​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុម​គ្រូពេទ្យ​បាន​និយាយថា កងកម្លាំង​សន្តិសុខ​ស៊ូដង់​បាន​បាញ់​សម្លាប់​មនុស្ស​ប្រាំ​បីនាក់​ក្នុងអំឡុង​បាតុកម្ម​ប្រឆាំង​រដ្ឋប្រហារ​កាលពី​ថ្ងៃ​ព្រហស្បតិ៍​ទី​៣០​មិថុនា ខណៈ​មនុស្ស​រាប់ពាន់​នាក់​បាន​ដើរ​ដង្ហែ​ក្បួន​ដើម្បី​ថ្កោលទោស​មេដឹកនាំ​យោធា​របស់​ប្រទេស​នេះ​និង​ទាមទារ​ឱ្យមាន​ការផ្ទេរអំណាច​ជាបន្ទាន់​ឱ្យទៅ​ជន​ស៊ីវិល​។​

​គណៈកម្មាធិការ​វេជ្ជបណ្ឌិត​របស់​ស៊ូដង់​បាន​និយាយ​នៅក្នុង Twitter​ថា មនុស្ស​ប្រាំមួយ​នាក់​ត្រូវបាន​បាញ់សម្លាប់​នៅ​ពេល​ប៉ូលិស​បាញ់​គ្រាប់​ពិត​ទៅ​លើ​ហ្វូង​អ្នក​តវ៉ា​នៅ​ទីក្រុង​អូ​ម​ឌួ​មែន (Omdurman) ដែល​ជា​ទីក្រុង​ភ្លោះ​នៃ​រដ្ឋធានី​ខា​ទុម (Khartoum) របស់​ស៊ូដង់​។​

​ឆ្លងទន្លេ​នី​ល​ក្នុង​ទីក្រុង​ខា​ទុម មនុស្ស​ម្នាក់​ទៀត​បាន​ស្លាប់​ដោយសារ​គ្រាប់កាំភ្លើង​ចំក្បាល​និង​កុមារ​ម្នាក់​បាន​ស្លាប់​បន្ទាប់ពី​ត្រូវបាន​គេ​បាញ់​ចំ​ទ្រូង នេះ​បើ​យោង​តាម​ក្រុម​វេជ្ជបណ្ឌិត​ខាងលើ​ដែល​តាម​​ដាន​ជនរងគ្រោះ​ក្នុងអំឡុងពេល​តវ៉ា​។ ភ្លាមៗ​អត្តសញ្ញាណ​អ្នក​ទាំង​ប្រាំបី​មិនទាន់​ដឹង​នោះ​ទេ​។​

​នៅក្នុង​ទីក្រុង​ខា​ទុម​ផងដែរ ប៉ូលិស​បាន​បាញ់​ឧស្ម័ន​បង្ហូរទឹកភ្នែក​ទៅលើ​បាតុករ​រាប់ពាន់នាក់​ដែល​ព្យាយាម​ចូល​ទៅ​កាន់​វិមាន​សាធារណរដ្ឋ ជា​កន្លែង​កាន់អំណាច​របស់​យោធា​នៅ​កណ្តាល​ទីក្រុង​។​វីដេអូ​​ដែល​បង្ហាញ​មនុស្ស​រាប់ពាន់​នាក់​គ្រវីទង់ជាតិ​ស៊ូដង់​និង​រត់​ក្រោម​ពពក​ឧស្ម័ន​បង្ហូរទឹកភ្នែក ត្រូវ​បាន​បង្ហោះ​ពេញ​បណ្តាញ​សង្គម​។​

​វីដេអូ​ផ្សេងទៀត​បាន​បង្ហាញ​ក្រុមបាតុករ​លើក​បដា សរសេរថា “​គ្មាន​ការចរចា​! គ្មាន​ភាព​ជា​ដៃគូ​”​ដែល​បញ្ជាក់​ជា​ថ្មី​ពី​ការប្រឆាំង​របស់​ពួកគេ​ចំពោះ​កិច្ចព្រមព្រៀង​ចែក​អំណាច​ណាមួយ​ជាមួយ​មេ​ដឹក​​នាំ​យោធា​។​

​ក្រុមគាំទ្រ​លទ្ធិប្រជាធិបតេយ្យ​ឈាន​មុខ​គេ​របស់​ស៊ូដង់ ឈ្មោះថា កងកម្លាំង​សម្រាប់​សេចក្តីប្រកាស​នៃ​សេរីភាព​និង​ការផ្លាស់ប្តូរ​និង​គណៈកម្មាធិការ​តស៊ូ​បាន​អំពាវនាវ​ឱ្យមាន​ការតវ៉ា​ទូទាំងប្រទេស​​កាលពី​ថ្ងៃ​ព្រហស្បតិ៍​ទី​៣០​មិថុនា​ដើម្បី​បញ្ជាក់​ឡើងវិញ​នូវ​ការទាមទារ​របស់​ពួកគេ​ដើម្បី​បដិសេធចោល​នូវ​រដ្ឋប្រហារ​យោធា​កាលពី​ថ្ងៃទី ២៥ ខែតុលា​ឆ្នាំ​មុន​។ ​ការកាន់កាប់​របស់​យោធា​បាន​បំផ្លាញចោល​ការផ្លាស់ប្តូរ​រយៈពេល​ខ្លី​របស់​ប្រទេស​អាហ្វ្រិក​ខាងកើត​នេះ​ទៅ​រក​លទ្ធិប្រជាធិបតេយ្យ បន្ទាប់​ពី​ការបណ្តេញ​មេដឹកនាំ​ផ្តាច់ការ​ចាស់​វស្សា លោក អូ​ម៉ា អាល់​បា​សៀ (Omar al-Bashir) ក្នុង​ឆ្នាំ ២០១៩៕

​បាតុករ​រាប់ពាន់នាក់​នាំគ្នា​តវ៉ា​ប្រឆាំង​រដ្ឋប្រហារ​ក្នុង​រដ្ឋធានី​ខា​ទុម​កាលពី​ថ្ងៃ​ព្រហស្បតិ៍​