ដោយ​៖ សុវណ្ណ​កុម្ភៈ / ភ្នំពេញ​៖ គណៈអចិន្ត្រៃយ៍ គណៈកម្មាធិការ​ជាតិ រៀបចំ​ការប្រកួត​កីឡា អាស៊ីអាគ្នេយ៍ លើក​ទី​៣២ ឆ្នាំ​២០២៣ (CAMSOC) ដឹកនាំ​ដោយ​លោក​បណ្ឌិត ថោង ខុន អនុប្រធាន​អចិន្ត្រៃយ៍ CAMSOC បានរៀបចំ​បែងចែក​តួនាទី​ភារកិច្ច ដល់​គណៈកម្មការ ជំនាញ​នានា ដើម្បី​ត្រៀម​ទទួល​ធ្វើ​ម្ចាស់ផ្ទះ ហើយ​លោក​បាន​បញ្ជាក់ថា នឹង​បើក​កិច្ចប្រជុំ ក្រុមប្រឹក្សា​កីឡា​អាស៊ីអាគ្នេយ៍ និង​ក្រុមប្រឹក្សា​សហព័ន្ធ កីឡា​អាស៊ាន​ប៉ា​រ៉ា​ហ្គេម នា​ថ្ងៃទី​១១ ដល់​ថ្ងៃទី​១៣ ខែកក្កដា ឆ្នាំ​២០២២ នៅ​រាជធានី​ភ្នំពេញ ។​

​ក្រោយពី​ទទួលបាន​ការអនុញ្ញាត ពីស​ម្តេច​តេ​ជោ នាយករដ្ឋមន្ត្រី ហ៊ុន សែន និង​សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ និង​ជា​ប្រធាន​គណៈកម្មាធិការ​ជាតិ រៀបចំ​ការប្រកួត​កីឡា អាស៊ីអាគ្នេយ៍ លើក​ទី​៣២ ឆ្នាំ​២០២៣ (CAMSOC) នៅថ្ងៃនេះ លោក​បណ្ឌិត ថោង ខុន អនុប្រធាន​អចិន្ត្រៃយ៍ CAMSOC បាន​ដឹកនាំ​កិច្ចប្រជុំ ត្រៀម​រៀបចំ​ទទួល​បដិសណ្ឋារកិច្ច សម្រាប់​កិច្ចប្រជុំ​អាស៊ីអាគ្នេយ៍ ដ៏​មាន​
​សារសំខាន់ នាពេល​ពេល​ខាងមុខនេះ​។​

​នេះ​ជា​កិច្ចប្រជុំ​ចុងក្រោយ ដើម្បី​ពិនិត្យ​សម្រេច លើ​ការកំណត់​ប្រភេទ​កីឡា វិញ្ញាសា រួម​ជាមួយនឹង​ការត្រួត​ពិនិត្យ ទីលាន​ប្រកួត​នានា នៅ​ភ្នំពេញ​។ កិច្ចប្រជុំ​នេះ គឺ​ដើម្បី​ប្រមែប្រមូល នូវ​ការគាំទ្រ​បន្ថែម ពី​បណ្តា​សមាជិក​អាស៊ីអាគ្នេយ៍​ទាំងមូល​។​

​លោក​បណ្ឌិត ថោង ខុន បាន​ណែនាំ​ក្រុម​ជំនាញ​នានា ទទួល​ស្វាគមន៍​ភ្ញៀវ​អាស៊ីអាគ្នេយ៍ ឲ្យ​ទទួលបាន​នូវ​ភាពកក់ក្តៅ​បំផុត​។ តាម​ការគ្រោងទុក នឹងមាន​ប្រតិភូ​កីឡា រួមទាំង​ភ្ញៀវទេសចរ សរុប​ជាង ១០០ នាក់​។ គោលបំណង​ចម្បងៗ នៃ​កិច្ចប្រជុំ​ថ្ងៃនេះ គឺ​ដើម្បី​បែងចែក​ការងារ និង​ពង្រឹង​ការអនុវត្ត​តួនាទី ភារកិច្ច​រៀងៗ​ខ្លួន ឲ្យ​បានច្បាស់លាស់​។​

​ការត្រៀម​លក្ខណៈ​នេះ ត្រូវបាន​ជំរុញ​ពី សម្តេច​ពិជ័យ​សេនា ទៀ បាញ់ ដោយ​ធ្វើយ៉ាងណា ឲ្យ​ការរៀប​ចំនេះ ទទួលបាន​កិត្តិយស​ជាតិ និង​ជោគជ័យ ក្នុងនាម​ជា​ម្ចាស់ផ្ទះ រាប់​ចាប់តាំងពី ការរៀបចំ​កិច្ចប្រជុំ​នានា រហូតដល់​ការទទួល​ធ្វើ​ម្ចាស់ផ្ទះ​ស៊ី​ហ្គេម និង​អាស៊ាន​ប៉ា​រ៉ា​ហ្គេម ឆ្នាំ​២០២៣​។​

​លោក វ៉ា​ត់ ចំរើន អគ្គលេខាធិការ CAMSOC បាន​បន្ថែមថាៈ នៅ​កិច្ចប្រជុំ​ក្របខណ្ឌ​អាស៊ី​អា​គ្នេ​យ៍ នាពេលខាង​មុខ ឆាប់ៗ​នេះ សំខាន់​គឺ​ម្ចាស់ផ្ទះ ចង់បាន​ការគាំទ្រ​ពី សមាជិក អាស៊ីអាគ្នេយ៍ ឲ្យ​បានច្បាស់លាស់​បន្ថែម និង​ការត្រួតពិនិត្យ វាយតម្លៃ ទៅលើ​ហេដ្ឋារចនាសម្ព័ន្ធ​កីឡា​នានា នៅ​រាជា​ធានី​ភ្នំពេញ តាមរយៈ​ការរៀបចំ​កញ្ចប់ ទស្សនកិច្ច ជូន​សមាជិក​អាស៊ីអាគ្នេយ៍ ដោយ​មិនទាន់​រៀបចំ ទីលាន​ប្រកួត នៅតាម​បណ្តា​ខេត្ត​គោលដៅ រៀបចំ​ស៊ី​ហ្គេម​នៅឡើយ​ទេ ដោយសារ​ខេត្ត​ទាំងនោះ មាន​ប្រភេទ​កីឡា ១ ឬ ២ ប៉ុណ្ណោះ​។​

​ជាមួយនឹង​ការខិតខំ​រៀបចំ​ជា​ជំហានៗ​នេះ យើង​ជឿជាក់ថា ការទទួល​រៀបចំ​ធ្វើ​ម្ចាស់ផ្ទះ ស៊ី​ហ្គេម​លើក​ទី​៣២ និង​អាស៊ាន​ប៉ា​រ៉ា​ហ្គេម​លើក​ទី​១២ ជា​កំណត់ត្រា​ប្រវត្តិសាស្ត្រ ដំបូង​របស់​កម្ពុជា នឹង​ទទួលបាន​ជោគជ័យ ជាក់​ជាមិនខាន​៕/V​