់ ពិសេស​ដល់​ស្ថានទូត​អាមេរិក ដែល​បាន​គាំទ្រ សម្របសម្រួល រៀបចំ​ឱ្យមាន​កិច្ចប្រជុំ​នេះ​ឡើង និង​បាន​អញ្ជើញ​មន្ត្រី​ជំនាញ​ពាក់ព័ន្ធ​របស់​ក្រសួង​សាធារណការ និង​ដឹកជញ្ជូន បាន​ជួបពិភាក្សា​ការងារ ជាមួយ​មន្ត្រី​ពី​នាយកដ្ឋាន​ដឹកជញ្ជូន​សហរដ្ឋអាមេរិក​។

​អង្គប្រជុំ បាន​ស្តាប់​នូវ​បទ​បង្ហាញ​របស់​ក្រសួង​ដឹកជញ្ជូន​អាមេរិក ដែល​ផ្តោតជាសំខាន់ លើ​ការធ្វើផែនការ ការ​គូស​រចនា​ប្លង់ និង​ការអភិវឌ្ឍ​ហេដ្ឋារចនាសម្ព័ន្ធ (​ផែនការ​ហិរញ្ញវត្ថុ ប្រតិបត្តិ​ការថែទាំ ការសិក្សា​សមិទ្ធិ​លទ្ធភាព​គម្រោង​) ហេដ្ឋារចនាសម្ព័ន្ធ ប្រកបដោយ​និរន្តរភាព និង​ភាព​ធន់ (​យានយន្ត​បំ​ភាយ​ឧស្ម័ន​សូន្យ ហេដ្ឋារចនាសម្ព័ន្ធ ដែលមាន​ភាព​ធន់ អាច​ទទួលបាន និង​ប៉ះពាល់​តិចតួច​) សុវត្ថិភាព (​ចរាចរណ៍​ផ្លូវគោក សុវត្ថិភាព​ផ្លូវអាកាស បច្ចេកវិទ្យា​សុវត្ថិភាព​ថ្មី​) អភិបាលកិច្ច និង​តម្លាភាព ការតភ្ជាប់​ពហុ​ប្រភេទ​ដឹកជញ្ជូន (​មជ្ឈមណ្ឌល​ភស្តុភា​រកម្ម ) ស្តង់ដារ និង​បទ​ប្បញ្ញត្តិ របៀង​តំបន់ ការឆ្លងកាត់​ព្រំដែន និង​កិច្ច​សម្រួល​ពាណិជ្ជកម្ម យេនឌ័រ បរិ​យា​ប័ន្ន​សង្គម និង​សមភាព និង​ការជំរុញ​បច្ចេកវិទ្យា​។​

​លោកស្រី បាន​ស្នើឱ្យ​ក្រសួង​ដឹកជញ្ជូន​សហរដ្ឋអាមេរិក និង​អង្គប្រជុំ ពិចារណា​លើ​ការកំណត់​ប្រធានបទ​ជា​អាទិភាព​គន្លឹះ​មួយចំនួន ដូចជាៈ ការកសាង​សមត្ថភាព គ្រឿង​ឧបករណ៍​ត្រួតពិនិត្យ​គុណភាព ភាព​ធន់​នឹង​អាកាសធាតុ ការធ្វើផែនការ​លើ​មូលដ្ឋាន​លទ្ធផល​អនុវត្ត អភិបាលកិច្ច ការឆ្លងកាត់​ព្រំដែន សុវត្ថិភាព យេនឌ័រ បរិ​យា​ប័ន្ន​សង្គម និង​សមភាព ការតភ្ជាប់​ពហុ​ប្រភេទ​ដឹកជញ្ជូន និង​ការដឹកជញ្ជូន ដោយ​និរន្តរភាព និង​បាន​ស្នើឱ្យ DOT ពិចារណា​ផងដែរ លើ​កិច្ចសហប្រតិបត្តិការ ជាមួយ​វិទ្យាស្ថាន​តេ​ជោ​សែន សាធារណការ និង​ដឹកជញ្ជូន ដែល​ទើប​បង្កើត​ថ្មី​។

​អង្គប្រជុំ ក៏បាន​ស្នើសុំ​ឱ្យមាន​គំរូ​ទម្រង់​កិច្ចសហប្រតិបត្តិការ សម្រាប់​កំណត់​ប្រធានបទ​ជា​អាទិភាព​គន្លឹះ ។

​ជាការ​ឆ្លើយតប DOT​បាន​បញ្ជាក់ថា​: ខ្លួន​មិនមាន​ទម្រង់​ផ្លូវការ​ណាមួយ សម្រាប់​កិច្ចសហប្រតិបត្តិការ ជំហាន​បន្ទាប់​នោះទេ​។ DOT គ្រាន់​ចង់ដឹង​ព័ត៌មាន​អំពី​ប្រធានបទ ឬ​ផ្នែក​ណាខ្លះ ដែល​ក្រសួង​សាធារណការ និង​ដឹកជញ្ជូន មាន​ចំណាប់អារម្មណ៍ ចង់​លើកឡើង ដើម្បីឱ្យ DOT ពិនិត្យ​លទ្ធភាព និង​កាលានុវត្តភាព​សម្រាប់​កិច្ចសហប្រតិបត្តិការ​ប​ច្ចេកទេស នាពេលខាងមុខ​។

DOT នឹងធ្វើ​ការពិនិត្យ​ពិចារណា​បន្ថែម ទៅលើ​ប្រធានបទ ឬ​ចំណុច​ជា​អាទិភាព​ទាំងនោះ សម្រាប់ ប្រភេទ​ដឹកជញ្ជូន​ផ្សេងៗ ដូចជា ផ្លូវថ្នល់ ផ្លូវអាកាស ផ្លូវ​សមុទ្រ​។​ល​។ សម្រាប់​ការងារ​ជំហាន​បន្ទាប់ DOT នឹងធ្វើ​ការងារ​ផ្ទៃក្នុង និង​បន្ត​ជជែក​ជាមួយ​ក្រសួង​សាធារណការ និង​ដឹកជញ្ជូន ជ្រើសរើស​ប្រធានបទ​អាទិភាព ដែល​សំខាន់បំផុត​ចំនួន ពីរ ឬ បីយ៉ាង​ច្រើន​៕/V​