ដោយៈ គង់​ហេង / កំពង់ចាមៈ រដ្ឋបាលខេត្ត​កំពង់ចាម បានសម្រេច​អនុញ្ញាត ឱ្យ​ក្រុមហ៊ុន ស៊ីន​ទ្រី ពង្រីក​សេវា​ប្រមូល​សំរាម​របស់ខ្លួន ចំនួន​ប្រាំមួយ ស្រុក​បន្ថែមទៀត ក្នុង​កម្រិត​កិច្ចសន្យា​សាកល្បង រយៈពេល ប្រាំ​មួយខែ​។​

​បញ្ហា​ដែល​ខាង​រដ្ឋបាល​ខេត្តកំពង់ចាម អនុញ្ញាតឱ្យ​ក្រុមហ៊ុន​ឯកជន​មួយ​នេះ ប្រមូល​សំរាម ក្នុង​កម្រិត​សាកល្បង​បែបនេះ ដោយសារ​ថា មាន​អភិបាលស្រុក មួយចំនួន បាន​មានការ​ព្រួយ បារម្ភ ខ្លាច​ខាង​ក្រុមហ៊ុន ធ្វើ​មិន​បានល្អ ដូចដែល​ខាង​ស្រុក​ទាំងនោះ បានធ្វើ​ជាមួយ​គណៈ អាជីវករ កន្លងមក​។​

​ការព្រមព្រៀង​ឱ្យ​ក្រុមហ៊ុន​ស៊ីន​ទ្រី មាន​សិទ្ធិ​ពង្រីក​ការប្រមូល​សំរាម នៅ​ស្រុក ចំនួន​ប្រាំមួយ មានៈ ស្រុក​បាធាយ​, ស្រុក​ជើងព្រៃ​, ស្រុក​ព្រៃឈរ​, ស្រុក​ចម្ការលើ​, ស្រុក​ស្ទឹងត្រង់ និង ស្រុក​កងមាស បន្ថែមទៀត​នេះ ធ្វើឡើង​នៅ​ជំនួប រវាង​លោក អ៊ុន ចាន់​ដា អភិបាលខេត្ត​កំពង់ចាម លោក ជា ស៊ីណា អនុរដ្ឋលេខាធិការ ក្រសួងបរិស្ថាន មន្ត្រី​ជំនាញ តំណាង​ក្រុមហ៊ុន​ស៊ីន​ទ្រី និង​អភិបាលស្រុក ក្រុង ដែល​ពាក់ព័ន្ធ នៅក្នុង​សាលាខេត្ត​កំពង់ចាម នៅ​ព្រឹក​ថ្ងៃទី ១ កក្កដា​នេះ​។​

​ក្រោយពី​ស្តាប់​បទ​បង្ហាញ​របស់ ប្រធាន​មន្ទីរ​បរិស្ថាន តំណាង​ក្រុមហ៊ុន​ស៊ីន​ទ្រី និង​ប្រសាសន៍ ចូលរួម​របស់លោក ជា ស៊ីណា នោះ លោក អ៊ុន ចាន់​ដា បានសម្រេច​អនុញ្ញាតឱ្យ​រដ្ឋបាល ស្រុក ក្រុង​ទាំង ប្រាំបី មាន​ស្រាប់ ក្រុង​កំពង់ចាម និង​ស្រុក​កំពង់សៀម អាច​ចុះហត្ថលេខា លើ​កិច្ចសន្យា​ជាមួយ​ក្រុមហ៊ុន​ស៊ីន​ទ្រី ដោយផ្ទាល់​។ ប៉ុន្តែ​កិច្ចសន្យា​នេះ ត្រូវមាន​ការឯកភាព ពី​រដ្ឋបាលខេត្ត​។​

​លោក​អភិបាលខេត្ត​កំពង់ចាម បាន​ថ្លែងថាៈ ចំពោះ​ការអនុវត្ត​កិច្ចសន្យា​នេះ ក្រុមហ៊ុន​ស៊ី​ទ្រី ត្រូវអនុវត្ត​ក្នុង​កម្រិត​សាកល្បង រយៈពេល ៦​ខែ ថា​តើ​ដំណើរការ ប្រមូល​សំរាម បានទទួល ជោគជ័យ ឬ​អត់​។ ដោយសារ​មាន​អភិបាលស្រុក មួយចំនួន មានការ​ព្រួយបារម្ភ ខ្លាច​ធ្វើ​មិនល្អ ដូចដែល​ស្រុក បាន​អនុវត្ត​ធ្វើ ជាមួយ​ខាង​គណៈ​អាជីវករ​ផ្សារ​។​

​លោក​បាន​បន្ថែមថាៈ ជាក់ស្តែង ការប្រមូល​សំរាម នៅក្នុង​ក្រុង​កំពង់ចាម របស់​ក្រុមហ៊ុន​ស៊ីន​ទ្រី ប៉ុន្មាន​ឆ្នាំកន្លងមក បានតែ​ប្រមាណ ៤៦ ភាគរយ​ប៉ុណ្ណោះ​។ នេះ​បណ្តាលមកពី​កង្វះខាត ក្នុងការ​គ្រប់គ្រង ចាត់ចែង​របស់​ខាង​ក្រុមហ៊ុន​តែម្តង​។ ប៉ុន្តែ​បញ្ហា​នេះ យើង​នឹង​ពិភាក្សាគ្នា​បន្ថែមទៀត នៅលើ​ការគ្រប់គ្រង​សំរាម ក្នុង​កម្រិត​ណាមួយ អាច​ទទួលយកបាន​។ ពិសេស ក៏ត្រូវ​ពិភាក្សាគ្នា​ផងដែរ ជុំវិញ​ការយក​កម្រៃ​ថា តើ​ស៊ីន​ទ្រី​បាន​កម្រៃ​ប៉ុន្មាន ? ហើយក៏​ត្រូវ​គិត​ផងដែរ កម្រៃ​ដែល​ប្រមូលបាន​មកនេះ ក្នុង​កម្រិតណា ជួយ​ដល់​រដ្ឋបាល​ក្រុង ស្រុក ដើម្បីឱ្យ​ក្រុង ស្រុក​មានលទ្ធភាព អនុវត្ត​ការងារ​នេះ ក្នុង​រូបភាព​សហការគ្នា​។​

​លោក​បាន​បន្តថាៈ សូមឱ្យ​មានការ​តាមដាន ត្រួតពិនិត្យ លើ​ការប្រមូល​សំរាម គឺ​ក្រុមហ៊ុន បាន​ចុះកិច្ចសន្យា ជាមួយ​អាជ្ញាធរ ហើយ​ខាង​ក្រុមហ៊ុន បានធ្វើការ ប្រមូល​សំរាម បាន​ត្រឹមត្រូវ​ដែរ ឬ​អត់ គឺ​ដើម្បី​ធ្វើ​កែតម្រូវ​ទាំងអស់គ្នា​។ ជាមួយ​នោះ រដ្ឋបាល​ក្រុង ស្រុក ត្រូវ​សហការ​ជាមួយ ឃុំ សង្កាត់ បង្កើន​ការផ្សព្វផ្សាយ ជូន​ដល់​ប្រជាពលរដ្ឋ អំពី​ការ​ទុកដាក់​សំរាម ឱ្យបាន​ត្រឹមត្រូវ ទៅតាម​ទីតាំង ដែល​បានកំណត់ គឺ​ជៀសវាង​ការយក សំរាម ចោល​ពាសវាល​ពាសកាល ដែល​គេចវេស​ពី​ការបង់​កម្រៃ ប្រមូល​សំរាម បង្កឱ្យមាន​ភាពស្មុគស្មាញ ដល់​ក្រុមហ៊ុន​ស៊ីន​ទ្រី​នោះ​៕/V​-PC