ដោយៈ គង់​ហេង​/ កំពង់ចាមៈ អាជ្ញាធរខេត្ត​កំពង់ចាម បាន​អំពាវនាវ​ដល់​អាណាព្យាបាល ទាំងអស់ ដែលមាន​សមាជិកគ្រួសា​រណា ដែល​ប្រើប្រាស់​គ្រឿងញៀន សូម​រាយការណ៍​ប្រាប់ សមត្ថកិច្ច ដើម្បី​យកទៅ​បន្សាប គឺ​អត់​មានទោស​ទេ​។ ផ្ទុយ​មកវិញ បើ​ដឹងថា សមាជិក ក្នុង​គ្រួសារ​ប្រើប្រាស់​ថ្នាំញៀន​ហើយ ត្រូវ​សមត្ថកិច្ច​ចាប់បាន ពេល​កំពុង​ប្រព្រឹត្ត គឺ​កសាង​សំណុំរឿង ចាត់ការ​តាម​នីតិវិធី​។ នេះ​ជាការ​លើកឡើង​របស់លោក អ៊ុន ចាន់​ដា អភិបាលខេត្ត​កំពង់ចាម ជា​ប្រធាន​គណៈបញ្ជាការ​ឯកភាព​រដ្ឋបាលខេត្ត និង​ជា​ប្រធាន​គណៈ ក​ម្មា​ធិ​ការត្រួតពិនិត្យ​គ្រឿងញៀន​ខេត្ត​នេះ នៅក្នុង​ការដែល​លោក និង​សហការី បាន​អញ្ជើញ ចូលរួម ក្នុង​ទិវា​អន្តរជាតិ ប្រយុទ្ធប្រឆាំង​គ្រឿងញៀន ដែល​រៀបចំ​នៅ​ស្រុក​បាធាយ កាលពី​ថ្ងៃទី​៣០ មិថុនា ម្សិលមិញ​នេះ​។​

​ប្រធាន​គណៈបញ្ជាការ​រ​ដ្ឋ​បាល ខេត្តកំពង់ចាម បាន​មានប្រសាសន៍ថាៈ ករណី​ឪពុកម្តាយ អាណាព្យាបាល ប្រៀនប្រដៅ​កូន ចៅ​មិនបាន​ហើយ សូម​ទុក​ការងារ​នេះ ឱ្យ​សមត្ថកិច្ច​អប់រំ ជំនួស​ម្តង គឺ​បច្ចុប្បន្ន នៅ​ពន្ធនាគារ​ខេត្ត មាន​អ្នក​ជាប់ទោស និង​ជាប់​សង្ស័យ​ពាក់ព័ន្ធ បទល្មើស​គ្រឿងញៀន ប្រមាណ ៧០ ភាគរយ ក្នុងចំណោម​អ្នក​ជាប់ឃុំ សរុប​ប្រមាណ ១.០០០ នាក់​។​

​លោក​បាន​បន្តថាៈ អីចឹង ឪពុកម្តាយ បើ​គ្មាន​សមត្ថភាព​ឃុំគ្រង ប្រដៅ​កូន​ទេ នៅពេល​សមត្ថកិច្ច ចាប់បាន​ហើយ សូម​កុំមក​អន្តរាគមន៍ ឬ​នៅ​ពីក្រោយ អង្វរក សំពះ សុំ​ឱ្យគេ​រួចខ្លួន គឺ​ឱ្យគេ (​កូន​) ទៅកាន់​ពន្ធនាគារ​ប្រដៅ​អប់រំ បន្សាប​ថ្នាំញៀន ឱ្យ​អស់ពី​ខ្លួន ដើម្បី​មាន​សុខ​ភាពល្អ​ឡើងវិញ​។ ពិសេស​យុវជន កុំ​ព្យាយាម​សាកល្បង​គ្រឿងញៀន ដូចជា​ប្រភេទ​បារី​អេឡិចត្រូនិក ដែល​កំពុង​ពេញនិយម​នាពេល​បច្ចុប្បន្ន គឺជា​ពពួក​គ្រឿងញៀន ត្រូវ​ហាមឃាត់​ទាំងអស់​៕/V​