ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អភិបាលក្រុង​តូច​មួយ​របស់​ម៉ិក​ស៊ិក​បាន​រៀបការ​ជាមួយ​កូនក្រ​មុំជា​សត្វ​ក្រពា​នៅក្នុង​ពិធី​ចម្រុះ​ពណ៌​មួយ ខណៈ​តន្ត្រី​ប្រពៃណី​បាន​បន្លឺ​ឡើង​ហើយ​អ្នក​ដើរលេង​​បុណ្យ​នាំគ្នា​រាំលេង ខណៈ​រំអុក​មេដឹកនាំ​ជនជាតិដើម​ភាគតិច​រូប​នេះ​ឱ្យ​ភ្ជាប់​ចំណងអាពាហ៍ពិពាហ៍​មួយ​នេះ​ដោយ​ការ​ថើប​។​

​អភិបាលក្រុង​សាន់ប៉េ​ត្រូ​ហួ​មេ​លូឡា (San Pedro Huamelula) លោក វី​កទ័រ យូ​ហ្គោ សូ​សា (Victor Hugo Sosa) បាន​ធ្វើ​តាម​ការរំអុក​ជាច្រើន​ដង​ក្នុង​ពិធីមង្គលការ​កាលពី​ថ្ងៃ​ព្រហស្បតិ៍ ទី​៣០ មិថុនា ដោយ​ឱន​ថើប​បបូរមាត់​ក្រពា ដែល​គេ​ចង​ជាប់​ដើម្បី​បង្ការ​កុំឱ្យ​វា​ខាំ​ដោយ​ប្រការ​ណាមួយ​។​

​ការ​រៀប​អាពាហ៍ពិពាហ៍​តាម​ពិធី​សាសនា​បែបនេះ​គឺ​មាន​តាំង​ពី​រាប់​សតវត្សរ៍​មុន​នៅ​សម័យមុន​ភា​សាអេ​ស្ប៉ាញ​ក្នុងចំណោម​សហគមន៍​ជនជាតិដើម​ភាគតិច ឆុន​តាល់ (Chontal)​និង​ហួ​វេ (Huave) នៃ​រដ្ឋ​អា​វសា​កា (Oaxaca) ដែល​ប្រៀប​បី​ដូច​ជា​ការ​បួងសួង​សុំ​ពរជ័យ​ពី​ធម្មជាតិ​ផងដែរ​។​

​លោក​សូ​សា​ជា​អភិបាល​ក្រុង​នៅ​តំបន់​ភូមិ​នេសាទ​នៅ​ឆ្នេរសមុទ្រ​ប៉ាស៊ីហ្វិក​នៃ​រដ្ឋ​អា​វសា​កា បាន​និយាយថា “​យើង​បួងសួង​សុំ​ធម្មជាតិ​ឱ្យ​យើង​មាន​ភ្លៀង​គ្រប់គ្រាន់ មាន​អាហារ​គ្រប់គ្រាន់ មាន​ត្រី​​នៅក្នុង​ទន្លេ​”​។​

​រដ្ឋ​អាសា​កា ដែល​មាន​ទីតាំង​នៅ​តំបន់​ភាគខាងត្បូង​ដ៏​ក្រីក្រ​របស់​ម៉ិក​ស៊ិក ត្រូវបាន​សន្មត​ថា​ជា​រដ្ឋ​សម្បូរបែប​ខាង​វប្បធម៌​ជនជាតិដើម​ភាគតិច​បំផុត​របស់​ប្រទេស​និង​ជា​កន្លែង​សម្រាប់​ក្រុម​ជនជាតិ​​ជាច្រើន​ដែល​បាន​ថែរក្សា​ភាសា​និង​ប្រពៃណី​របស់​ពួកគេ​រហូត​មក​ទល់​សព្វថ្ងៃ​។​

​ពិធី​សាសនា​បុរាណ​នៅ​ក្រុង​សាន់ប៉េ​ត្រូ​ហួ​មេ​លូឡា ដែល​ឥឡូវ​លាយឡំ​ជាមួយ​នឹង​ជំនឿ​សាសនា​កាតូលិក គឺពាក់ព័ន្ធ​នឹង​ការ​ស្លៀកពាក់​រ៉ូប​អាពាហ៍ពិពាហ៍​ពណ៌​ស​ឱ្យ​សត្វ​ក្រពា​បូក​នឹង​សម្លៀកបំពាក់​​ចម្រុះ​ពណ៌​ផ្សេងទៀត​។​

​សត្វ​ល្មូ​ន​អាយុ​ប្រាំពីរ​ឆ្នាំ ដែល​គេ​ហៅថា ព្រះ​នាង​តូច ត្រូវ​គេ​ជឿ​ថា​ជា​អាទិទេព​តំណាងឱ្យ​មាតា​ធរណី​ហើយ​អាពាហ៍ពិពាហ៍​របស់​វា​ជា​មួយ​មេដឹកនាំ​ក្នុង​តំបន់​ជា​និមិត្តរូប​នៃ​ការចូលរួម​របស់​មនុស្ស​ជាមួយនឹង​ព្រះ​៕

​អាពាហ៍ពិពាហ៍​របស់​ក្រពា​ជាមួយ​មេដឹកនាំ​ក្នុង​តំបន់​គឺជា​និមិត្តរូប​នៃ​ការចូលរួម​របស់​មនុស្ស​ជាមួយនឹង​ព្រះ