​ប្រែ​សម្រួលៈ​បំណង​(​ដេល្លី​ម៉េល​)៖ ការវាយប្រហារ​ដោយ​កាំជ្រួច​រុស្ស៊ី​លើ​តំបន់​មនុស្ស​រស់​នៅ​ក្នុងទីប្រជុំ​មាត់សមុទ្រ​មួយ​នៅក្បែរ​ទីក្រុង​កំពង់ផែ​អូ​ដេសា​(Odesa)​កាលពី​ព្រឹក​ថ្ងៃ​សុក្រ​បាន​សម្លាប់​មនុស្ស​​យ៉ាងតិច​១៨​នាក់ រួម​មាន​កូនក្មេង​ពីរ​នាក់ នេះ​បើ​តាម​សេចក្តីរាយការណ៍​របស់​អាជ្ញាធរ​អ៊ុ​យក្រែន នៅ​មួយ​ថ្ងៃ​ក្រោយពី​កងកម្លាំង​រុស្ស៊ី​ដក​ចេញពី​កោះ​យុទ្ធសាស្ត្រ​មួយ​នៅ​សមុទ្រ​ខ្មៅ​។​

​វីដេអូ​ស្តីពី​ការ​បាយ​ប្រហារ​នៅមុន​ព្រឹកព្រឹ​លឹមនេះ បានបង្ហាញ​អាគារ​ឆេះ​រោល​ឡើង​ខ្មៅ​នៅក្នុង​ទីប្រជុំជន សឺ​ហ៊ី​អ៊ីវ​កា​(Serhiivka) នៅ​ចម្ងាយ​ប្រហែល​៥០​គីឡូម៉ែត្រ​ពីទីក្រុង​អូ​ដេសា​។​សារព័ត៌មាន​​អ៊ុយ​ក្រែន​បាន​និយាយថា កាំជ្រួច​វាយប្រហារ​ចំ​អាគារ​ផ្ទះល្វែង​ជាច្រើន​ជាន់​មួ​យ​និង​តំបន់​រមណីយដ្ឋាន​មួយ​។​

​អនុប្រធាន​ការិយាល័យ​ប្រធានាធិបតី​អ៊ុ​យក្រែន លោក គី​រី​ល ទី​ម៉ូ​សេន​កូ​(Kirill Tymoshenko)​បាន​និយាយថា មនុស្ស​១៨​នាក់​បាន​ស្លាប់ រួម​មាន​កូនក្មេង​ពីរ​នាក់​។​ចំណែក​អ្នកនាំពាក្យ​រដ្ឋា​ភិ​​បាល​តំបន់​អូដេ​សាបា​ននិយាយថា មនុស្ស​៣០​នាក់​ទៀត​រងរបួស​។​

​ការវាយប្រហារ​តាម​ផ្លូវអាកាស​នេះ​កើត​ឡើង​ក្រោយ​កងកម្លាំង​រុស្ស៊ី​ដកចេញ​ពី​កោះពស់​នៅ​សមុទ្រ​ខ្មៅ​កាលពី​ថ្ងៃ​ព្រហស្បតិ៍ ជា​ចំណាត់ការ​មួយ​ដែល​គេ​រំពឹងថា​នឹង​បន្ថយ​ការ​គំរាម​ដល់​តំបន់​អូដេ​សានៅ​​ក្បែរ​នោះ​។​កោះ​នេះ​នៅតាម​ផ្លូវ​ដឹកជញ្ជូន​តាម​សមុទ្រ​ដ៏​មមាញឹក​។​រុស្ស៊ី​បាន​ចូល​កាន់កាប់​វា​តាំង​ពី​ប៉ុន្មាន​ថ្ងៃ​ដំ​បូង​នៃ​ការផ្ទុះ​សង្គ្រាម ដោយ​ទំនង​ជា​សង្ឃឹមថា​ប្រើ​វា​ជាទី​តាំង​ឈរជើង​ដើម្បី​វាយ​ចាប់យក​​កំពង់ផែ​អូ​ដេសា​។​

​រដ្ឋាភិបាល​វិមាន​ក្រឹម​ឡាំង​បាន​ពណ៌នា​ការដក​កងកម្លាំង​នេះ​ថា​ជា​«​កាយវិការ​សុ​ឆន្ទៈ​»​មួយ​ខណៈ​ប្រធានាធិបតី​ឥណ្ឌូនេស៊ី​កំពុង​ធ្វើ​ទស្សនកិច្ច​ទីក្រុង​មូ​ស្គូនិង​ស្នើសុំ​អោយ​រុស្ស៊ី​កុំ​រារាំង​ការដឹកជញ្ជូន​ស្បៀង​​ចេញពី​អ៊ុ​យក្រែន​។​ទោះជា​យ៉ាងណា យោធា​អ៊ុយ​ក្រែន​បាន​និយាយថា ការបាញ់​ផ្លោង​ដាក់​និង​ការវាយប្រហារ​ដោយ​កាំជ្រួច​ស្រោច​របស់ខ្លួន​បាន​បង្ខំ​អោយ​រុស្ស៊ីរ​ត់ភៀសខ្លួន​តាម​ទូក​លឿន​ចំនួន​ពីរ​គ្រឿង​។​

​កាលពី​ថ្ងៃ​ចន្ទ ការវាយប្រហារ​ដោយ​កាំជ្រួច​រុស្ស៊ី​មួយទៀត​ត្រូវ​ចំ​ផ្សារ​មួយ​នៅ​ទីក្រុង ក្រេ​មិន​ជុក​(Kremenchuk)​ដោយ​សម្លាប់​មនុស្ស​យ៉ាង​តិច​១៩​នាក់​និង​របួស​៦២​នាក់​ទៀត​៕

​រូប​ផ្តល់​ដោយ​សេវា​គ្រាអាសន្ន​អ៊ុ​យក្រែន បង្ហាញ​អាគារ​មនុស្ស​រស់​នៅ​ខូចខាត​និង​ឆេះ​ដោយសារ​អ្វី​ដែល​អ៊ុយ​ក្រែន​ថា​ជា​ការវាយប្រហារ​ដោយ​កាំ​ជ្រួច​រុស្ស៊ី​