​ដោយៈ ប​.​ខុន / ភ្នំពេញៈ ខណៈពេល​ព្យុះ​ទី​៣ ឈ្មោះ ចា​បា (CHABA) ដើរ​ទៅដល់​ទន្ទឹម ខាងកើត​កោះ​ហៃណាំ ព្យុះ​ទី​៤ ឈ្មោះ អៀ​រ៉េ (AERE) ក៏បាន​កើតមាន នៅក្នុង​សមុទ្រ ប៉ាស៊ីហ្វិក ភាគ​ឦសាន នៃ​ប្រទេស​ហ្វីលីពីន មានដំណើរ​ទៅរក​ឧបទ្វីប​កូរ៉េ តែ​មិនមាន​ឥទ្ធិពល អ្វី ដល់​ប្រទេស​កម្ពុជា​នោះទេ​។ ចំពោះ​ព្យុះ​ចា​បា ដែល​នឹង​ដើរកាត់​លើ​ភាគ​ឦសាន នៃ​កោះ​ហៃណាំ​បន្តិច មុននឹង​ទៅដល់​ដីគោក​ប្រទេស​ចិន ធ្វើឱ្យមាន​ខ្យល់​ខ្លាំង នៅ​តំបន់​មាត់ សមុទ្រ​របស់​កម្ពុជា ជាមួយនឹង​ការធ្លាក់​ភ្លៀង​ច្រើន នៅ​ថ្ងៃទី​២ និង​ទី​៣ ខែកក្កដា នៅ​តំបន់​មាត់ សមុទ្រ និង​តំបន់​ខ្ពង់រាប​។​

​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ ក្រសួង​ធន​ធា​នឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​១ ខែកក្កដា​ថាៈ ព្យុះ​ទី​៣ ឈ្មោះ ចា​បា (CHABA) ដែល​ដើរ​ទៅដល់ ទន្ទឹមនឹង​ខាងកើត​កោះ​ហៃណាំ ក្នុង​កម្រិត​ជា STS នឹង​ដើរកាត់​លើ ភាគ​ឦសាន នៃ​កោះ​ហៃណាំ មុននឹង​ទៅដល់​ជ្រៅ លើដី​គោក​ប្រទេស​ចិន ក៏មាន​ព្យុះ​មួយ ទៀត ឈ្មោះ អៀ​រ៉េ (AERE) បានកើត​ឡើង នៅក្នុង​សមុទ្រ​ប៉ា​ស៊ិ​ហ្វិ​ក ភាគ​ឦសាន នៃ​ប្រទេស​ហ្វីលីពីន ដោយមាន​ដំណើរ​ទៅរក​ឧបទ្វីប​កូរ៉េ តែ​គ្មាន​ឥទ្ធិពល​អ្វី ដល់​ប្រទេស​កម្ពុជា​ទេ​។​

​អ្នកនាំពាក្យ ក្រសួង​ជំនាញ​ខាងលើ បាន​និយាយ​ឱ្យដឹងទៀតថាៈ ចំពោះ​ព្យុះ​ទី​៣ ដែល​កាន់តែ​ទៅដល់​កៀក ខាងកើត​កោះ​ហៃណាំ មានដំណើរ​ចូល​ជ្រៅ លើដី​គោក​ប្រទេស ចិន ធ្វើឱ្យ​តំបន់​មាត់សមុទ្រ​កម្ពុជា មាន​ខ្យល់​ខ្លាំង និង​ភ្លៀង​ច្រើន ជាពិសេស​នៅ​ថ្ងៃទី​២ និង​ទី​៣ ខែកក្កដា​។ នៅ​ថ្ងៃទី​១ ខែកក្កដា​នេះ នៅ​ភ្នំពេញ មាន​ភ្លៀង ក្នុង​កម្រិត​តិចតួច តែ​នៅ តំបន់​មាត់សមុទ្រ ខេត្តកោះកុង និង​ខ្ពង់រាប​ភាគ​ឦសាន មាន​ភ្លៀង​ច្រើន​។ តំបន់​អាង​ទន្លេ មេគង្គ​លើ ក៏មាន​ភ្លៀង​ធ្លាក់​ដែរ តែ​មិន​ច្រើន​ទេ នៅពេល​ព្យុះ ដើរទៅ​ជិត​ដល់​ដីគោក​ប្រទេស ចិន នា​ល្ងាច​ថ្ងៃទី​២ ខែកក្កដា​នោះ​។ ភ្លៀង​ធ្លាក់ រយៈពេល ២៤ ម៉ោង នៅ​ក្រុងព្រះសីហនុ ត្រឹម​ព្រឹក​ថ្ងៃទី​១ ខែកក្កដា មាន​កម្រិត ៨៧ មី​លី​ម៉ែត្រ ស្រុក​ស្ទឹងហាវ ១៤៦ មី​លី​ម៉ែត្រ និង​នៅ​ស្រុក​ព្រៃនប់ មាន​កម្រិត ២២៩ មី​លី​ម៉ែត្រ​។​

​របាយ​ទឹកភ្លៀង ដែល​បាន​ធ្លាក់ រយៈពេល ២៤ ម៉ោង ត្រឹម​ព្រឹក​ថ្ងៃទី​១ ខែកក្កដា នៅ​រាជធានី​ភ្នំពេញ មាន​កម្រិត​ពី ៨ ដល់ ៥៥ មី​លី​ម៉ែត្រ​, ខេត្ត​ព្រះសីហនុ មាន​កម្រិត​ពី ៨៧ ដល់ ២២៩ មី​លី​ម៉ែត្រ​, ខេត្តកំពង់ឆ្នាំង មាន​កម្រិត​ពី​តិច ដល់ ៤១ មី​លី​ម៉ែត្រ​, ខេត្តកោះកុង​មាន​កម្រិត ២២ ដល់ ១៤៦ មី​លី​ម៉ែត្រ​, ខេត្តក្រចេះ មាន​កម្រិត​ពី ១៤ ដល់ ៨៣ មី​លី​ម៉ែត្រ​, ខេត្តរតនគិរី មាន​កម្រិត​ពី ៦ ដល់ ៨២ មី​លី​ម៉ែត្រ​, ខេត្តកណ្តាល មាន​កម្រិត​ពី​តិច ដល់ ៤០ មី​លី​ម៉ែត្រ​, ខេត្តស្វាយរៀង មាន​កម្រិត​ពី​តិច ដល់ ៣៤ មី​លី​ម៉ែត្រ​, ខេត្តព្រះវិហារ មាន​កម្រិត ពី​តិច ដល់ ៣២ មី​លី​ម៉ែត្រ​, ខេត្ត​ឧ​ត្ត​រ​មានជ័យ កម្រិត​ពី​តិច ដល់ ៤០ មី​លី​ម៉ែត្រ​, ខេត្តកំពត មាន​កម្រិត​ពី​តិច ដល់ ៣២ មី​លី​ម៉ែត្រ​, ខេត្ត​ត្បូងឃ្មុំ មាន​កម្រិត​ពី​តិច ដល់ ៤១ មី​លី​ម៉ែត្រ​, ខេត្ត​កែប មាន​កម្រិត​ពី​តិច​ដល់ ៣២ មី​លី​ម៉ែត្រ​, មណ្ឌលគិរី មាន​កម្រិត​ពី​តិច ដល់ ២៦ មី​លី​ម៉ែត្រ​, ខេត្តពោធិសាត់​មាន​កម្រិត ពី ១៥ ដល់ ៨៧ មី​លី​ម៉ែត្រ និង​ខេត្តកំពង់ចាម មាន​ភ្លៀង​កម្រិត​ពី​តិច ដល់ ៣៤ មី​លី​ម៉ែត្រ​។​

​ក្រសួង​ធនធានទឹក និង​ឧតុនិយម កាលពី​ថ្ងៃទី​២៨ ខែមិថុនា បាន​ជូនដំណឹង ស្តីពី​ការ​ព្យាករ ស្ថានភាព​ធាតុអាកាស​ធាតុ សម្រាប់​ពីថ្ងៃ​ទី​២៩ ដល់​ថ្ងៃទី​៥ ខែកក្កដា ឆ្នាំ​២០២២​ថា ព្រះរាជាណាចក្រ​កម្ពុជា នឹង​ទទួលរង​ឥទ្ធិពល ពី​ជ្រលង​នៃ​ប្រព័ន្ធ​សម្ពាធ​ទាប ដែល​អូសបន្លាយ លើ​ភាគ​ខាងជើង ប្រទេស​ថៃ ឡាវ និង វៀតណាម ភ្ជាប់​ទៅនឹង​សម្ពាធ​ទាប​មួយទៀត នៅក្នុង​សមុទ្រ​ចិន​ខាងត្បូង ដែល​នឹង​វិ​វត្ត​ខ្លួន ជា​បន្តបន្ទាប់​ទៅជា​ព្យុះ​ទី​៣ ដោយមាន​ដំណើរ ឆ្ពោះទៅកាន់​កោះ​ហៃណាំ​។​

​សេចក្តីជូនដំណឹង សរសេរ​ទៀតថាៈ ស្ថានភាព​បែប​ខាងលើនេះ នឹងធ្វើ​ឲ្យ​បណ្តា​ខេត្ត នៅ​តំបន់​វាលទំនាប​កណ្តាល មាន​សីតុណ្ហភាព អប្បបរមា​ពី ២៤ ទៅ ២៦ អង្សា​សេ និង​សីតុណ្ហភាព អតិបរមា មាន​ពី ៣៤ ទៅ ៣៦ អង្សា​សេ​។ អាចមាន​ភ្លៀង​ធ្លាក់ ក្នុង​កម្រិត​ពី​តិច​ទៅ​បង្គួរ ក្នុងនោះ ក៏​នឹង​អាចមាន​ភ្លៀង​ច្រើន ដោយ​អន្លើ​លាយឡំ​ទៅដោយ ផ្គរ រន្ទះ​និង ខ្យល់​កន្ត្រាក់ នៅ​វាលទំនាប​ភាគ​កណ្តាល និង​ភាគ​ពាយ័ព្យ​។​

​សម្រាប់​បណ្តា​ខេត្ត​នៅជាប់​ជួរ​ភ្នំ​ដងរែក​និង​ខ្ពង់រាប​ភាគ​ឦសាន មាន​សីតុណ្ហភាព អប្បបរមា​ពី ២៤ ទៅ ២៦ អង្សា​សេ និង​សីតុណ្ហភាព អតិបរមា មាន​ពី ៣៣ ទៅ ៣៥ អង្សា​សេ​។ អាចមាន​ភ្លៀង​ធ្លាក់ នៅក្នុង​កម្រិត​ពី​តិច​ទៅ​ច្រើន លាយឡំ​ទៅដោយ​ផ្គរ រន្ទះ​និង​ខ្យល់​កន្ត្រាក់​។​

​សម្រាប់​តំបន់​មាត់សមុទ្រ មាន​សីតុណ្ហភាព អប្បបរមា​ពី ២៤ ទៅ ២៦ អង្សា​សេ និង​សីតុណ្ហភាព អតិបរមា មាន​ពី ៣៤ ទៅ ៣៦ អង្សា​សេ​។ អាចមាន​ភ្លៀង​ធ្លាក់ ក្នុង​កម្រិត​ពី​មធ្យម​ទៅ​ច្រើន លាយឡំ​ទៅដោយ​ផ្គរ រន្ទះ និង​ខ្យល់​កន្ត្រាក់ ។ នៅលើ​ផ្ទៃសមុទ្រ អាចមាន​ភ្លៀង ខ្យល់​បក់​ខ្លាំង​និង​រលក​សមុទ្រ​ខ្ពស់ៗ​៕/V