ដោយ​៖ ដេប៉ូ / សៀមរាប​៖ មន្ត្រីជាន់ខ្ពស់​នៃ​ក្រសួងបរិស្ថាន បាន​ថ្លែងថាៈ គម្រោង​«​និរន្តរភាព តំបន់​ទេសភាព និង​ទេសចរណ៍ធម្មជាតិ​កម្ពុ​ជា​» បាន​ចូលរួម​ធ្វើឱ្យ​ប្រសើរ នូវ​ការគ្រប់គ្រង តំបន់ការពារធម្មជាតិ និង​អំណោយផល ដើម្បី​លើកកម្ពស់​អេកូ​ទេសចរណ៍ និង​ខ្សែសង្វាក់ តម្លៃ​អនុផល​ព្រៃឈើ នៅ​តំបន់​ទេសភាព​ជួរ​ភ្នំក្រវាញ និង​បឹង​ទន្លេសាប ហើយក៏​ដូចជា​ចូលរួម លើកស្ទួយ​ជីវភាព​សហគមន៍​មូលដ្ឋាន​ផងដែរ​។​

​លោក ខៀវ បូ​រិ​ន អគ្គនាយក នៃ​អគ្គនាយកដ្ឋាន​មូលដ្ឋាន នៃ​ក្រសួងបរិស្ថាន និង​ជានា​យក គម្រោង «​និរន្តរភាព​តំបន់​ទេសភាព និង​ទេសចរណ៍ធម្មជាតិ​កម្ពុ​ជា​» បាន​ថ្លែង​បែបនេះ ក្នុងពេល​បំពេញ​ទស្សនកិច្ច​ស្វែងយល់ អំពី​ផលិតផល និង​សេវាកម្ម​ទេសចរណ៍ធម្មជាតិ នៅ​តំបន់​ឧទ្យាន​ជាតិ​ជ័យវរ្ម័ន​-​នរោត្តម «​ភ្នំ​គូលែន​» និង​បឹង​ទន្លេសាប រយៈពេល ៣​ថ្ងៃ ពោល គឺ​ចាប់ពី​ថ្ងៃទី​២៨ ដល់​ថ្ងៃទី​៣០ ខែមិថុនា ឆ្នាំ​២០២២​។​

​ទាក់ទិន​ក្នុង​រឿងនេះ លោក ខៀវ បូ​រិ​ន បានលើកឡើង ដោយ​បញ្ជាក់ថាៈ គម្រោង «​និរន្តរភាព​តំបន់​ទេសភាព និង​ទេសចរណ៍ធម្មជាតិ​កម្ពុ​ជា​» ដែល​កំពុង​អនុវត្ត ដោយ ក្រសួងបរិស្ថាន​កំពុង​បោះជំហាន ដោយ​ជោគជ័យ​។ ព្រមជាមួយ​គ្នា វា​ក៏​ទាមទារ​ចាំបាច់ ដោយ​ឱ្យមាន​ការចូលរួម ពី​សំណាក់​ប្រជាពលរដ្ឋ ដែល​កំពុង​រស់នៅក្នុង​តំបន់​ទាំងនោះ តាម​ការ​រយៈ​ការកាត់បន្ថយ​ការប្រើប្រាស់ ធនធានធម្មជាតិ ដូចជា​ការចូល​កាប់ឆ្ការ​ព្រៃ តាមបែប​ប្រពៃណី ដើម្បី​ដាំ​ដំណាំ និង​ការ​បរបាញ់​សត្វ ជាដើម ។​ល​។​

​លោក ខៀវ បូ​រិ​ន បាន​ថ្លែងថាៈ “​គម្រោង​មួយ​នេះ បាន​អនុវត្ត​ចំនួន ៦ ឆ្នាំ ដោយបាន​ចាប់ផ្តើម ពី​ឆ្នាំ ២០១៩ ដោយ​អនុវត្ត​នៅ​ខេត្ត​ចំនួន​៧ រួមមាន ខេត្តកោះកុង កំពង់ស្ពឺ កំពង់ឆ្នាំង ពោធិ៍សាត់​,​បាត់ដំបង សៀមរាប និង កំពង់ធំ​។ យើង​មាន​ថវិកា​សរុប ប្រហែល​ជិត ៦០ លាន​ដុល្លារ ”​។​

​លោក​បាន​មានប្រសាសន៍ថាៈ “ ក្រសួងបរិស្ថាន បាន​នឹង​កំពុង​ខិតខំ​អនុវត្ត​ភារកិច្ច​របស់ខ្លួន ដោយ​ដៃ​ម្ខាង ផ្តោតលើ​ការគ្រប់គ្រង អភិរក្ស​ធនធានធម្មជាតិ និង​ជីវៈចម្រុះ ដែលមាន​សារៈ សំខាន់​ចាំបាច់ ជា​សារវន្ត ក្នុងការ​ធានា​ដល់​និរន្តរភាព​បរិស្ថាន និង​តួនាទី​សេវាកម្ម​ប្រព័ន្ធ អេកូឡូស៊ី​ហើយ​ដៃ​ម្ខាង​ទៀត ផ្តោតលើ​ការជួយ​ដល់ ការអភិវឌ្ឍ​សហគមន៍ តំបន់​ការពារ ធម្មជាតិ ដែលជា​ឆ្អឹងខ្នង​មួយ​ដ៏​សំខាន់ ជា​យុទ្ធសាស្ត្រ​សម្រាប់​ការពារ អភិរក្ស​ធនធានធម្មជាតិ និង​ការអភិវឌ្ឍ​សេដ្ឋកិច្ច​មូលដ្ឋាន​”​។​

​ទាក់ទិន​ក្នុង​រឿងនេះ​ដែរ លោក​អគ្គនាយក​នៃ​អគ្គនាយកដ្ឋាន​មូលដ្ឋាន នៃ​ក្រសួងបរិស្ថាន បានបញ្ជាក់​បន្ថែមថាៈ គម្រោង​នេះ មាន​គោលបំណង​ធ្វើឱ្យ​ប្រសើរ នូវ​ការគ្រប់គ្រង​តំបន់ ការពារ​ធម្មជាតិ ជំរុញ​ឱកាស​សម្រាប់​ការអភិវឌ្ឍ​ទេសចរណ៍ធម្មជាតិ និង​ដើម្បី​បង្កើន​ច្រវាក់ តម្លៃ​អនុផល​ព្រៃឈើ នៅ​តំបន់​ទេសភាព​ជួរ​ភ្នំក្រវាញ និង​បឹង​ទន្លេសាប ដោយ​បែង​ចែកជា ៥ សមាសភាគ​៖ (១). ការពង្រឹង​សមត្ថភាព ក្នុងការ​រៀបចំ​ផែនការ និង​ការគ្រប់គ្រង​តំបន់ ទេសភាព ក្នុង​តំបន់ការពារធម្មជាតិ (២). ពង្រឹង​ឱកាស​សម្រាប់​អភិវឌ្ឍ​ទេសចរណ៍ធម្មជាតិ និង​ច្រវាក់​តម្លៃ​អនុផល​ព្រៃឈើ (៣). ជំរុញ​នូវ​ការតភ្ជាប់​ខ្សែ​ផ្លូវ ចេញចូល​នៅតាម​ជនបទ (៤). ការគ្រប់គ្រង​ត​ម្រោ​ង ការត្រួតពិនិត្យ និង​ការវាយតម្លៃ និង (៥). ការឆ្លើយតប ទៅនឹង​គ្រោះអាសន្ន​។​

​គួរ​បញ្ជាក់ថា ក្រោម​ការគាំទ្រ ពី​ធនាគារពិភពលោក​, ក្រសួងបរិស្ថាន និង​ក្រសួង​អភិវឌ្ឍន៍ ជនបទ អនុវត្ត​គម្រោង​៖ «​និរន្តរភាព​តំបន់​ទេសភាព និង​ទេសចរណ៍ធម្មជាតិ​កម្ពុ​ជា​» រយៈពេល ៦ ឆ្នាំ (២០២០-២០២៥) គម្រោង​មាន​វិសាលភាព​គាំទ្រ ដល់​ការគ្រប់គ្រង ធនធានធម្មជាតិ លើ​ផ្ទៃដី ប្រមាណ​ជាង ៣,៨ លាន​ហិកតា ក្នុង​តំបន់ការពារធម្មជាតិ ចំនួន​១៤​។​

​បច្ចុប្បន្ន ក្រសួងបរិស្ថាន កំពុង​គ្រប់គ្រង​តំបន់ការពារធម្មជាតិ ចំនួន​៧៤ និង​របៀង​អភិរក្ស ជីវៈចម្រុះ ចំនួន​៣ លើ​ផ្ទៃ​សរុប ៧,៣ លាន​ហិកតា ស្មើនឹង​៤១​ភាគរយ នៃ​ផ្ទៃដី​ប្រទេស និង​បាន​សម្របសម្រួល បង្កើត​សហគមន៍ តំបន់​ការពារ​ធ្ម​ជាតិ បាន ១៨២ ទីតាំង និង​មាន​សហគមន៍​ខ្លះ មាន​សក្តានុពល​ទេសចរណ៍ធម្មជាតិ ក៏​កំពុង​ទទួលបាន​ចំណូល ពី​ការផ្តល់​សេវាកម្ម​ទេសច​រណ៍ សម្រាប់​ការអភិវឌ្ឍន៍ ជីវភាព​សហគមន៍ ថែមទៀត​៕/V​