​ប្រែ​សម្រួលៈ​បំណង​(​ដេល្លី​ម៉េល​)៖​អាម៉េរិក​កាលពី​ថ្ងៃ​សុក្រ​ទី​០១​កក្កដា​បាន​ប្រកាសថា​ខ្លួន​នឹង​ផ្តល់​ជំនួយ​យោធា​ថ្មី​តំលៃ​៨២០​លាន​ដុល្លារ​ដល់​អ៊ុ​យក្រែន រួមមាន​ប្រព័ន្ធ​បាញ់​កាំជ្រួច​ពី​ដី​ទៅ​អាកាស​និង​រ៉ា​ដា​​ប្រឆាំង​កាំភ្លើង​ធំ​ដើម្បី​ឆ្លើយតប​នឹង​ការ​ពឹងពាក់​យ៉ាង​ខ្លាំង​របស់​រុស្ស៊ី​លើ​ការវាយប្រហារ​ពី​ចម្ងាយ​។​

​រុស្ស៊ី​នៅ​មួយ​រយៈពេល​ចុងក្រោយ​នេះ​បាន​បាញ់​កាំជ្រួច​រាប់សិប​គ្រាប់​ទៅលើ​ទូទាំង​ប្រទេស​អ៊ុ​យក្រែន និង​កំទេច​កងកម្លាំង​អ៊ុយ​ក្រែននៅសមរភូមិដុនបាស​ជាមួយនឹង​ការបាញ់​ផ្លោង​ជា​បន្ត​ពេលខ្លះ​ម្តង​អស់​ពេល​រាប់​ម៉ោង​។​ពួក​​មេដឹកនាំ​អ៊ុយ​ក្រែ​នក្នុងពេល​ជាមួយគ្នា អំ​ពា​វនាវ​អោយ​សម្ពន្ធមិត្ត​លោកខាងលិច​រួសរាន់​បញ្ជូន​គ្រាប់រំសេវ​និង​ប្រព័ន្ធ​អាវុធ​ទំនើប​ឡើង​ដើម្បី​ជួយ​ពួក​គេ​កាត់​បន្ថយ​ប្រៀប​របស់កងកម្លាំងរុស្ស៊ី ទាំង​ខាង​គ្រឿង​បរិក្ខា​យោធា​និង​​កម្លាំង​ទាហាន​។​

​អាម៉េរិក​បាន​ជួយ​អ៊ុយ​ក្រែន​អស់​៨,៨​ពាន់​លាន​ដុល្លារ​រួច​ហើយ​ទាំង​ខាង​សព្វាវុធ​និង​ការហ្វឹកហាត់​យោធា តែ​ក្រុម​មេដឹកនាំ​អ៊ុយ​ក្រែន​បាន​ស្វះស្វែង​រក​សព្វាវុធ​ទំនើប​ខ្លាំង​ឡើង​ពី​សម្ពន្ធមិត្ត​ដើម្បី​វាយ​រុញ​​ច្រាន​កងកម្លាំង​រុស្ស៊ី​ដែល​បំពាក់​សម្ភារ​សឹក​ទំនើប​ជាង​និង​កម្លាំង​ច្រើនជាង​។​

​សូមបញ្ជាក់​ថា ជំនួយ​ប្រមាណ​៧​ពាន់​លាន​ដុល្លារ​ត្រូវបាន​អាម៉េរិក​ផ្តល់​ដល់​អ៊ុយ​ក្រែន​គិត​ចាប់តាំងពី​សង្គ្រាម​ចាប់ផ្តើម​កាល​ពី​ចុងខែ​កុម្ភៈ​។​

​ប្រធានាធិបតី​អាម៉េរិក​លោក ចូ បៃ​ដិន បាន​និយាយ​នៅ​សប្តាហ៍​នេះ​ថា «​យើង​ត្រូវ​គាំទ្រ​អ៊ុ​យក្រែន ដរាបណា​ប្រទេស​នេះ​នៅ​ទទួល​យក​ជំនួយ​»​។​លោក​បាន​អះអាង​ថា រុស្ស៊ី​ត្រូវបាន​វាយ​មួយ​ព្រនង់​ចំពោះ​​ជំហរ​របស់​អន្តរ​របស់​ខ្លួន​និង​រង​ការខូចខាត​សេដ្ឋកិច្ច​ធ្ងន់ធ្ងរ​ដោយសារតែ​ទណ្ឌកម្ម​ដាក់​ដោយ​លោកខាងលិច​។​អាម៉េរិក​កំពុង​ផ្តល់​អោយ​ប្រជាជន​អ៊ុយ​ក្រែន​នូវ​«​សមត្ថភាព​»​ដើម្បី​អោយ​ពួកគេ​«​អាច​បន្ត​តតាំង​នឹង​ការឈ្លានពាន​របស់​រុស្ស៊ី​។​ដូច្នេះ​ខ្ញុំ​អត់​ដឹង​ថា​វា​នឹង​បញ្ជប់​ដោយ​របៀប​ណា​ទេ តែ​វា​​នឹង​មិន​បញ្ចប់​ត្រឹម​រុស្ស៊ី​បំបាក់​អ៊ុយ​ក្រែន​ឡើយ​»​។​

​ជំនួយ​ប្រកាស​កាលពី​ថ្ងៃ​សុក្រ តាម​ទម្លាប់​ត្រូវ​ចំណាយ​ពេល​រា​បើ​សប្តាហ៍​ឬ​ខែ​ទើប​អាច​ទៅដល់​អ៊ុ​យក្រែន​។​

​ជា​ផ្នែក​នៃ​កញ្ចប់​ជំនួយ​ថ្មី អាម៉េរិក​នឹង​ទិញ​ប្រព័ន្ធ​កាំជ្រួច​ប្រឆាំង​យន្តហោះ​ផលិត​នៅ​ន័​រវេស​ហៅថា​NASAMS​ចំនួន​ពីរ​ឈុត​អោយទៅ​អ៊ុ​យក្រែន។សព្វាវុធប្រភេទនេះ​ធ្លាប់ប្រើ​ការពារ​ដែនអាកាស​នៅ​ជុំវិញ​សេត​វិមាន​និង​វិមាន​រដ្ឋ​សភា​​កា​ពី​តូ​ល​ក្នុង​ទីក្រុង​វ៉ាស៊ីនតោន ​។​

​មន្ត្រី​យោធា​ជាន់ខ្ពស់​ម្នាក់​បាន​ប្រាប់​អ្នកយកព័ត៌មាន​ថា ការបញ្ជូន​ប្រព័ន្ធ​កាំ​ជ្រួច​NASAMS​នេះ​មាន​បំណង​ជួយ​ផ្លាស់ប្តូរ​អ៊ុយ​ក្រែន​អោយ​ឈប់​ប្រើ​ប្រព័ន្ធ​កាំជ្រួច​ផលិត​សម័យ​សូ​វៀត​ដែល​គ្រឿងបន្លាស់​​និង​គ្រាប់រំសេវ​មាន​ប្រភព​នៅ​រុស្ស៊ី​។​

​ក្រសួង​ការពារជាតិ​អាម៉េរិក​ក៏​ផ្តល់​អោយ​អ៊ុយ​ក្រែន​នូវ​គ្រាប់កាំភ្លើង​ធំ​១៥៥​មី​លី​ម៉ែត្រ​ចំនួន​១៥០.០០០​គ្រាប់ ទិញ​រ៉ា​ដា​ប្រឆាំង​កាំភ្លើង​ធំ​ចំនួន​បួន​គ្រឿង​អោយ​អ៊ុ​យក្រែន និង​ជួយ​បង្ហាត់​ទាហាន​អ៊ុ​យក្រែន​​អោយ​ចេះ​ប្រើ​សព្វាវុធ​ទាំងនេះ​៕